សួន សេរីរដ្ឋា ថ្លែងពី«ខ្លាសេដ្ឋកិច្ច» ដែលទិញអំបិលទឹកភ្លើងពីបរទេស
កម្ពុជាជា«ខ្លាសេដ្ឋកិច្ច»? សម្រាប់លោក សួន សេរីរដ្ឋា ពិបាកឲ្យនិយមន័យ ចំពោះពាក្យថា «កម្ពុជាខ្លាសេដ្ឋកិច្ច» ប៉ុន្មានម៉ាត់នេះណាស់ ដោយហេតុថា មេដឹកនាំខ្មែរមិនចេះរកការងារឲ្យពលរដ្ឋធ្វើនៅក្នុងស្រុក ហើយបើសូម្បីអំបិលទឹកភ្លើង ក៏ខ្មែរត្រូវទិញនាំចូលពីបរទេសដែរ។
អតីតប្រធានគណបក្សអំណាចខ្មែរ បានរៀបរាប់នៅលើបណ្ដាញសង្គមថា មេដឹកនាំមិនដែលឲ្យពលរដ្ឋថៃ ដែលមានចំនួនដល់ទៅជាង៧០លាននាក់ ខ្វះការងារធ្វើឡើយ។ លោកថា៖
«មិនតែប៉ុណ្ណោះ គេអាចដឹកនាំដោយផ្តល់ការងារតំលៃខ្ពស់ ដល់ពលករ ៣ ប្រទេសថែមទៀតក្នុងតំបន់ គឺផ្តល់ការងារឲ្យខ្មែរ ឲ្យលាវ និងឲ្យភូមា មានការងារធ្វើ… ហើយមេដឹកនាំសៀម ក៏មិនដែលខ្វល់ចង់បាន “EBA” ពីអ៊ឺរ៉ុបដែរ។»
«មើលមកស្រុកខ្មែរ ដែលពួកមេដឹកនាំរាល់ថ្ងៃនេះ ខំអួតខ្លួនថា ជាខ្លាសេដ្ឋកិច្ចថ្មីក្នុងតំបន់នោះ សួរថា៖ តើបានបង្កើតការងារ ផ្តល់ការងារឲ្យពលរដ្ឋខ្មែរ បានធ្វើ បានតំលៃខ្ពស់ មិនបាច់ចេញទៅស៊ីឈ្នួល លក់កម្លាំងឲ្យបរទេស នៅក្រៅប្រទេសហើយឬនៅ?»
លោក រដ្ឋា បានលើកឡើងត្រួស ពីរបៀបដឹកនាំ នៅក្នុងប្រទេសកម្ពុជា ដែលលោកមើលឃើញដូច្នេះថា៖
«ប្រទេសមានសមុទ្រ ចាក់ដីលុបសមុទ្រ រំលាយសហគមន៍អ្នកធ្វើស្រែអំបិល ហើយតាំងទៅទិញអំបិលពីចិន (?)… ប្រទេសមានទន្លេ មានបឹង នាំគ្នាចាក់ដីលុបបឹង វាតទីយកដីលក់ ហើយតាំងខ្វះទឹក ទៅទិញទឹកពីសៀម (?)…។ គ្រាន់តែអំបិល ទឹក និងភ្លើងអគ្គីសនី សុទ្ធតែពឹងយួន ពឹងសៀម ពឹងចិនទាំងអស់ ! តើ”ខ្លាសេដ្ឋកិច្ច”ស្អី?»
ក្នុងពេលនេះ លោក សួន សេរីរដ្ឋា កំពុងត្រៀមបង្កើតគណបក្សនយោបាយថ្មីមួយទៀត ដែលទំនងជាមានឈ្មោះ «គណបក្សខ្មែរកែទម្រង់» ឬឈ្មោះ «គណបក្សផ្ដល់អំណាចពលរដ្ឋ» ដែលមានបាវចនា «ជាតិ ទឹកដី សេរីភាព»។ គណបក្សរបស់លោក ទំនងជាចេញជារូបរាង នៅចុងសប្ដាហ៍នេះ។
អតីតប្រធានចលនាអំណាចពលរដ្ឋខ្មែរ បានយកឱកាសនេះ ហៅមេដឹកនាំកម្ពុជាសព្វថ្ងៃ ថាបានកើតចេញ ពីអ្នកនយោបាយល្ងង់ ដែលចូលទៅអង្គុយ ក្នុងសភា«ល្ងង់»។ លោកសរសេរថា៖
«ដរាបណាពលរដ្ឋនៅតែបន្តជឿទុកចិត្ត រើសយកអ្នកនយោបាយល្ងង់ ទៅអង្គុយក្នុងសភា សភាល្ងង់នោះ នឹងបង្កើតបានរដ្ឋាភិបាលល្ងង់ ហើយរដ្ឋាភិបាលល្ងង់នោះហើយ ដែលដឹកនាំប្រទេស ឲ្យពលរដ្ឋវេទនា៕»
