កម្ពុជាដំណឹង

សម រង្ស៊ី៖ កម្ពុជាខុសពីថៃ គឺព្រះមហាក្សត្រខ្មែរ ជា«អាយ៉ងសុទ្ធសាធ»

សម្រាប់លោក សម រង្ស៊ី បានលើកឡើងថា ចំណុចខុសគ្នា​រវាងរបបដឹកនាំ នៅថៃនិង​កម្ពុជា គឺព្រះមហាក្សត្រខ្មែរសព្វថ្ងៃ ជា«អាយ៉ងសុទ្ធសាធ» ខណៈព្រះមហាក្សត្រថៃ មាន​អំណាចខ្លាំងក្លា តែអ្វីដែលប្រទេសថៃ មានរបបដឹកនាំ​ដូចនៅកម្ពុជា គឺ«របបផ្ដាច់ការ​ យកព្រះមហាក្សត្រ​ធ្វើចំណាប់ខ្មាំង»។

អត្ថាធិប្បាយរបស់មេដឹកនាំប្រឆាំង ធ្វើឡើងនៅក្នុងអត្ថបទដ៏វែងអន្លាយមួយ ដែល​លោក​សរសេរជាភាសាអង់គ្លេស មានចំណងជើងថា «អ្នកប្រជាធិបតេយ្យខ្មែរ និងថៃ តស៊ូ ដើម្បីបុព្វហេតុតែមួយ»។ អត្ថបទនេះ ត្រូវបាន​ផ្សព្វផ្សាយ នៅលើគេហទំព័រផ្លូវការ របស់​លោក និងនៅតាម​សារព័ត៌មាន «Online» មួយចំនួន។

ប្រធានស្ដីទីគណបក្សសង្គ្រោះជាតិ ដែលកំពុងរស់នៅនិរទេសខ្លួន នៅក្រៅប្រទេស បានសរសេរពីរដ្ឋធានីប៉ារីស (ប្រទេសបារាំង) ថា៖

«នៅប្រទេសថៃ ដូចជានៅប្រទេសកម្ពុជា អញ្ចឹងដែរ របបផ្តាច់ការ យកព្រះមហាក្សត្រ ធ្វើជាខែល ដើម្បីការពារ អំណាច និងបុព្វសិទ្ធិសក្តិភូមិ របស់ខ្លួន។ ប្រទេសទាំងពីរនេះ ខុសគ្នាតែម្យ៉ាងគត់ គឺព្រះមហាក្សត្រថៃ មានអំណាចខ្លាំងក្លា តែព្រះមហាក្សត្រខ្មែរសព្វថ្ងៃ ជា”អាយ៉ងសុទ្ធសាធ”។»

ចំណុចមួយទៀត ដែលលោក សម រង្ស៊ី លើកឡើងថា ប្រទេសថៃខុសពីកម្ពុជា គឺភាពជឿនលឿន និងជីវភាពសម្បូរសប្បាយ របស់ពលរដ្ឋ នៅក្នុងប្រទេសទាំងពីរ។ លោកសរសេរថា៖

«ប្រទេសថៃ ជឿនលឿន និងសម្បូរសប្បាយ ជាងប្រទេសកម្ពុជាសព្វថ្ងៃ ឆ្ងាយណាស់ ពីព្រោះប្រទេសថៃ មិនដែលស្ថិតក្រោមអំណាច ជនផ្តាច់ការ អវិជ្ជា ល្ងង់ខ្លៅ និងព្រៃផ្សៃ ដូចមេខ្មែរក្រហម ប៉ុល ពត (១៩៧៥-១៩៧៩) និងអតីតមេកងពលខ្មែរក្រហម ហ៊ុន សែន (ចាប់តាំងពី ១៩៧៩ មកដល់បច្ចុប្បន្ន)។»

អត្ថបទរបស់មេដឹកនាំប្រឆាំង បានពន្យល់យ៉ាងច្រើន អំពីការតស៊ូ នៃអ្នកប្រជាធិបតេយ្យ នៅក្នុងប្រទេសទាំងពីរ ដែលលោក សម រង្ស៊ី ថាធ្វើឡើង ដើម្បី«បុព្វហេតុតែមួយ»។ ដូចការដកស្រង់ឃ្លាមួយ ដែលមានអត្ថន័យទាំងស្រុងថា៖

«អ្នកគាំទ្រលទ្ធិប្រជាធិបតេយ្យ នៅប្រទេសកម្ពុជា និងនៅប្រទេសថៃ កំពុងតែប្រយុទ្ធ​ដូចគ្នា ពីព្រោះពួកយើងចង់បានសង្គមថ្មីមួយទំនើប ប្រកបដោយសេរីភាព និង​យុត្តិធម៌។»

ក្នុងពេលកន្លងមក លោក សម រង្ស៊ី ធ្លាប់បានបង្ហោះរូបថត លោកលើកម្រាមដៃបី ដើម្បី​អ្វីមួយ ដែលលោកអះអាងថា ជា«សាមគ្គីភាព» ជាមួយបាតុករនៅក្នុងប្រទេសថៃ។ ប្រធានស្ដីទីគណបក្សប្រឆាំង បានពន្យល់​នៅក្នុងអត្ថបទ ជុំវិញការលើកម្រាមដៃ «ទាំងបី» ថា៖

