៊លោក ផែង វណ្ណៈ មន្ត្រីយោធាមួយរូប ដែលគេស្គាល់ថា ជាអ្នកប្រើប្រាស់បណ្ដាញសង្គមដ៏ល្បី និងជាអ្នកគាំទ្រលោក ហ៊ុន សែន ដ៏មុតមាំនោះ ត្រូវបានកងកម្លាំងរាជអាវុធហត្ថ ចាប់ខ្លួន កាលពីព្រឹកថ្ងៃទី២ ខែមេសា ឆ្នាំ២០១៩នេះ។
ការចាប់ខ្លួននោះ ធ្វើឡើងទាក់ទងនឹងការបង្ហោះមួយរបស់លោក ផែង វណ្ណៈ ក្នុងថ្ងៃទី២៩ ខែមិនា ឆ្នាំ២០១៩ ដែលធ្វើការប្រៀបធៀបការយកប្រាក់ ទៅចូលបុណ្យសពយុវតីរងគ្រោះ ក្នុងគ្រោះថ្នាក់ចរាចរណ៍មួយ ថាមិនខុសគ្នាពីការចូលបុណ្យធ្វើចេតិយ៍សពលោក កែម ឡី ពីសំណាក់មេកាសែត «Fresh News» ដែលតំណាងឲ្យលោក ហ៊ុន សែន កាលពីពេលមុននោះទេ។
ការបង្ហោះខាងលើ របស់លោក ផែង វណ្ណៈ ធ្វើឡើងបន្ទាប់ពីបណ្ដឹង របស់មេកាសែត «Fresh News» ដែលគេស្គាល់ថា ជាក្បាលម៉ាស៊ីនឃោសនាដ៏រឹងមាំមួយរបស់បុរសខ្លាំងកម្ពុជា និងរបបដឹកនាំរបស់លោក ប្ដឹងលោក ផែង វណ្ណៈ ឡើងទៅតុលាការ ពីបទបរិហារ្តិ៍ជាសាធារណៈ ជុំវិញការលើកឡើងរបស់មន្ត្រីយោធារូបនេះ រិះគន់កាសែតខាងលើ ថាធ្វើកិច្ចការខ្លួន តែនៅកន្លែងណាដែលមានលុយប៉ុណ្ណោះ។
នៅក្នុងបណ្ដឹងមួយរបស់លោក គី តិច មេធាវីតំណាងឲ្យនាយករដ្ឋមន្ត្រីកម្ពុជា ដាក់ទៅកាន់សាលាដំបូង កាលពីថ្ងៃទី១ ខែមេសា ឆ្នាំ២០១៩ម្សិលម៉ិញ បានអះអាងថា សំណេររបស់មន្ត្រីយោធា នៅលើបណ្ដាញសង្គម ពិតជាមានផែនការច្បាស់លាស់ និងចេតនាទុច្ចរិត ដោយធ្វើការប្រៀបធៀប ក្នុងបំណងចោទប្រកាន់ និងទម្លាក់កំហុសទៅលើលោក ហ៊ុន សែន ថាជាឃាតករសម្លាប់លោកបណ្ឌិត កែម ឡី។
លោក គី តិច បានបញ្ជាក់ក្នុងបណ្ដឹង នោះទៀតថា លោកមានភស្ដុតាងចំនួន ១៤ទំព័រ ដែលមានភ្ជាប់មកជាមួយពាក្យបណ្ដឹង ដើម្បីដាក់បន្ទុកលើលោក ផែង វណ្ណៈ។
លោក ផែង វណ្ណៈ ជាមន្ត្រីយោធាស័ក្តិ ៤កន្លះ បន្ទាប់ពីលោក ត្រូវបានផ្ទេរចេញ ពីក្រសួងមហាផ្ទៃ ទៅកាន់ក្រសួងការពារជាតិ។ តាមរយៈគណនីហ្វេសប៊ុក និងទំព័រហ្វេសប៊ុករបស់លោក មន្ត្រីយោធារូបនេះ តែងបង្ហោះសរសើរ គាំទ្ររដ្ឋាភិបាលគណបក្សប្រជាជនកម្ពុជា ប៉ុន្តែលោកក៏ឧស្សាហ៍បង្ហោះសាររិះគន់ ទៅដល់អ្នកមានប្រាក់ មានអំណាច និងមន្ត្រីគ្រាក់ៗជាច្រើន នៅក្នុងរបបដឹកនាំមួយនេះដែរ។
បើតាមសារព័ត៌មានក្នុងស្រុក បានឲ្យដឹងថា លោក ផែង វណ្ណៈ នៅពេលនេះ ត្រូវបាននាំខ្លួន បញ្ជូនទៅកាន់បញ្ជាការដ្ឋាន កងរាជអាវុធហត្ថលើផ្ទៃប្រទេស ដេីម្បីធ្វើការសាកសួរ៕
