នៅក្នុងហាង «La Gitana Loca» នៃក្រុងសេវីល (Séville) ប្រទេសអេស្ប៉ាញ មនុស្សយន្ដឈ្មោះ «Beer Cart» បានក្លាយជាអ្នកចាក់ស្រាបៀរ ជំនួសឲ្យមនុស្ស។
មនុស្សយន្ដ «Beer Cart» ត្រូវបានម្ចាស់ហាង ទិញ តាំងពីនៅមុខផ្ទុះការរាតត្បាត នៃជំងឺ «Covid-19»។ តែម្ចាស់ហាងអះអាងថា មិនទាន់មានឱកាស យកមនុស្សយន្ដនេះ មកប្រើនៅឡើយ ជាពិសេស នៅបន្ទាប់ពីប្រទេសអេស្ប៉ាញទាំងមូល ត្រូវបានប្រកាសបម្រាម ហាមពលរដ្ឋចេញក្រៅផ្ទះនោះមក។
ប៉ុន្តែនៅពេលនេះ ខណៈទ្វីបអ៊ឺរ៉ុបទាំងមូល កំពុងងើបខ្លួនសន្សឹមៗ ចេញពីវិបត្តិជំងឺឆ្លង ហាង «La Gitana Loca» បានរៀបចំមនុស្សយន្ដមួយនេះ ដើម្បីឲ្យវាមានដំណើរ ហើយវាក៏ជាមធ្យោបាយ ដ៏ប្រសើរបំផុត ដើម្បីបញ្ចៀសការប៉ះពាល់ដោយផ្ទាល់ រវាងមនុស្សនិងមនុស្ស ដែលបណ្ដាលឲ្យងាយឆ្លងមេរោគ។
យ៉ាងណា បើទោះជាមនុស្សយន្ដមួយនេះ កំពុងល្បីនៅអ៊ឺរ៉ុប ហើយអាចនឹងជួយម្ចាស់ហាង ឲ្យរកចំណូលបាន យ៉ាងសន្ធឹកសន្ធាប់ក្ដី ក៏ហាង «La Gitana Loca» មិនមានការអនុញ្ញាត ឲ្យទទួលមនុស្ស លើសពី១២នាក់ ដើម្បីអាចក្រេបសា្របៀរ របស់ «Beer Cart» បានឡើយ៕
» វីដេអូស្ដីមនុស្សយន្ដ «Beer Cart»
