ខេត្ត សាមុតសាខន ដែលស្ថិតនៅភាគនារតី ជាប់រាជធានីបាងកក បានប្រកាសរកឃើញ ករណីឆ្លងជំងឺកូវីដ-១៩ (Covid-19) ចំនួន ៥៤៩ករណី (៥៧៦ករណី ជាតួលេខនៅទូទាំងប្រទេស) ត្រឹមតែមួយថ្ងៃទី១៩ ខែធ្នូនេះ។ តួលេខដែលរកឃើញ បង្ហាញថា ភាគច្រើន​លើសលប់ នៃអ្នកជំងឺ សុទ្ធសឹងជាពលករ​ភូមា ដែលចូលទៅធ្វើការ ក្នុងខេត្តនេះ ជាកម្មករនេសាទ។

នៅចំពោះការហក់ឡើងខ្លាំង នៃករណីឆ្លង ដែលមិនធ្លាប់មានពីមុនមក តម្រូវឲ្យអាជ្ញាធរ ប្រកាសបិទខេត្តមួយនេះ ជាលក្ខណៈប្រកាស​អាសន្ន និងមានសុពលភាព រហូតដល់ថ្ងៃទី៣ ខែមករា ឆ្នាំ២០២១ខាងមុខ។

អ្នកឆ្លើយឆ្លងព័ត៌មាន​នៅនឹងកន្លែង បានឲ្យប្រាប់ទស្សនាវដ្ដីមនោរម្យ.អាំងហ្វូ ក្នុងយប់ថ្ងៃសៅរ៍ ទី១៩ ខែធ្នូនេះថា ទិដ្ឋភាពក្នុងខេត្ត​សាមុតសាខន មានភាពស្ងាត់ខុសធម្មតា ដោយសារអាជ្ញាធរបានបញ្ជា ឲ្យបិទសាលារៀន មជ្ឈមណ្ឌលពាណិជ្ជកម្ម ទីផ្សារ ហាងសំអាងកាយ ឬទីកន្លែងកម្សាន្ដផ្សេងៗ។

ទីផ្សារដែលលក់ទំនិញស្រស់ (ត្រីសាច់ បន្លែ…) ត្រូវបានអនុញ្ញាតិឲ្យបើក សម្រាប់រយៈពេល​៦ម៉ោងយូរបំផុត ក្នុងមួយថ្ងៃ ខណៈ​ភោជនីយដ្ឋាន ឬតៀមអាហារ ត្រូវបានអនុញ្ញាត ឲ្យលក់ចំណីអាហារឆ្អិនស្រាប់ ដោយត្រឹមតែការវេចខ្ចប់ យកទៅទទួលទាន នៅផ្ទះប៉ុណ្ណោះ។

រាល់ការផ្លាស់ទី របស់ពលករចំណាកស្រុក (ជាពិសេសជនជាតិភូមា និងខ្មែរ) ត្រូវបានហាមឃាត់ ខណៈការធ្វើដំណើរ​ចេញ-ចូល​ខេត្តសាមុតសាខន ក៏ត្រូវបានរឹតបន្ដឹងដែរ។

ចំនួនករណីឆ្លង ដែលត្រូវបានរកឃើញខាងលើ ជាករណីមិនធ្លាប់មាន នៅក្នុងប្រទេសថៃ​ រាប់ពីពេលដែលប្រទេសនេះ បានរកឃើញ​ករណីឆ្លងដំបូង នៅខែមករា ឆ្នាំ២០២០។ ក្នុងពេលកន្លងមក ករណីឆ្លងដែលច្រើនបំផុត ដែលរកឃើញក្នុងមួយថ្ងៃ គឺមានចំនួន ១៨៨ករណី នៅក្នុងខែមីនា ឆ្នាំ២០២០ ពីក្នុងព្រឹត្តិការណ៍ប្រដាល់មួយ កណ្ដាលរាជធានីបាងកក។

