តុលាការកំពូលបារាំង បានបញ្ជាក់នៅមុននេះបន្តិច ថាសំនុំរឿងដែលសង្ស័យអតីតប្រធានាធិបតី លោក នីកូឡា សារកូហ្សី ( Nicolas Sarkozy ) ថាបានពាក់ព័ន្ធក្នុងអំពើ«ពុករលួយ» នឹងត្រូវបញ្ជូនឡើងទៅជំនុំជម្រះ ក្នុងតុលាការព្រហ្មទណ្ឌ។
លោក នីកូឡា សារកូហ្សី តាមរយៈមេធាវីរបស់លោក បានប្ដឹងជំទាស់ជាបន្តរបន្ទាប់ រហូតដល់តុលាការកំពូល ក្នុងគោលបំណងបញ្ចៀស ការជំនុំជម្រះ ពីបទ«ពុករលួយ» និង«ប្រើអំណាចដើម្បីជះឥទ្ធិពល» នៅក្នុងសំនុំរឿង ដ៏ចម្រូងចម្រាសមួយ ដែលអតីតប្រធានាធិបតីបារាំងរូបនេះ ត្រូវបានរកឃើញ ថាធ្លាប់មានជាមួយលោក «Gilbert Azibert» អតីតចៅក្រមមួយរូប នៃតុលាការកំពូលបារាំង។
ប៉ុន្តែ ស្ថាប័នយុត្តិធម៌ខ្ពស់ជាងគេ របស់ប្រទេសបារាំង បានសម្រេចបដិសេធការជំទាស់នោះ នៅថ្ងៃពុធទី១៩ ខែមិថុនានេះ។
បើតាមសារព័ត៌មានបារាំង ដែលស្រង់យកសេចក្ដីសម្រេច របស់តុលាការកំពូលមកផ្សាយ ក្នុងទំព័ររបស់ខ្លួន បានឲ្យដឹងថា សវនាការជំនុំជម្រះអតីតប្រធានាធិបតីបារាំង នឹងត្រូវប្រព្រឹត្តិទៅ ក្នុងប៉ុន្មានខែខាងមុខ ក្នុងតុលាការព្រហ្មទណ្ឌ នៃរដ្ឋធានីប៉ារីស។
នេះ ជាលើកទីមួយហើយ ដែលអតីតប្រធានាធិបតីបារាំង ត្រូវបានកាត់ទោស ពីបទ«ពុករលួយ»៕
