ដំរីសមុទ្រមួយក្បាល បានដើរឡើងគោក និងបានវង្វេងផ្លូវ ដោយបានដើរចុះដើរឡើង ឆ្លងពីផ្លូវមួយទៅផ្លូវមួយ បង្កការភ្ញាក់ផ្អើល ដល់អ្នកភូមិមិនតិចទេ។
ហេតុការណ៍កើតឡើង កាលពីយប់ថ្ងៃទី៦ ខែតុលា ក្នុងក្រុង «Puerto Cisnes» ដែលជាក្រុងឆ្នេរសមុទ្រ ស្ថិតក្នុងភាគកណ្ដាល នៃប្រទេសឈីលី (អាមេរិកខាងត្បូង)។
បើទោះជាប្រទេសឈីលី ស្ថិតក្នុងការប្រកាសភាពអាសន្ន ដើម្បីប្រយុទ្ធប្រឆាំងនឹងរោគរាគត្បាត «Covid-19» ក៏ដោយ តែមន្ត្រីអាជ្ញាធរ រួមនឹងអ្នកភូមិ ប្រមាណជា៥០នាក់ បានពង្រាយគ្នា ដើម្បីនាំសត្វ«ដំរីសមុទ្រមួយក្បាល»នេះ វិលទៅកាន់ទឹកដី និងផ្ទះសម្បែងដើមរបស់វាវិញ។
ការនាំសត្វសមុទ្រ ឲ្យវិលចូលទឹកវិញ បានប្រើពេល ជាច្រើនម៉ោង។ យ៉ាងណា រូបភាពដែលផ្តិតបាន ពីព្រឹត្តិការណ៍ដ៏កម្រនេះ បានចល័ត និងត្រូវបានចែករំលែក នៅពាសពេញពិភពលោក មកទល់នឹងថ្ងៃនេះ៕