«សម្រាប់អ្នកប្រជាធិបតេយ្យ នៅស្រុកខ្មែរ ម្រាមដៃ៣ មានន័យថា ៖
១- អនុវត្តន៍កិច្ចព្រមព្រៀង សន្តិភាព ទីក្រុងប៉ារីស ឆ្នាំ ១៩៩១ ឲ្យបានត្រឹមត្រូវ
២- គណបក្សសង្គ្រោះជាតិ ដំណើរការឡើងវិញ
៣- រៀបចំការបោះឆ្នោតឡើងវិញ ដោយចំហ សេរី និងយុត្តិធម៌ ដោយមានការចូលរួម ពីគ្រប់គណបក្ស។»

ប៉ុន្តែ«ម្រាមដៃ៣»របស់លោក សម រង្ស៊ី ត្រូវបានលោកនាយករដ្ឋមន្ត្រី ហ៊ុន សែន ព្រមានតបវិញ ដោយហៅទង្វើនេះថា ជាការលូកលាន់ ចូលក្នុងកិច្ចការផ្ទៃក្នុង របស់ប្រទេសថៃ។

បុរសខ្លាំងនៅកម្ពុជា បានប្រតិកម្មដូច្នេះ នៅ​ចំពោះ​មុខ​ពលរដ្ឋ​រង​គ្រោះ ​ដោយសារ​ទឹក​ជំនន់ នៅ​ខែត្រ​បន្ទាយ​មាន​ជ័យ កាលពី​ថ្ងៃ​ទី២១ ខៃតុលា ឆ្នាំ២០២០។ លោក ហ៊ុន សែន ថ្លែងខ្លាំងៗ នៅពេលនោះថា៖

«​ខ្ញុំ​គ្រាន់​តែ​ផ្កាំ​ផ្ញើ កំពុង​តែ​ទឹក​ជំនន់​ផង ​កូវីដ​ផង កុំ​រញ៉េរញ៉ៃ ហើយ​កុំ​ទៅ​លើក​ម្រាម​ដៃ ៣អី (ថា) ចូលរួម​ជាមួយ​ថៃ ឃើញ​ថៃ​គេ​ដាក់​ត្រឡប់​មក​វិញ​ថា កុំ​ជ្រៀតជ្រែក​កិច្ចការ​ផ្ទៃក្នុង​របស់​ថៃ។ អីណា ! ចង់​សាមគ្គីភាព​ជាមួយ​ នឹង​ការ​តស៊ូ​ជាមួយ​ប្រជាជន​ថៃ រឿង​ថៃ​រឿង​របស់​ថៃ ខ្មែរ​រឿង​របស់​ខ្មែរ៕»



You may also like

កម្ពុជា

ជំនិត កឹម សុខា ថា​ស្រុក​ខ្មែរ​«មាន​សិទ្ធិ​សម្តែង​មតិ​ពេញលេញ»

លោក មុត ចន្ថា នាយកខុទ្ទកាល័យលោក កឹម សុខា ប្រធានគណបក្សសង្គ្រោះជាតិ ដែលកំពុងជាប់ឃុំនៅក្នុងផ្ទះ បានថ្លែងអះអាងថា ស្រុកខ្មែរ«គោរពគោលការណ៍ប្រជាធិបតេយ្យ» និង«មានសិទ្ធិសម្ដែងមតិពេញលេញ»។ ការថ្លែងរបស់លោក ធ្វើឡើងតបទៅនឹងការរិះគន់ ...
លោក ហ៊ុន សែន (រូបអង្គុយ) កំពុងជល់កែវជាមួយកូន និងកូនប្រសារ ទាំងប្រុស-ស្រីរបស់លោក នៅក្នុងគេហដ្ឋានរបស់លោក។ (រូបថតហ្វេសប៊ុក)
កំសាន្ដ

ហេតុអ្វី ហ៊ុន សែន ឲ្យ​យក​ថ្ងៃ​៤មេសា​១៩៥១ ជា​«ថ្ងៃខែឆ្នាំកំណើត»?

បើសិនជា«ថ្ងៃខែឆ្នាំកំណើត»​របស់បណ្ដាជនទាំងឡាយ នៅលើពិភពលោក មិនអាចត្រូវបានកំណត់ឡើង ​ស្រេចនឹងចិត្តនោះ តែសម្រាប់បុរសខ្លាំងកម្ពុជា «ថ្ងៃខែឆ្នាំកំណើត»ត្រូវបានកំណត់ ឲ្យសមប្រកបតាមព្រឹត្តិការណ៍​នយោបាយ ដែលខ្លួនលោកចង់បាន និងទៅ​តាម​កំហុស​ របស់អ្នកវាយអង្គុលីលេខ ក្នុងសម័យក្រោយឆ្នាំ១៩៧៩។ ឯកសារជាច្រើន ទាំងផ្លូវការនិងមិនផ្លូវការ ...
កម្ពុជា

សម រង្ស៊ី ថា«លោក»​នៅកណ្ដាល ខូចជាងគេ

ការប្រើពាក្យ «អាមឹង» ដើម្បីហៅអ្នកនយោបាយខ្មែរ ទទួលបានការស្វាគមន៍ ពីបណ្ដាជនទូទៅឬទេ? នៅចំពោះការរិះគន់ លោក សម រង្ស៊ី បានប្ដូរឥរិយាបថបន្តិច ដោយហៅលោក ហ៊ុន សែន ...

Comments are closed.

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...