បុរសវ័យ៧៥ឆ្នាំម្នាក់ទៀត បានទទួលមរណភាព ដោយសារជំងឺកូវីដ-១៩ (Covid-19) ក្នុងព្រឹកថ្ងៃទី២២ ខែមីនា ឆ្នាំ២០២១ ធ្វើឲ្យ​ចំនួនអ្នកជំងឺស្លាប់ ដោយសារជំងឺរាតត្បាតនៅម្ពុជា កើនឡើងដល់«៤នាក់»។ នេះ បើតាម​សេចក្ដី​ប្រកាសព័ត៌មាន របស់ក្រសួង​សុខាភិបាល​កម្ពុជា ដែលចេញផ្សាយ នៅមុននេះបន្តិច។

បើតាមសេចក្ដីប្រកាសព័ត៌មាននោះ បានឲ្យដឹងថា បុរសវ័យចំណាស់ ដែលជាអ្នករស់នៅ ក្នុងខណ្ឌពោធិសែនជ័យ រាជធានីភ្នំពេញ ទើបនឹងត្រូវបានរកឃើញ មានជំងឺកូវីដ កាលពីយប់ម្សិលម៉ិញ (ថ្ងៃទី២១ ខែមីនា) បន្ទាប់ពីលោក​បានចូល​សម្រាកព្យាបាល នៅមន្ទីរពេទ្យរុស្ស៊ី ដោយមានអាការៈហត់ខ្លាំង និងពិបាកដកដង្ហើម។

ក្រសួងសុខាភិបាល បានបន្តថា ដោយមានអការៈរលាកសួតធ្ងន់ធ្ងរ ដែលមិនអាចជួយសង្គ្រោះបាន ទើបអ្នកជំងឺ​បានទទួលអនិច្ចកម្ម ក្នុងព្រឹក​ថ្ងៃទី​២២ ខែមីនានេះ វេលាម៉ោង៨។

បើតាមប្រភពផ្សេងទៀត បានអះអាងថា អ្នកជំងឺខាងលើ ជាលោកវេជ្ជបណ្ឌិត ស្ដើង ជា ជំនាញខាងជំងឺកុមារ តែ​លោកបាន​ចូលនិវត្តន៍​ហើយ។ រហូតមកដល់ថ្ងៃនេះ លោក ស្ដើង ជា ជាប្រធានគណកម្មការវេជ្ជសាស្រ្ត និង​វិទ្យាសាស្រ្ត​កីឡា នៃគណៈកម្មាធិការជាតិ​អូឡាំពិក​កម្ពុជា។

មកដល់ថ្ងៃនេះ បើគិតរួមទាំងជនរងគ្រោះផ្សេងទៀត ដែលបានស្លាប់ ក្នុងអំឡុងពេលធ្វើចត្តាឡីស័ក និងក្នុង​អំឡុងពេល​សម្រាកព្យាបាល នៅឯមន្ទីរពេទ្យផង ប្រទេសកម្ពុជាមានអ្នកស្លាប់ ៩នាក់ហើយ។ តែមានតែជន​រងគ្រោះ​៤នាក់ប៉ុណ្ណោះ ដែលអាជ្ញាធរសុខាភិបាល អះអាងថា ទទួលមរណភាពដោយជំងឺកូវីដ-១៩។ រីឯជន​រងគ្រោះ​​៥នាក់​ទៀត (ក្នុងនោះ​២នាក់ជាជនជាតិចិន) ត្រូវបានអាជ្ញាធរប្រកាសថា ស្លាប់ដោយសារជំងឺ«ខ្យល់គ» «គាំងបេះដូង» ឬមានអាការៈ«ញៀនថ្នាំ»ជាដើម។

តួលេខរបស់ក្រសួងសុខាភិបាល ដែលចេញផ្សាយ ក្នុងព្រឹកថ្ងៃទី២២ ខែមីនា ឆ្នាំ២០២១ដដែល បានបញ្ជាក់ថា កម្ពុជាបានរកឃើញ​អ្នកជំងឺកូវីដ-១៩ សរុប​មានចំនួន ១៧៥៣នាក់ ក្នុងនោះអ្នកជំងឺដែលបានជាសះស្បើយ មានចំនួន ៩៦៧នាក់ ខណៈអ្នកជំងឺ ដែលកំពុង​សម្រាក​ព្យាបាល នៅឯមន្ទីរពេទ្យ មានចំនួន ៧៨១នាក់៕



You may also like

កម្ពុជា

ថ្ងៃ៨មីនា៖ ហ៊ុន សែន លើកពី​«ស្ត្រី​និងការអភិវឌ្ឍ ​ក្នុងបរិការណ៍​កូវីដ-១៩»

តើមានអ្វីទាក់ទងគ្នា រវាងទិវាអន្តរជាតិស្ដីពីសិទ្ធិស្ត្រី ថ្ងៃ៨មីនា និងជំងឺរាតត្បាតកូវីដ-១៩ (Covid-19)? សម្រាប់​លោក​នាយករដ្ឋមន្ត្រី ហ៊ុន សែន បានភ្ជាប់ព្រឹត្តិការណ៍ទាំងពីរនេះ ទៅក្នុងប្រធានបទថ្មី​មួយ ដែលលោកដាក់​ឈ្មោះ​ឱ្យថា៖ «ស្ត្រី​និងការអភិវឌ្ឍ ក្នុងបរិការណ៍​កូវីដ-១៩»។ ...
កម្ពុជា

កម្ពុជាស្នើជាថ្មី ឲ្យវៀតណាម​គោរព​«បទដ្ឋាន​បច្ចេកទេស» មុនបង្ហោះ​ព័ត៌មាន

ក្រសួងសុខាភិបាលកម្ពុជា បានប្រកាសនៅ​ថ្ងៃទី១១ ខែមិថុនា ឆ្នាំ២០២០នេះ ឲ្យភាគី​វៀតណាម គោរពតាម«បទដ្ឋាន​បច្ចេកទេស និងគោលការណ៍ និយ័តកម្មអន្តរជាតិ» លើករណី​ជំងឺឆ្លង មុននឹងធ្វើការសន្និដ្ឋាន ឬចុះផ្សាយព័ត៌មាន ដែលបះពាល់ដល់កម្ពុជា។ សេចក្តីថ្លែងការណ៍ ...
វប្បធម៌ និងជីវិត

Covid-19៖ «WHO»បញ្ឈប់​ការសាកល្បង​ថ្នាំ អ៊ីឌ្រូស៊ីក្លរូគីន

អង្គការសុខភាពពិភពលោក (WHO /OMS) បានប្រកាសនៅថ្ងៃចន្ទ ទី២៥ ខែឧសភានេះ បានបញ្ឈប់​ជាបណ្ដោះអាសន្ន នូវការសាកល្បងថ្នាំ អ៊ីឌ្រូស៊ីក្លរូគីន (Hydroxychloroquine) ដែលជាថ្នាំព្យាបាលជំងឺគ្រុនចាញ់ មកប្រើព្យាបាលជំងឺ «Covid-19»។ ...

Comments are closed.

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...