ការស្វាគមន៍របស់រដ្ឋមន្ត្រីការបរទេសអាមេរិក ចំពោះការបដិសេធ របស់រដ្ឋាភិបាលកម្ពុជា អំពីវត្តមានយោធាចិន នៅខេត្តព្រះសីហនុ គឺជាការឲ្យតម្លៃដល់«សច្ចភាព និងសន្តិភាពកម្ពុជា»។ នេះ ជាការអះអាងឡើង របស់លោក ផៃ ស៊ីផាន អ្នកនាំពាក្យរបបក្រុងភ្នំពេញ ក្នុងថ្ងៃសុក្រទី២ ខែសីហានេះ។
កាលពីថ្ងៃព្រហស្បត្តិ៍ ទី១ ខែសីហាម្សិលម៉ិញ លោក ម៉ៃ ភមភីអូ (Mike Pompeo) រដ្ឋមន្ត្រីការបរទេសអាមេរិក បានថ្លែងទៅកាន់ក្រុមអ្នកសារព័ត៌មាន ក្រោយកិច្ចប្រជុំរដ្ឋមន្ត្រីការបរទេសអាស៊ាន ក្នុងរាជធានីបាងកក ប្រទេសថៃ ថាសហរដ្ឋអាមេរិកស្វាគមន៍ ការបដិសេធរបស់កម្ពុជា ចំពោះរបាយការណ៍ ដែលអះអាងថា មានវត្តមានមូលដ្ឋានយោធាចិន នៅលើទឹកដីកម្ពុជា។
លោក ភមភីអូ ថ្លែងឡើងថា៖
«កម្ពុជាបានបដិសេធរបាយការណ៍ដែលថា កម្ពុជាអនុញ្ញាតឲ្យមាន មូលដ្ឋានយោធាចិន នៅលើទឹកដីរបស់ខ្លួន។ សហរដ្ឋអាមេរិកស្វាគមន៍ ការការពារ អធិបតេយ្យភាព បូរណភាពដែនដីដ៏ខ្លាំងក្លា របស់កម្ពុជា ហើយលើកទឹកចិត្ត ដល់ប្រទេសផ្សេងទៀត ក្នុងតំបន់ ឲ្យធ្វើតាមលំនាំរបស់កម្ពុជា។»
សម្រាប់លោក ផៃ ស៊ីផាន ការលើកឡើងរបស់ប្រមុខការទូតអាមេរិក គឺជាប្រវត្តិសាស្រ្ដថ្មីមួយ នៃទំនាក់ទំនង និងកិច្ចសហប្រតិបត្តិការ ហើយជា«ជោគជ័យរួម» សម្រាប់ជាផលប្រយោជន៍ នៃប្រជាជាតិទាំងពីរ ក៏ដូចជាពិភពលោកទាំងមូល។
មន្ត្រីអ្នកនាំពាក្យរដ្ឋាភិបាលក្រុងភ្នំពេញ បានបន្តទៀតថា៖
«នេះជាការលើកទឹកចិត្តមួយ បន្ថែមទៀត ដែលឯកឧត្តម Mike Pompeo បានណែនាំដល់ប្រទេសដទៃទៀត “យកគំរូកម្ពុជា ក្នុងកិច្ចការពារអធិបតេយ្យភាពរបស់ខ្លួន ឱ្យបានរឹងមាំ” ដែលជាសារមួយ ដ៏មានសារៈសំខាន់ ក្នុងការបញ្ចប់យុទ្ធនាការអមិត្ត និងញុះញង់របស់ជន ក្រុម ឬអង្គការណាមួយ ដែលយកផលប្រយោជន៍នយោបាយ របស់ខ្លួនគេជាអាទិភាព ហើយបង្កើតអរិភាព រវាងប្រជាជាតិយើងទាំងពីរ ខ្មែរ-អាមេរិក ដែលបង្កើតបាន នូវកាយល់ច្រលំដ៏អាក្រក់បំផុត។»
លោក ផៃ ស៊ីផាន អះអាងជាចុងក្រោយថា៖
«ខ្ញុំសូមថ្លែងអំណរគុណចំពោះលោក Mike Pompeo ក៏ដូចជាប្រជាពលរដ្ឋអាមេរិក ដែលឱ្យតម្លៃដល់សច្ចភាព និងសន្ដិភាព រួមជាមួយកិច្ចសហប្រតិបត្តិការ ដ៏ជិតស្និទរវាងប្រជាជាតិយើងទាំងពីរ៕»
