ដំណឹងបារាំង

អតីត​រដ្ឋមន្ត្រី​មហាផ្ទៃ​បារាំង ត្រូវតុលាការ​ផ្តន្ទាទោស ឲ្យ​ជាប់គុក​១ឆ្នាំ

លោក ក្លូដ ហ្គេអង់ (Claude Guéant) អតីត​រដ្ឋមន្ត្រី​មហាផ្ទៃ​បារាំង និងជាអតីតដៃស្ដាំ របស់ប្រធានាធិបតីបារាំង លោក នីកូឡា សាកូហ្សី (Nicolas Sarkozy) ត្រូវបានតុលាការកំពូល សម្រេចតម្កល់សាលក្រម របស់តុលាការជាន់ទាប (សាលាឧទ្ធរណ៍) ដោយផ្ដន្ទាទោសរូបលោក ឲ្យជាប់ពន្ធនាគារពីរឆ្នាំ ក្នុងនោះមួយឆ្នាំត្រូវព្យួរទោស។

លោក ហ្គេអង់ ដែលឡើងធ្វើរដ្ឋមន្ត្រីមហាផ្ទៃ រវាងពីខែកុម្ភៈ ឆ្នាំ២០១១ មកដល់ខែឧសភា ឆ្នាំ២០១២ ត្រូវបានរកឃើញ ថាមានជាប់ពាក់ព័ន្ធ នឹងការលើក​ទឹកចិត្ត​ មន្ត្រី​​ក្រោមបង្គាប់ ដោយផ្ដល់ជាប្រាក់សុទ្ធ នៅក្នុងក្រសួងមហាផ្ទៃ។

សាលាឧទ្ធរណ៍បារាំង បានសម្រេចក្ដី ក្នុងសំនុំរឿងនេះ ដោយចេញសាលក្រម កាលពីថ្ងៃទី២៣ ខែមករា ឆ្នាំ២០១៧ ផ្ដន្ទាទោសរូបលោក ឲ្យជាប់ពន្ធនាគារ ដូចរៀបរាប់ខាងលើ ហើយបានពិន័យលោក ជាប្រាក់ប្រមាណជា ៧៥ ០០០ អ៊ឺរ៉ូបន្ថែមទៀត (ក្នុងសំណុំរឿងតែមួយ) ពីបទលួចបង្វិល ហិរញ្ញវត្ថុសាធារណៈ។

យ៉ាងណា ការសម្រេចដាក់ពន្ធនាគារ ទៅលើ អតីត​រដ្ឋមន្ត្រី​មហាផ្ទៃ​បារាំង មិនមានន័យស្មើ នឹងការចាប់ខ្លួនលោក ដាក់ពន្ធនាគារនោះទេ។ តាមច្បាប់ប្រទេសបារាំង ការជាប់ពន្ធនាគារ ដែលមានរយៈពេល តិចជាង២ឆ្នាំ អាចត្រូវផ្លាស់ប្ដូរ ដោយការដាក់ទោស បែបផ្សេងបាន។ ប៉ុន្តែលោក ហ្គេអង់ ត្រូវហាមឃាត់ មិនឲ្យធ្វើការ និងមានឋានៈតំណែង នៅក្នុងតួនាទីសាធារណៈ សម្រាប់រយៈពេល៥ឆ្នាំ

បើតាមបទចោទនោះ បានឲ្យដឹងថា លោក ក្លូដ ហ្គេអង់ បានប្រព្រឹត្តិទង្វើល្មើសនេះ រវាងពីឆ្នាំ២០០២ មកទល់នឹងឆ្នាំ២០០៤ នៅពេលលោក ជានាយកខុទ្ទកាល័យ របស់លោក នីកូឡា សាកូហ្សី ដែលពេលនោះ ជារដ្ឋមន្ត្រីមហាផ្ទៃបារាំង (មិនទាន់ក្លាយជាប្រធានាធិបតី)។