ការរកឃើញករណីឆ្លង ជាថ្មីក្នុងថ្ងៃសៅរ៍ ទី១៩ ខែធ្នូនេះ បានធ្វើឲ្យប្រទេសថៃ ក្លាយជាប្រទេស ដែលងាយរងគ្រោះ នឹងជំងឺរាតត្បាដ៏ចង្រៃ​នេះឡើងវិញ បន្ទាប់ពីករណីឆ្លង បានធ្លាក់ចុះសឹងដល់ចំណុចសូន្យ រាប់ពីខែឧសភានោះមក៕



You may also like

កម្ពុជា

Covid-19៖ កម្ពុជារកឃើញ​អ្នកជំងឺ​ម្នាក់​ទៀត នៅខេត្ត​បន្ទាយមានជ័យ

ប្រទេសកម្ពុជា​ បានបន្ថែមតួលេខអ្នកជំងឺ «Covid-19» ម្នាក់ទៀត ដែលត្រូវបាន​រកឃើញ នៅខេត្ត​បន្ទាយមានជ័យ បន្ទាប់ពីយុវជនអាយុ២៦ឆ្នាំរូបនេះ បានវិលត្រឡប់​ពីប្រទេសថៃ។ នេះ បើតាមសេចក្ដីប្រកាសព័ត៌មាន របស់ក្រសួងសុខាភិបាល ដែលទើប​នឹង​ចេញផ្សាយ កាលពីមុននេះបន្តិច។ ...
ដំណឹង

មេរោគ​«កូរូណា»៖ បាត់ខ្លួន គីម ជុង-អ៊ុន ជិត​បី​សប្ដាហ៍​ហើយ

មេដឹកនាំកូរ៉េកុម្មុយនីស្ដិ៍ លោក គីម ជុង-អ៊ុន (Kim Jong-un) បានបាត់ខ្លួនយ៉ាងអាថ៌កំបាំង ក្នុងប៉ុន្មានថ្ងៃចុងក្រោយ ខណៈមេរោគ«កូរូណា»ថ្មី កំពុងបន្តចម្លង យ៉ាងរីករាលដាល នៅក្នុងប្រទេសចិន និងក្នុងតំបន់។ ...
ដំណឹង

គណៈកម្មការអ៊ឺរ៉ុបស្នើមូលនិធិ ៧៥,០០០កោដិអ៊ឺរ៉ូ ដើម្បីស្ដារសេដ្ឋកិច្ចឡើងវិញ

គណៈកម្មការអ៊ឺរ៉ុប (ឬហៅម្យ៉ាងទៀត ជារដ្ឋាភិបាលសហភាពអ៊ឺរ៉ុប) បានស្នើឲ្យមាន កញ្ចប់ថវិកាមួយឡើង មានទំហំ ៧៥,០០០កោដិអ៊ឺរ៉ូ (ប្រមាណជា៧៨០កោដិដុល្លារអាមេរិក) ដើម្បីអនុញ្ញាតឲ្យសេដ្ឋកិច្ច របស់សហភាព មានដំណើរការឡើងវិញ បន្ទាប់ពីវិបត្តិជំងឺ«Covid-19»។ លោក ...

Comments are closed.

ដំណឹង

សង្គ្រាមនៅអ៊ុយក្រែន ៖ អាមេរិកផ្ដល់ភ្លើងខៀវបញ្ជូនយន្តហោះ«F-16»

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

អ្នកជំនាញមួយក្រុមរបស់អង្គការសហប្រជាជាតិ បានអំពាវនាវទៅ​របបដឹកនាំរបស់លោក ហ៊ុន សែន ឲ្យដោះលែងអ្នកស្រី សេង ធារី មេធាវីខ្មែរអាមេរិកាំង ដែលគេស្គាល់ក្នុងពេលកន្លងមក ថាជា«ស្ត្រីសេរីភាព» តាមរយៈសម្លៀកបំពាក់តែងខ្លួនសម្ដែងមតិរបស់អ្នកស្រី នៅខាងមុខសាលាដំបូងរាជធានីភ្នំពេញ។ ក្រុមអ្នកជំនាញប្រឆាំងការឃុំឃាំងតាមទំនើងចិត្ត ...
កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...