នៅសិសិររដូវក្រោយ បណ្ដាប្រទេសនៅទ្វីបអ៊ឺរ៉ុប ត្រូវត្រៀមខ្លួន ដើម្បីទប់ស្កាត់ការរាតត្បាត នៃជំងឺ«Covid-19» ដែលអាចកើតមានជាថ្មី បើទោះនៅពេលនេះ តួលេខបង្ហាញពីការថមថយ នៃការរាតត្បាតនេះក៏ដោយ។
លោកវេជ្ជបណ្ឌិត «Hans Kluge» នាយកអង្គការសុខភាពពិភពលោក (WHO Europe) ប្រចាំនៅទ្វីបអ៊ឺរ៉ុប បានព្រមានឡើងដូច្នេះ និងបញ្ជាក់បន្ថែមថា ការរាតត្បាតជាលើកទីពីរ នឹងកើតមាន ហើយអាចសម្លាប់មនុស្ស ច្រើនជាងការរាតត្បាត នៅពេលនេះ។
ក្នុងកិច្ចសម្ភាសមួយ ជាមួយសារព័ត៌មាន «Telegraph» នៃចក្រភពអង់គ្លេស មេដឹកនាំជាតិប៊ែលហ្សិក ប្រចាំតំបន់ របស់អង្គការខាងលើ បានលើកឡើងថា ទន្ទឹមនឹងការអបអរ ចំពោះតួលេខថយចុះនៃការរាតត្បាត រដ្ឋាភិបាលនៃបណ្ដាប្រទេសអ៊ឺរ៉ុប ចាំបាច់ត្រូវត្រៀមខ្លួន នៅចំពោះការរាតត្បាត ជាលើកទីពីរ ដែលអាចមានសភាពរង្គាល ជាលើកនេះ។
លោកថា៖
«រលកទីពីរ នៃការរាតត្បាត នឹងមកដល់ នៅសិសិររដូវក្រោយ ខណៈការថយចុះ នៃកម្លាំងរាតត្បាត ស្ថិតនៅឆ្ងាយនៅឡើយ ពីទីបញ្ចប់របស់វា។ ការរាតត្បាតជាថ្មី នឹងមានសភាពធ្ងន់ធ្ងរ ហើយអាចសម្លាប់មនុស្ស ច្រើនជាងពេលនេះ ដោយហេតុថា មេរោគ”Covid-19″ អាចនឹងរួមកម្លាំង ជាមួយជំងឺប្រចាំរដូវផ្សេងទៀត ដូចយ៉ាង ជំងឺផ្ដាសាយធំជាដើម។»
លោក «Kluge» បានស្នើឲ្យបណ្ដាប្រទេស នៅទ្វីបអ៊ឺរ៉ុប មើលគំរូរបស់ប្រទេសមួយចំនួន នៅក្នុងទ្វីបអាស៊ី។ លោកមានប្រសាសន៍ថា៖
«ប្រទេសសិង្ហបូរី និងជប៉ុន បានយល់ថា ពេលនេះ មិនមែនជាពេលស្រែកហ៊ោរកញ្ជៀវ សប្បាយនឹងការថមថយ នៃការរាតត្បាតនោះទេ តែជាពេលវេលា នៃការត្រៀមខ្លួន សម្រាប់ការរាតត្បាត ដែលអាចកើតមាន ជាបន្តបន្ទាប់ នាពេលខាងមុខ៕»