បើតាមការស៊ើបអង្កេត បានរកឃើញថា ទឹកប្រាក់សរុប (ជាប្រាក់សុទ្ធ) ប្រមាណជា ២១០ ០០០អ៊ឺរ៉ុប ដែលត្រូវបានផ្ដល់ ទៅឲ្យមន្ត្រីជាច្រើននាក់ ដែលជាសមាជិកខុទ្ទកាល័យ របស់លោក នីកូឡា សាកូហ្សី ដែលបានជាប់ឆ្នោត ក្លាយជាប្រធានាធិបតីបារាំង នៅឆ្នាំ២០០៧។

លោក ក្លូដ ហ្គេអង់ បានការពារខ្លួន នៅចំពោះតុលាការថា ទង្វើទាំងនេះ ជាការចាត់ចែង និងគ្រប់គ្រងធម្មតាមួយ នៅក្នុងក្រសួង ហើយបានគិតថា វាមិនមានអ្វី ជារឿងខុសច្បាប់ទេ៕



You may also like

ដំណឹង

បារាំង​បើក​ការ​ប្រកួត​ជា​អន្តរជាតិ​គម្រោងសង់​«កំពូល Notre-Dame»

នាយករដ្ឋមន្ត្រីបារាំង លោក អេឌូអារ ហ្វីលីព (Edouard Philippe) បានប្រកាសក្នុងថ្ងៃពុធនេះ អំពីការបើកប្រកួតប្រជែង ជាលក្ខណៈអន្តរជាតិ នូវគម្រោងស្ថាបត្យកម្ម ដើម្បីសង់«កំពូល»ចុងស្រួច នៃព្រះវិហារ «Notre-Dame» ...
ដំណឹង

រដ្ឋាភិបាល​បារាំង​គ្រោងធ្វើ​ច្បាប់​«ប្រឆាំង​ជនបំផ្លាញ»​ពេល​ធ្វើបាតុកម្ម

រដ្ឋាភិបាលបារាំងកំពុងសិក្សា ពីការបង្កើតច្បាប់មួយ បំពេញបន្ថែមទៅលើច្បាប់ធ្វើបាតុកម្ម ដើម្បីអនុញ្ញាតឲ្យចាត់វិធានការ ប្រឆាំង​ជនបំផ្លាញ និងប្រឆាំងបាតុកម្មទាំងឡាយ ដែលមិនបានជូនដំណឹង ទៅអាជ្ញាធរ។ នេះ បើតាមការអះអាងឡើង របស់លោក អេឌូអឆរ ហ្វីលីព ...
ដំណឹង

Covid-19៖ ករណីឆ្លង​កើន​ជិត​៣លាន​​នាក់ និង​ស្លាប់​ជាង២សែន​នាក់

មកដល់ម៉ោងនេះ ករណីឆ្លងជំងឺ«Covid-19» បានកើនឡើងជិត៣លាននាក់ និង​ស្លាប់​ជាង២សែន​នាក់ នៅលើពិភពលោក។​ នេះ បើតាមតួលេខ ដែលផ្ដល់ដោយសាកលវិទ្យាល័យ «Johns Hopkins» របស់សហរដ្ឋអាមេរិក ដែលធ្វើការតាមដាន ស្ថានភាពវិវត្តន៍ឡើង ...

Comments are closed.

ដំណឹង

សង្គ្រាមនៅអ៊ុយក្រែន ៖ អាមេរិកផ្ដល់ភ្លើងខៀវបញ្ជូនយន្តហោះ«F-16»

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

អ្នកជំនាញមួយក្រុមរបស់អង្គការសហប្រជាជាតិ បានអំពាវនាវទៅ​របបដឹកនាំរបស់លោក ហ៊ុន សែន ឲ្យដោះលែងអ្នកស្រី សេង ធារី មេធាវីខ្មែរអាមេរិកាំង ដែលគេស្គាល់ក្នុងពេលកន្លងមក ថាជា«ស្ត្រីសេរីភាព» តាមរយៈសម្លៀកបំពាក់តែងខ្លួនសម្ដែងមតិរបស់អ្នកស្រី នៅខាងមុខសាលាដំបូងរាជធានីភ្នំពេញ។ ក្រុមអ្នកជំនាញប្រឆាំងការឃុំឃាំងតាមទំនើងចិត្ត ...
កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...