ដំណឹងអាស៊ី-ប៉ាស៊ីភិក

Covid-19៖ ជប៉ុន​ផ្លាស់ប្ដូរ​យុទ្ធសាស្ត្រ ដើម្បី​បញ្ចៀស​«គ្រោះធំ»

រដ្ឋាភិបាលជប៉ុននឹងប្រកាស ដាក់តំបន់ចំនួន៧ លើផ្ទៃប្រទេស ទៅក្នុងភាពអាសន្ន ចាប់ពីថ្ងៃអង្គារនេះតទៅ ដើម្បីបញ្ចៀសសេណារីយូ «គ្រោះធំ» បន្ទាប់ពីករណីឆ្លងជំងឺ «Covid-19» បានកើនឡើងខ្លាំង នៅរាជធានី តូក្យូ។ នេះ បើតាមការប្រកាស របស់លោក ស៊ិនហ្សូ អាបេ (Shinzo Abe) នាយករដ្ឋមន្ត្រីជប៉ុន ក្នុងថ្ងៃចន្ទនេះ។

ថ្លែងក្នុងរដ្ឋសភា លោក ស៊ិនហ្សូ អាបេ ដែលមានពាក់ម៉ាស់ បាំងមាត់និងច្រមុះ បានបញ្ជាក់ថា៖

«បច្ចុប្បន្ន យើងកំពុងតាមដាន ការកើនឡើងយ៉ាងលឿន នៃករណីឆ្លង ជាពិសេសក្នុងតំបន់កណ្ដាលក្រុង នៃរាជធានី តូក្យូ និងក្រុង អូសាកា។ ការកើនឡើងនេះ នឹងធ្វើឲ្យប្រព័ន្ធគាំពារសុខសភាព របស់ប្រទេស លែងមានលទ្ធភាព អាចទទួលយកអ្នកជំងឺ ទៅព្យាបាល។»

មកដល់ម៉ោងនេះ កោះជប៉ុនទាំងមូល មានករណីឆ្លងជំងឺ «Covid-19» កើនដល់ចំនួន ៣ ៦៥៤នាក់ និងមានអ្នកជំងឺ ៨៥នាក់ បានស្លាប់។ នៅរាជធានីតូក្យូ គ្រាន់តែក្នុងរយៈពេល២ថ្ងៃចុងក្រោយនេះ ករណីឆ្លងត្រូវបានរកឃើញ មានចំនួន ២០០នាក់។

លោក «Kentaro Iwata» អ្នកជំនាញខាងជំងឺឆ្លង មកពីសាកលវិទ្យាល័យ «Kobe» បានព្រមានអំពី«គ្រោះធំ» តាមបណ្ដាញទូរទស្សន៍ «CNN» តាំងពីសប្ដាហ៍មុនថា៖

«យើងរង់ចាំមើល ប្រហែលជារាជធានី តូក្យូ នឹងក្លាយជាក្រុង ញ៉ូយក មួយទៀត ក្នុងពេលខាងមុខ (ដោយចង់និយាយសំដៅ ពីការរាតត្បាតខ្លាំងបំផុត នៅក្រុងញ៉ូយក នាពេលនេះ)។»

លោកបានជំរុញ ឲ្យរដ្ឋាភិបាលត្រូវចាត់វិធានការភ្លាម ដើម្បីទប់ស្កាត់មេរោគ កុំឲ្យវាពង្រីកខ្លួនបាន។ លោក «Kentaro Iwata» ថា៖

«ប្រទេសជប៉ុន ត្រូវមានសេចក្ដីក្លាហាន ដើម្បីធ្វើការផ្លាស់ប្ដូរ នៅពេលយើងដឹងច្បាស់ថា យើងកំពុងដើរលើផ្លូវខុស។»

