សហព័ន្ធបាល់ទាត់ពិភពលោក «FIFA» បានប្រកាសនៅថ្ងៃព្រហស្បត្តិ៍ ទី២១ ខែមករានេះ មិនទទួលស្គាល់ក្របខណ្ឌ «SuperLeague» ដែលត្រូវបានសារព័ត៌មាន យកមកផ្សាយថា ជាការផ្ដួចផ្ដើមឡើង របស់ក្រុមបាល់ទាត់យក្សមួយចំនួន នៅអ៊ឺរ៉ុប។ ស្ថាប័នអន្តរជាតិ នៅបានគម្រាមដាក់ទណ្ឌកម្ម ទៅលើក្រុមបាល់ទាត់ណា ឬកីឡាករណាក៏ដោយ ដែលចូលរួម ក្នុងក្របខណ្ឌនេះថែមទៀត។
បើតាមប្រព័ន្ធផ្សព្វផ្សាយ ដែលលើកយកគម្រោងនេះមកលំអិត បានឲ្យដឹងថា ក្របខណ្ឌ «SuperLeague» មានទម្រង់ប្រហាក់ប្រហែល នឹងក្របខណ្ឌ «Champions League» របស់សហព័ន្ធបាល់ទាត់អ៊ឺរ៉ុប «UEFA» ដែរ តែថា ក្របខណ្ឌថ្មីនេះ នឹងទទួលបានកម្រៃដ៏លើសលប់ ហើយធ្វើឡើងជាលក្ខណៈបិទជិត រវាងតែក្រុមបាល់ទាត់យក្ស នៅក្នុងប្រទេសធំៗ ចំនួន៥ឬ៦ ក្នុងទ្វីបអ៊ឺរ៉ុបខាងលិចប៉ុណ្ណោះ។
សារព័ត៌មានបារាំងឈ្មោះ «L’Equipe» បានរាយការណ៍ កាលពីចុងខែតុលា ឆ្នាំ២០២០ថា ក្រុមបាសឺឡូន (Barcelona – អេស្ប៉ាញ) បានត្រៀមខ្លួន ដើម្បីចូលរួមក្នុងក្រុបខណ្ឌខាងលើ ខណៈសារព័ត៌មានអេស្ប៉ាញឈ្មោះ «AS» បានបញ្ជាក់កាលពីថ្ងៃចន្ទទី១៨ ខែមករា ឆ្នាំ២០២១ថា នាយកក្រុមរៀល (Real Madrid – អេស្ប៉ាញ) និងក្រុមជូវេនទូស (Juvetus – អ៊ីតាលី) ក៏បានជួបគ្នានិយាយពីរឿងនេះដែរ។
នៅចំពោះព័ត៌មានទាំងនេះ សហព័ន្ធបាល់ទាត់ពិភពលោក «FIFA» បានចេញសេចក្ដីថ្លែងការណ៍រួមមួយ ក្នុងថ្ងៃព្រហស្បត្តិ៍ ទី២១ ខែមករា ជាមួយសហព័ន្ធបាល់ទាត់ ប្រចាំទ្វីបទាំង៦ (AFC, CAF, Concacaf, Conmebol, OFC និង UEFA) បញ្ជាក់ថាខ្លួន និងសហព័ន្ធជាសមាជិកទាំង៦ បដិសេធមិនទទួលស្គាល់ ក្របខណ្ឌ«SuperLeague»ខាងលើឡើយ។
សេចក្ដីថ្លែងការណ៍បានគម្រាមឡើងថា៖
«ក្នុងស្មារតីនេះ ក្រុមបាល់ទាត់ ឬកីឡាករណាក៏ដោយ ដែលចូលរួមប្រកួតក្នុងក្របខណ្ឌ (មិនទទួលស្គាល់ដោយ FIFA ខាងលើ) ត្រូវប្រឈមនឹងការបដិសេធសិទ្ធិចូលរួមប្រកួត ក្នុងរាល់ក្របខណ្ឌទាំងឡាយ ដែលរៀបចំឡើងដោយ FIFA ឬដោយសហព័ន្ធជាសមាជិករបស់ខ្លួន។»
សហព័ន្ធបាល់ទាត់ពិភពលោក បានរំឭកថា គោលការណ៍ជាសាកល ឈរលើគុណតម្លៃកីឡា សាមគ្គីភាព ការវាយតម្លៃ ក៏ដូចជាការឧបត្ថម្ភធន បានបង្កើតមូលដ្ឋានគ្រឹះ នៃបាល់ទាត់។ «FIFA» បញ្ជាក់ថា៖
«បើសិនជាបាល់ទាត់ មានអាយុកាល ដ៏យូរលង់ និងរុងរឿងដូច្នេះ គឺដោយសារតែគោលការណ៍ ទាំងអស់នេះ៕»
