លោក បារ៉ាក់ អូបាម៉ា (Barack Obama) អតីតប្រធានាធិបតីសហរដ្ឋអាមេរិក បានចេញមុខធ្វើប្រតិកម្ម ចំពោះការស្លាប់ របស់លោក ជច៍ ផ្លយ (George Floyd) កាលពីថ្ងៃចន្ទទី២៥ ខែឧសភា បន្ទាប់ពីបុរសអាមេរិកាំង-ស្បែកខ្មៅរូបនេះ ត្រូវក្រុមភ្នាក់ងារនគរបាល ៤នាក់ ចាប់ឃាត់ខ្លួន យ៉ាងហិង្សា ដោយសង្កត«ក»។ សម្រាប់លោកអតីតប្រធានាធិបតី ការឃាត់ខ្លួនរបៀបនេះ មិនគួរត្រូវចាត់ទុក ថាជារឿង«ធម្មតា»នោះឡើយ។
ប្រធានាធិបតីអាមេរិក ជំនាន់ទី៤៤ និងជាប្រធានាធិបតីស្បែកខ្មៅ លើកដំបូង របស់ប្រទេសមហាអំណាច បានថ្លែងដូច្នេះ នៅក្នុងសេចក្ដីប្រកាសព័ត៌មាន ដ៏វែងមួយ ដែលចេញផ្សាយ នៅថ្ងៃសុក្រទី២៩ ខែឧសភា។ លោកថា៖
«ករណីនេះ មិនគួរត្រូវបានចាត់ទុក ថាជារឿង”ធម្មតា” នៅក្នុងប្រទេសអាមេរិក ឆ្នាំ២០២០នេះឡើយ។ វាមិនអាចជារឿង”ធម្មតា”បានទេ។»
លោក អូបាម៉ា បន្តថា៖
«ប្រសិនជាយើង ចង់ឲ្យកូនចៅជំនាន់ក្រោយ របស់យើង ធំដឹងក្ដីឡើង នៅក្នុងប្រទេសមួយ ដែលសក្ដិសម នឹងឧត្ដមគតិខ្ពស់បំផុត របស់ខ្លួន យើងមានលទ្ធភាព និងត្រូវធ្វើ ឲ្យបានប្រសើរជាងនេះ។»
នៅក្នុងលិខិតដដែល លោកអតីតប្រធានាធិបតី បានបង្ហាញអំពី អារម្មណ៍«ទុក្ខព្រួយរួម» ដូចគ្នានឹងអារម្មណ៍ របស់មនុស្សជាច្រើនលាននាក់ ផ្សេងទៀត នៅចំពោះការស្លាប់ របស់លោក ជច៍ ផ្លយ ដែលបង្កឲ្យមានបាតុកម្ម និងអំពើហិង្សា ជាបន្តបន្ទាប់ ក្នុងសហរដ្ឋអាមេរិក ចាប់ពីថ្ងៃពុធ ទី២៧ ខែឧសភានេះមក៕
