កម្ពុជាដំណឹង

មន្ត្រី​ស្ថានទូត​អាមេរិក ចូលបរិភោគ​«នំបញ្ចុក»​នៅហាង រ៉ូហ្សែត

មន្ត្រីទទួលបន្ទុកផ្នែកនយោបាយ នៃស្ថានទូតសហរដ្ឋអាមេរិក ប្រចាំនៅកម្ពុជា លោក «Luis G.Salas» បានឆ្លៀតឱកាស នៃដំណើររបស់លោក ទៅកាន់ខេត្តបាត់ដំបង ក្នុងព្រឹកថ្ងៃពុធ ទី២៩ ខែឧសភា ឆ្នាំ២០១៩នេះ ដើម្បីចូលទៅទទួលទាន«នំបញ្ចុក» ជាអាហារថ្ងៃត្រង់ នៅក្នុងហាងនំបញ្ចុក របស់កញ្ញា ស៊ីន ចាន់ពៅរ៉ូហ្សែត អតីតចៅសង្កាត់ជាប់ឆ្នោត មកពីគណបក្សប្រឆាំង។

អតីតមន្ត្រីមូលដ្ឋាន របស់គណបក្សសង្គ្រោះជាតិរូបនេះ បានបង្ហោះព័ត៌មានខាងលើ មានអមដោយរូបភាព​ពីរសន្លឹកផង នៅលើគណនីហ្វេសប៊ុក​របស់នាង។ កញ្ញាបាន​បញ្ជាក់ថា កញ្ញាសូមថ្លែងអំណរគុណ«ជាខ្លាំង» ​ចំពោះមន្ត្រីស្ថានទូតខាងលើ ដែលបាន «ឆ្លៀតពេលបន្តិច» មកស្រស់ស្រូបអាហារថ្ងៃត្រង់ នៅហាងរបស់នាង។

ព្រឹកថ្ងៃពុធទី29 ខែឧសភា ឆ្នាំ2019 នេះ លោក Luis G.Salas មន្ត្រីជាន់ខ្ពស់ នៃស្ថានទូតអាមេរិក ទទួលបន្ទុកផ្នែកនយោបាយ…

Posted by Sin Rozeth on Wednesday, May 29, 2019


ការបង្ហោះរបស់អតីតចៅសង្កាត់ជាប់ឆ្នោត ដែលត្រូវបានបង្ខំ ឲ្យបោះបង់តំណែង​របស់ខ្លួន កាលពីចុងឆ្នាំ២០១៧នោះ ទទួលបានការចែករំលែកភ្លាមៗ ដល់ទៅជាង១ពាន់ដង ពីសំណាក់ប្រិយមិត្តរបស់នាង នៅលើបណ្ដាញសង្គម។

អ្នកទាំងនោះ បាននាំគ្នាធ្វើប្រតិកម្មចម្រុះ និងប្លែកៗគ្នា។ ជាពិសេស ពួកគេបានភ្ជាប់ទិដ្ឋភាពនេះ ទៅនឹងព្រឹត្តិការណ៍ចុងក្រោយ នៃដីកាកោះរបស់តុលាការ និងនគរបាល ដែលឲ្យក្រុមមន្ត្រី-សកម្មជន របស់គណបក្សប្រឆាំង ចូលបង្ហាញខ្លួន និងបំភ្លឺអំពី«ការទទួលទាននំបញ្ចុកជុំគ្នា» ក្នុងពេលកន្លងមក។

លោក « Luis G.Salas » មិនមែនជាមន្ត្រីស្ថានទូតអាមេរិកទីមួយ ដែលបានចូលទទួលទាន«នំបញ្ចុក» ក្នុងហាងរបស់កញ្ញា រ៉ូហ្សែត នោះទេ។ កាលពីពេលកន្លងមក លោក «William A. Heidt» អតីតឯកអគ្គរដ្ឋទូតអាមេរិក ក៏បានចូលទៅសាកសួរសុខទុក្ខ និងទទួលទានអាហារ ជាមួយអតីតចៅសង្កាត់ អូរចា នៅទីនោះដែរ។

អរគុណលោក William Heidt ដែលបានមកបំពេញការងារ ជាឯកអគ្គរដ្ឋទូតរបស់អាមេរិក ប្រចាំកម្ពុជា រយៈពេលបីឆ្នាំនេះ។…