ផ្ទុយពីប្រទេសកូរ៉េខាងត្បូង ប្រទេសជប៉ុនមិនបានធ្វើតេស្ដិ៍ ជាលក្ខណៈទូលំទូលាយ តាំងពីដំបូងទីមក ដើម្បីស្វែងរក អ្នកឆ្លងមេរោគនោះទេ។ ខណៈជប៉ុនមានករណីស្លាប់ មុនកូរ៉េខាងត្បូង រដ្ឋាភិបាលក្រុងសេអ៊ូល បានប្រកាសភាពអាសន្ន តាំងពីចុងខែកុម្ភៈ មុនអ្នកជិតខាងខ្លួន ​(ប្រទេសជប៉ុន) ប្រមាណជា១ខែកន្លះ៕



You may also like

កម្ពុជា

អ្នកជំនាញ អ.ស.ប បន្ត​ព្រមានថា ច្បាប់ថ្មី​របស់កម្ពុជា បង្កគ្រោះ​ដល់​សិទ្ធិ

អ្នកជំនាញ អ.ស.ប (អង្គការសហប្រជាជាតិ) ក្នុងវិស័យសិទ្ធិមនុស្ស​ មួយក្រុម បានចេញ​សេចក្ដីថ្លែងការណ៍ ជាសាធារណៈ និងជាថ្មីទៀត ព្រមានថា ច្បាប់ថ្មី ស្តីពីការគ្រប់គ្រង​ប្រទេសជាតិ ស្ថិតក្នុងភាពអាសន្ន របស់រដ្ឋាភិបាលកម្ពុជា ...
ដំណឹង

Covid-19៖ ករណីឆ្លង​កើន​ជិត​៣លាន​​នាក់ និង​ស្លាប់​ជាង២សែន​នាក់

មកដល់ម៉ោងនេះ ករណីឆ្លងជំងឺ«Covid-19» បានកើនឡើងជិត៣លាននាក់ និង​ស្លាប់​ជាង២សែន​នាក់ នៅលើពិភពលោក។​ នេះ បើតាមតួលេខ ដែលផ្ដល់ដោយសាកលវិទ្យាល័យ «Johns Hopkins» របស់សហរដ្ឋអាមេរិក ដែលធ្វើការតាមដាន ស្ថានភាពវិវត្តន៍ឡើង ...
កម្ពុជា

Covid-19៖ បុរសពីរនាក់ រត់ចេញ​ពីមណ្ឌល​ធ្វើ​ចត្តាឡីស័ក ក្នុង​ខេត្ត​ព្រៃវែង

ហេតុការណ៍បានកើតឡើង នៅវេលាម៉ោងប្រមាណជា ៤ល្ងាចថ្ងៃទី៣ ខែសីហា ឆ្នាំ២០២០​នេះ។ បុរសពីរនាក់ ម្នាក់មានអាយុ២១ឆ្នាំ និងម្នាក់ទៀតអាយុ៣២ឆ្នាំ បានរត់ចេញ​ពីមណ្ឌលធ្វើចត្តាឡីស័ក វិទ្យាល័យ​កំពង់លាវ ក្នុងខេត្តព្រៃវែង និងបានគេចខ្លួន​បាត់​ស្រមោល ខណៈក្រុម​អាជ្ញាធរ ...

Comments are closed.

ដំណឹង

សង្គ្រាមនៅអ៊ុយក្រែន ៖ អាមេរិកផ្ដល់ភ្លើងខៀវបញ្ជូនយន្តហោះ«F-16»

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

អ្នកជំនាញមួយក្រុមរបស់អង្គការសហប្រជាជាតិ បានអំពាវនាវទៅ​របបដឹកនាំរបស់លោក ហ៊ុន សែន ឲ្យដោះលែងអ្នកស្រី សេង ធារី មេធាវីខ្មែរអាមេរិកាំង ដែលគេស្គាល់ក្នុងពេលកន្លងមក ថាជា«ស្ត្រីសេរីភាព» តាមរយៈសម្លៀកបំពាក់តែងខ្លួនសម្ដែងមតិរបស់អ្នកស្រី នៅខាងមុខសាលាដំបូងរាជធានីភ្នំពេញ។ ក្រុមអ្នកជំនាញប្រឆាំងការឃុំឃាំងតាមទំនើងចិត្ត ...
កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...