«បេសកកម្ម នៅក្នុងភូមិគ្រឹះសម្ដេច វិមានឯករាជ្យ» នេះជាសាររបស់លោក អ៊ិម សុវណ្ណារិទ្ធ ជនសង្ស័យចាប់ជំរិត មួយរូប ដែលត្រូវបានសម្លាប់ ក្នុងហេតុការណ៍ប្លន់ប្រដាប់អាវុធមួយ កាលពីថ្ងៃទី១ ខែមីនា ឆ្នាំ២០២១។ សារនោះ ត្រូវបានយុវជនអាយុ២១ឆ្នាំរូបនេះ បង្ហោះពីរដងក្នុងថ្ងៃទី៥ ខែឧសភា ឆ្នាំ២០២០ (នៅត្រង់នេះនិងទីនេះ) ដោយអមមកជាមួយ នូវរូបថតចំនួនពីរសន្លឹកផង ដែលថតនៅជុំវិញវិមានឯករាជ្យ (រាជធានីភ្នំពេញ) ដែលមានគេហដ្ឋានរបស់លោក ហ៊ុន សែន ស្ថិតនៅ។
ក្នុងរូបថតទាំងពីរ ក៏គេឃើញយុវជន អ៊ឹម សុវណ្ណារិទ្ធ ពាក់ផ្លាកសម្គាល់នៅលើខ្លួន បង្ហាញថាខ្លួន ជាមន្ត្រីកងអង្គរក្ស ដែលបង្កើតឡើង ដើម្បីការពារលោក ហ៊ុន សែន និងក្រុមគ្រួសាររបស់លោក។
ប៉ុន្តែស្នងការដ្ឋានបុគ្គលិក-បណ្ដុះបណ្ដាល នៃបញ្ជការដ្ឋានអង្គរក្ស បានបដិសេធថា លោក អ៊ឹម សុវណ្ណារិទ្ធិ មិនមែនជាមន្ត្រីកងអង្គរក្សនោះទេ។ លិខិតបដិសេធរបស់ស្ថាប័នខាងលើ បានបញ្ជាក់ថា ឈ្មោះនេះបានប្រើប្រាស់បណ្ណសម្គាល់ខ្លួនក្លែងក្លាយ។
នៅក្នុងហេតុការណ៍ប្លន់ប្រដាប់អាវុធ ដើម្បីចាប់ជំរិត ក្នុងបុរីអង្គរភ្នំពេញ ខណ្ឌសែនសុខ ជនសង្ស័យខាងលើ និងជនសង្ស័យបីនាក់ទៀត ត្រូវបានកម្លាំងកងរាជអាវុធហត្ថបាញ់សម្លាប់នៅហ្នឹងកន្លែង ដោយចោទប្រកាន់ថា ពួកគេទាំងបួនបានបាញ់តដៃ ជាមួយសមត្ថកិច្ច។
ក្រៅពីរូបថតខាងលើ ហ្វេសប៊ុករបស់លោក អ៊ឹម សុវណ្ណារិទ្ធ នៅបានបង្ហោះរូបថតជាច្រើន ដែលបង្ហាញពីទ្រព្យសម្បត្តិ ឡានទំនើបៗ និងភាពហ៊ឺហា ព្រមទាំងតួនាទី និងសម្លៀកបំពាក់ជាកងអង្គរក្ស ក្នុងឋានៈជាវរសេនីយ៍ត្រី។ រូបថតមួយចំនួនទៀត បង្ហាញឃើញយុវជនវ័យក្មេង បានទៅដល់ និងថតរូបរបៀបសិស្សជាមួយគ្រូបង្វឹក នៅមណ្ឌលហ្វឹកហ្វឺនអង្គរក្ស នៅភ្នំស្រង់ និងនៅក្រាំងចេកខេត្តកំពង់ស្ពឺជាដើម។
សម្រាប់លោកនាយឧត្តមសេនីយ៍ ហ៊ីង ប៊ុនហៀង អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការនៃបញ្ជាការដ្ឋានអង្គរក្សរបស់លោក ហ៊ុន សែន បានចាត់ទុកថា សម្លៀកបំពាក់របស់លោក អ៊ឹម សុវណ្ណារិទ្ធ ទំនងជាត្រូវបានកាត់ពាក់ និងស្លៀកពាក់ដោយខ្លួនឯង។ លោកឧត្ដមសេនីយ៍ ត្រូវបានស្រង់សំដីដោយសារព័ត៌មានក្នុងស្រុក មកបញ្ជាក់ទៀតថា ជនសង្ស័យចាប់ជំរិត ខាងលើមិនមានឈ្មោះ នៅក្នុងបញ្ជាការដ្ឋានអង្គរក្សរបស់លោកនោះទេ។
យ៉ាងណា អាជ្ញាធររបបក្រុងភ្នំពេញ មិនបានអះអាងពីការស៊ើបអង្កេត ដើម្បីស្វែងរកថា តើជនសង្ស័យមានជាប់ពាក់ព័ន្ធ ជាមួយនរណាខ្លួះ ហើយថា តើការបង្កើតបណ្ណសម្គាល់ខ្លួនក្លែងក្លាយរបស់ជនសង្ស័យ មានការរួមគំនិតពីជនណាផ្សេងនោះឡើយ៕
