ហេតុការណ៍បានកើតឡើង នៅវេលាម៉ោងប្រមាណជា ៤ល្ងាចថ្ងៃទី៣ ខែសីហា ឆ្នាំ២០២០នេះ។ បុរសពីរនាក់ ម្នាក់មានអាយុ២១ឆ្នាំ និងម្នាក់ទៀតអាយុ៣២ឆ្នាំ បានរត់ចេញពីមណ្ឌលធ្វើចត្តាឡីស័ក វិទ្យាល័យកំពង់លាវ ក្នុងខេត្តព្រៃវែង និងបានគេចខ្លួនបាត់ស្រមោល ខណៈក្រុមអាជ្ញាធរ កំពុងព្យាយាមតាមស្វែងរកពួកគេ ឲ្យវិលត្រឡប់មកវិញ។
ប្រភពពីអាជ្ញាធរសុខភាព ខេត្តព្រៃវែង ដែលស្រង់សំដី ដោយសារព័ត៌មានក្នុងស្រុក បានឲ្យដឹងថា បុរសទាំងពីរនាក់ ម្នាក់ឈ្មោះ កំសត់ វិស័យ និងម្នាក់ទៀតឈ្មោះ ចន កំសាន ជាអ្នកដំណើរ ដែលបានវិលត្រឡប់ ពីប្រទេសម៉ាឡេស៊ី ចូលមកដល់កម្ពុជា កាលពីថ្ងៃទី២៣ ខែកក្កដា ឆ្នាំ២០២០។
ក្រុមមន្ត្រីបានសំដែងក្ដីបារម្ភ អំពីហនិភ័យនៃការឆ្លងជំងឺ «Covid-19» ទៅក្នុងសហគមន៍ ប្រសិនជាបុរសទាំងពីរនាក់ មានផ្ទុកមេរោគដ៏ចង្រៃ តែមិនទាន់បង្ហាញរោគសញ្ញា ក្នុងពេលនេះ។
ករណីរត់ចេញ ពីមណ្ឌលធ្វើចត្តាឡីស័កនេះ បានកើតឡើងជាលើកទី២ បន្ទាប់ពីករណីមុន របស់ស្ត្រីខ្មែរ-អាមេរិកាំងម្នាក់ ដែលបានរត់ចេញពីមណ្ឌលធ្វើចត្តាឡីស័ក ក្នុងរាជធានីភ្នំពេញ និងត្រូវបានរកឃើញ មួយថ្ងៃក្រោយមក នៅក្នុងសណ្ឋាគារមួយ នៃទីរួមខេត្តកំពង់ចាម។
មកដល់ថ្ងៃទី០៣ ខែសីហា ឆ្នាំ២០២០នេះ ប្រទេសកម្ពុជាបានបញ្ចេញតួលេខផ្លូវការ ថាខ្លួនរកឃើញអ្នកជំងឺ «Covid-19» សរុបចំនួន២៤០នាក់ (ស្ត្រី ៤៦នាក់ និងបុរស ១៩៤នាក់) ក្នុងនោះចំនួនអ្នកព្យាបាលជាសះស្បើយ មានចំនួន ១៩៧នាក់ (ស្រី ៤៣នាក់ និងបុរស១៥៤នាក់)។ រីឯអ្នកជំងឺនៅសេសសល់ ចំនួន៤១នាក់ កំពុងសម្រាកព្យាបាល នៅក្នុងមន្ទីរពេទ្យរដ្ឋ និងពីរនាក់ទៀត កំពុងសម្រាកព្យាបាល ក្នុងស្ថានទូតអាមេរិកប្រចាំកម្ពុជា៕
ដំណឹងចុងក្រោយ ដែលទស្សនាវដ្ដីមនោរម្យ.អាំងហ្វូ ទើបនឹងទទួល បានឲ្យដឹងថា បុរសទាំងពីរនាក់ ត្រូវបានក្រុមអាជ្ញាធររកឃើញវិញ និងនាំមកធ្វើចត្តាឡីស័កបន្តទៀត នៅមណ្ឌលចត្តាឡីស័កដដែល៕
