បុរសស្រ្តីទាំងឡាយ អ្នកប្រាថ្នាចង់បាន នូវសិរីសួស្តី ក្នុងការរស់នៅ គួរគប្បីប្រតិបត្តិបូជា នូវទិសទាំង៦ តាមបែបព្រះពុទ្ធសាសនា ៖ កើត ត្បូង លិច ជើង លើ និង ក្រោម។
- ទិសកើត គោរពប្រតិបត្តិមាតាបិតា ដែលបានផ្តល់កំណើតដល់យើង ដល់អស់លោកអ្នកដ៏មានគុណ ដែលបានចិញ្ចឹម បីបាច់ថែររក្សាយើង ឱ្យរស់រាន
- ទិសត្បូង គោរពប្រតិបត្តិគ្រូបាអាចារ្យ អ្នកប្រដែរប្រដៅ ផ្តល់ដំបូន្មានល្អៗ ដែលបានបង្ហាត់បង្ហាញ ឱ្យយើងបានចេះដឹង បានក្លាយជាមនុស្សល្អ
- ទិសលិច គោរពស្រលាញ់ក្រុមគ្រួសារ ស្វាមីភរិយា និងកូនឱ្យបានល្អ មើលថែររក្សាគ្នា ធ្វើយ៉ាងណា ឱ្យគ្រួសាររស់នៅសុខដមរម្យនា
- ទិសជើង គោរពស្រលាញ់ញាតិមិត្ត សម្លាញ់ អ្នកជិតខាង អ្នកធ្វើការជាមួយគ្នារាល់ថ្ងៃ នោះពួកគេនឹងគោរពស្រលាញ់លោកអ្នកវិញ និងជួយគ្នាទៅវិញទៅមក
- ទិសខាងក្រោម ស្រលាញ់រាប់អាន មើលថែរអ្នកបម្រើការក្នុងផ្ទះ ឬអ្នកដែលមានឋានៈ តូចជាងខ្លួន នោះពួកគេនឹងផ្តល់នូវសេចក្តីសុខ ឱ្យលោកអ្នកវិញ ជាការតបស្នង
- ទិសលើ គោរពប្រតិបត្តិសាសនា ពីព្រោះព្រះជាម្ចាស់ ទេពតា នឹងតែងតែតាមថែររក្សា ការពារបុគ្គលល្អ ដែលប្រព្រឹត្តអំពើល្អ។
អស់លោកអ្នក ដែលគោរពប្រតិបត្តិខ្ជាប់ខ្ជួន នឹងទទួលបាននូវសេចក្តីសុខ ក្នុងជីវិតរស់នៅប្រចាំថ្ងៃ។ កិច្ចបូជានេះ ក៏មិនកំណត់ត្រឹមតែសម្រាប់ពុទ្ធសាសនិកជននោះទេ សាសនិកជនដ៏ទៃ ក៏ប្រតិបត្តបាន និងទទួលផលដូចគ្នា៕
——
សុភី, ២៨ មករា ២០២១
អត្ថបទស្ដីពី«ការគោរពបូជានូវទិសទាំង៦ តាមបែបព្រះពុទ្ធសាសនា»ខាងលើ ត្រូវបានផ្ញើរមកទស្សនាវដ្ដី និងត្រូវបានចុះផ្សាយ ក្នុងក្របខណ្ឌសេរីភាព នៃការបញ្ចេញមតិ។ ទស្សនាវដ្ដីបានធ្វើការកែសម្រួល នូវឃ្លាឃ្លោងមួយចំនួន និងកំហុសអក្ខរាវិរុទ្ធខ្លះៗ ប៉ុន្តែអត្ថន័យដើមរបស់អត្ថបទ និងអ្វីដែលស្មេរចង់អះអាង មិនត្រូវបានផ្លាស់ប្ដូរទេ។
ឆ្លៀតក្នុងឱកាសនេះ ទស្សនាវដ្ដីសូមធ្វើការលើកទឹកចិត្ត ដល់មិត្តអ្នកអានទាំងអស់ ដែលមានបំណងចង់ផ្ញើរជាអត្ថបទស្រាវជ្រាវ ប្រលោមលោក ល្បែងកំសាន្ដ ល្បងប្រាជ្ញា ឬមតិយោបល់ទាក់ទងនឹងអ្វីក៏ដោយ ដែលបម្រើដល់ប្រយោជន៍សង្គម ឬប្រយោជន៍សហគមន៍ មកទស្សនាវដ្ដី។ សូមសរសេរអត្ថបទ ឬឯកសារទាំងនោះ ដោយប្រើពុម្ពអក្សរខ្មែរយូនីកូដ (Khmer Unicode) ដាក់លើ «Microsoft Word file» ហើយផ្ញើរមកទស្សនាវដ្ដីតាមរយៈ ខ្សែភ្ជាប់នេះ (ចុចពីលើ) ឬតាមមែល [email protected]។
