មេដឹកនាំវ័យក្មេង របស់ប្រទេសកូរ៉េខាងជើង បានបញ្ចេញសញ្ញា «ឲ្យដំណឹងហើយ» បន្ទាប់ពីអវត្តមានយ៉ាងអាថ៌កំបាំង អស់រយៈពេលជាច្រើនថ្ងៃ (ឬច្រើនសប្ដាហ៍) កន្លងមក។
អវត្តមានរបស់លោក គីម ជុនអ៊ុន (Kim Jong-un) ដែល«អគ្គមគុទេសដ៏មហិមា»នៃរបបក្រុងព្យុងយ៉ាង ត្រូវបានសារព័ត៌មានជាច្រើន ពន្យល់ថា ដោយហេតុមកពីលោក ត្រូវធ្វើការវះកាត់បេះដូង ជាបន្ទាន់ បន្ទាប់ពីមានអាការៈ រលាកសសៃឈាមធ្ងន់ធ្ងរ នោះមក។
ហើយបន្ទាប់ពីនៅស្ងៀមស្ថាត់ អស់ជាច្រើនថ្ងៃចុងក្រោយ ក្បាលម៉ាស៊ីនឃោសនា របស់របបកុម្មុយនីស្ដិ៍កូរ៉េ ដែលមានឈ្មោះ «KCNA» បានផ្សាយឲ្យដឹង កាលពីល្ងាចថ្ងៃពុធទី២២ ខែមេសានេះ ថាលោក គីម ជុងអ៊ុន បានចេញសារអបអរសាទរ ទៅកាន់លោក បាឆារ អាល់អាសាធ (Bachar Al-Assad) ប្រធានាធិបតី នៃប្រទេសស៊ីរី ក្នុងឱកាសនៃបុណ្យជាតិ របស់ប្រទេសនេះ។
ប៉ុន្តែប្រព័ន្ធឃោសនា របស់ក្រុងព្យុងយ៉ាងមួយនេះ គ្រាន់តែសរសេរ ជាលក្ខណៈអត្ថបទ និងមិនបានបង្ហាញ ពីរូបភាពចុងក្រោយបង្អស់ របស់លោក គីម ដោយផ្ទាល់ទេ។
យ៉ាងណា អគ្គមេបញ្ជាការរង នៃកងទ័ពអាមេរិក លោកឧត្ដមសេនីយ «John Hyten» ក៏បានអះអាង ក្នុងថ្ងៃពុធដែរថា៖
«ខ្ញុំសន្មត់ថា លោក គីម ជុងអ៊ុន នៅតែមានការគ្រប់គ្រង យ៉ាងពេញលេញ ទៅលើកម្លាំងនុយក្លេអ៊ែរ និងកងកម្លាំងប្រដាប់អាវុធ របស់ប្រទេសកូរ៉េខាងជើង៕»
