ម៉េស៊ី ព្រលះក្រុមខ្លួនឯងថា ការប្រកួតនេះ ជារូបភាពនៃក្រុមដ៏ខ្សោយមួយ
ពិបាកទទួលណាស់ សម្រាប់ខ្សែប្រយុទ្ធដ៏ល្បី របស់ក្រុមអ្នកមានបុណ្យ។ ហើយនេះជាអ្វី ដែលកីឡាករ លីយ៉ូនែល ម៉េស៊ី (Lionel Messi) បានបង្ហាញឲ្យដឹង នៅក្នុងកិច្ចសម្ភាស នៅក្រោយបរាជ័យ របស់ក្រុមខ្លួន ទល់នឹងក្រុម អូសាស៊ូណា (Osasuna) ដែលត្រូវបានកាត់បន្ថយចំនួនកីឡាករ មកត្រឹមតែ១០នាក់។
ការបរាជ័យ ១-២ ក្នុងកីឡាដ្ឋានខ្លួនឯង ទល់នឹងក្រុម អូសាស៊ូណា ដែលឈរនៅ ចំណាត់ថ្នាក់ទី១១ នៃក្របខណ្ឌបូកពិន្ទុ«La Liga»នេះ មិនត្រឹមតែជារឿង គួរឲ្យអាម៉ាសមួយទេ តែអ្វីដែលសំខាន់ជាងនេះ គឺបរាជ័យរបស់ក្រុម បាសឺឡូន (FC Barcelone) បានហុចដាវឲ្យក្រុម រៀលម៉ាឌ្រី (Real Madrid) ដែលជាសត្រូវសួរពូជ ឈ្នះជាជើងឯករបស់ប្រទេសអេស្ប៉ាញ ប្រចាំរដូវកាល ដោយលើកពានជើងឯក លើកទី៣៤ ក្នុងល្ងាចថ្ងៃព្រហស្បត្តិ៍នេះ ជាស្ថាពរ។
បរិបទខាងលើ ត្រូវបានខ្សែប្រយុទ្ធ ឡេអូ ម្ចាស់បាល់មាស់ ៦ជំនាន់ លើកមកថ្លែង ដើម្បីព្រលះក្រុមខ្លួនឯង នៅក្រោយការប្រកួត។ កីឡាករបានថ្លែងថា៖
«ការប្រកួតនេះ បង្ហាញពីរូបភាព នៃក្រុមដ៏ខ្សោយមួយ និងមិនជាក់លាក់ ដែលមិនអាចយកឈ្នះបានទេ នៅពេលមានការប្រកួតប្រជែង ដ៏ខ្លាំងបំផុតដូច្នេះ។»
«ក្រុមរៀលម៉ាឌ្រីត បានធ្វើការងាររបស់ពួកគេ ហើយបានឈ្នះរាល់ការប្រកួត រាប់ចាប់ពីពេលបើក ឲ្យមានការប្រកួតឡើងវិញ នៅក្រោយវិបត្តិ “Covid-19″។ ផ្ទុយគ្នាស្រឡះពីយើង ដែលបានបាត់បង់ពិន្ទុ យ៉ាងច្រើន ទាំងនៅក្នុងការប្រកួត ដែលយើងមិនគួរចាញ់ទាល់តែសោះ។ យើងត្រូវធ្វើស្វ័យទិតៀន ទាំងកីឡាករ ទាំងអស់គ្នា។»
កីឡាករ ម៉េស៊ី បានរំឭកក្រុមទាំងមូល ឲ្យងាកជាបន្ទាន់ ទៅរកការប្រកួត ក្នុងក្របខណ្ឌអ៊ឺរ៉ុប «Champions League» ក្នុងវគ្គ១ភាគ៤ផ្ដាច់ព្រ័ត្រ ដែលក្រុមបាសា ត្រូវជួបក្រុម ណាប៉ូលី (Napoli) ដែលក្រុមដ៏ខ្លាំងមួយ របស់ប្រទេសអ៊ីតាលី។ ខ្សែប្រយុទ្ធដ៏ល្បី បានលើកឡើងថា៖
«បើយើងចង់ឈ្នះពាន “Champions League” យើងត្រូវធ្វើការផ្លាស់ប្ដូរច្រើនយ៉ាង ឬបើមិនអញ្ចឹងទេ យើងនឹងមិនអាចជម្រុះក្រុម ណាប៉ូលី បានឡើយ (…) នៅក្នុងពានអ៊ឺរ៉ុប យើងនៅសល់បួនប្រកួត ហើយពានមួយនេះ នរណាៗក៏ចង់បានវា យកមកកាន់នឹងដៃដែរ។ តែដើម្បីធ្វើបាន គេត្រូវធ្វើការប្ដូរច្រើនយ៉ាង និងត្រូវធ្វើស្វ័យទិតៀន៕»