Posted by Sin Rozeth on Wednesday, November 28, 2018


ព្រឹត្តិការណ៍នៃការទទួលទាននំបញ្ចុក បានក្លាយជាប្រធានបទក្ដៅគគុកមួយ ដែលត្រូវបានក្រុមមន្ត្រីគណបក្សសង្គ្រោះជាតិ យកមកបរិហាររបបដឹកនាំនៅកម្ពុជា ដោយពួកគេលើកឡើងថា បើគ្រាន់តែទទួលទានអាហារជុំគ្នា ក៏ត្រូវបានតុលាការ ឬនគរបាលធ្វើការឃ្លាំមើល និងកោះហៅទៅបំភ្លឺដែរនោះ។

សម្រាប់លោក ផៃ ស៊ីផាន អ្នកនាំពាក្យរដ្ឋាភិបាលក្រុងភ្នំពេញ បានចាត់ទុកចំណាត់ការថ្មីៗទាំងនោះ ថាបាន​ផ្អែក​លើ​ហេតុផល «​សន្តិសុខ​ជាតិ» ហើយមិនមានស្ថាប័នណា អាចជំទាស់នឹងការសង្ស័យ ដែលជាកាតព្វកិច្ចរបស់តុលាការ នោះឡើយ។

យ៉ាងណា សាខាអ្នកគាំទ្រ​​គណបក្សសង្គ្រោះជាតិ ប្រចាំក្នុងប្រទេសបារាំង បានប្រកាសរៀបចំជា«ទិវានំបញ្ចុក»មួយឡើយ នៅថ្ងៃទី៩ ខែមិថុនាខាងមុខ។ ម្ចាស់កម្មវិធី បានអះអាងថា កម្មវិធីបុណ្យ«នំបញ្ចុកសាមគ្គី»នេះ មានបំណងដើម្បីលើកតម្លៃ ចំណីអាហារប្រពៃណីជាតិ និងរឹតចំណងមេត្រីភាព រវាងខ្មែរ និងខ្មែរ៕



You may also like

កម្ពុជា

ព្រឹទ្ធសមាជិក​បារាំង៖ ហ៊ុន សែន ជា​អ្នកបំផ្លាញ EBA ខណៈ EU មិនដកថយ

លោក អង់ឌ្រេ ហ្គាតូឡាំង (André Gattolin) សមាជិកព្រឹទ្ធសភា​​មកពី​គណបក្ស​​កាន់អំណាច របស់ប្រទេសបារាំង បានថ្លែងខ្លាំងៗ​ទម្លាក់​ការទទួល​ខុសត្រូវ នៃការបាត់បង់ ប្រព័ន្ធ​​អនុគ្រោះ​ពន្ធ «EBA» ទៅលើការដឹកនាំ របស់លោកនាយករដ្ឋមន្ត្រី ...
កម្រមាន

ចាប់ខ្លួន​គិលានុបដ្ឋាក​ម្នាក់ ព្រោះ​ទារករបស់អ្នកជំងឺ​មាន «DNA ដូច»

ក្នុងរដ្ឋអារីហ្សូណា (Arizona) ភាគខាងលិចសហរដ្ឋអាមេរិក គិលានុបដ្ឋាកមួយរូប ត្រូវបានអាជ្ញាធរចាប់ខ្លួន បន្ទាប់ពីបានសង្ស័យ​បុរសថែទាំអ្នកជំងឺរូបនេះ ថាបានចាប់រំលោភស្ត្រីអ្នកជំងឺម្នាក់ ដែលសន្លប់ស្ដូកស្ដឹងមិនដឹងស្មារតី តាំងពីច្រើនជាង១០ឆ្នាំមកហើយ ខណៈទារកដែលកើតមក ត្រូវបានរកឃើញថាមាន «DNA ដូច»ជនសង្ស័យ។ ...
កម្ពុជា

ហ៊ុន សែន ៖ «បើ​តឹងច្រមុះ​រន្ធទាំងពីរ ហ្អែង​ដកដង្ហើម​តាមមាត់»

«យើងធ្វើសេដ្ឋកិច្ច មិនមែនពឹងពាក់ តែវិស័យណាមួយ ដែលទុកឲ្យគេខ្ទប់ច្រមុះយើង ស្លាប់នោះទេ» នេះ ជាការអះអាងឡើង របស់នាយករដ្ឋមន្ត្រីកម្ពុជា នៅក្នុងការថ្លែងមួយរបស់លោក កាលពីព្រឹកម៉ិញ ជុំវិញនយោបាយ «សេដ្ឋកិច្ច» ថ្មី ...

Comments are closed.

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...