បើសិនជា«ថ្ងៃខែឆ្នាំកំណើត»របស់បណ្ដាជនទាំងឡាយ នៅលើពិភពលោក មិនអាចត្រូវបានកំណត់ឡើង ស្រេចនឹងចិត្តនោះ តែសម្រាប់បុរសខ្លាំងកម្ពុជា «ថ្ងៃខែឆ្នាំកំណើត»ត្រូវបានកំណត់ ឲ្យសមប្រកបតាមព្រឹត្តិការណ៍នយោបាយ ដែលខ្លួនលោកចង់បាន និងទៅតាមកំហុស របស់អ្នកវាយអង្គុលីលេខ ក្នុងសម័យក្រោយឆ្នាំ១៩៧៩។
ឯកសារជាច្រើន ទាំងផ្លូវការនិងមិនផ្លូវការ បានអះអាងថា លោក ហ៊ុន សែន បានចាប់កំណើត ចេញពីឧទរម្ដាយលោក នៅថ្ងៃទី៥ ខែសីហា ឆ្នាំ១៩៥២ នៅឃុំពាមកោះស្នា ស្រុកស្ទឹងត្រង់ ខេត្តកំពង់ចាម។
តែថ្ងៃខែឆ្នាំកំណើតនោះ មិនត្រូវបានលោកនាយករដ្ឋមន្ត្រី ប្រាប់ឲ្យប្រើប្រាស់ជាផ្លូវការទេ។ លោកបានប្រកាសកាលពីពេលថ្មីៗនេះ ឲ្យប្រើប្រាស់ថ្ងៃទី៤ ខែមេសា ឆ្នាំ១៩៥១ ដែលចំនឹងថ្ងៃនេះ ធ្វើជាថ្ងៃបុណ្យខួបកំណើត របស់លោក។
នាយករដ្ឋមន្ត្រីបីទសវត្សន៍ជាងរបស់កម្ពុជា បានពន្យល់ថា ថ្ងៃទី៤ ខែមេសានេះ ត្រូវនឹងថ្ងៃដែលលោកបានចូលព្រៃ «ម៉ាគី» ចូលរួមក្នុងចលនាសម្តេចព្រះ នរោត្តម សីហនុ ដើម្បីផ្តួលរំលំរបបលន់នល់ ដែលធ្វើឡើង នៅថ្ងៃទី៤ ខែមេសា ឆ្នាំ១៩៧០។ នៅពេលនោះ គេបានធ្វើប្រវត្តិរូប ហើយលោកបានដាក់ថ្ងៃទី៤ ខែមេសា ឆ្នាំ១៩៥២ ជាថ្ងៃខែឆ្នាំកំណើត។
បន្ទាប់មក មានការប្ដូរឆ្នាំ ពីឆ្នាំ១៩៥២ មកដាក់ជាឆ្នាំ១៩៥១។ លោក ហ៊ុន សែន បានពន្យល់ទៀតថា ការប្ដូរឆ្នាំនោះ កើតឡើងនៅក្នុងរបបសាធារណរដ្ឋប្រជាមានិតកម្ពុជា ពោលគឺនៅក្រោយឆ្នាំ១៩៧៩។ នៅពេលនោះ គេបានធ្វើប្រវត្តិរូប ដើម្បីផ្សព្វផ្សាយ សម្រាប់ថ្នាក់ដឹកនាំពីរនាក់ គឺលោក ហេង សំរិន ក្នុងនាមជាប្រមុខរដ្ឋ និងរូបលោកផ្ទាល់ ដែលជារដ្ឋមន្ត្រីការបរទេស។
លោកបន្តថា នៅពេលសរសេរប្រវត្តិរូប លោកសរសេរដាក់ឆ្នាំកំណើត ថាឆ្នាំ១៩៥២ ប៉ុន្តែអ្នកវាយអង្គុលីលេខ បែរជាសរសេរច្រលំ ដាក់ថាឆ្នាំ១៩៥១ទៅវិញ។ ដូច្នេះ ក៏ប្រើប្រាស់ជាផ្លូវការ នូវថ្ងៃទី៤ ខែមេសា ឆ្នាំ១៩៥១ ដែលជាថ្ងៃខែឆ្នាំកំណើត«ក្លែងក្លាយ»មួយនេះ រហូតមក។
យ៉ាងណា ក៏តាំងពីប៉ុន្មានថ្ងៃមុន មកទល់នឹងថ្ងៃនេះ សារលិខិតជូនពរដ៏សន្ធឹកសន្ធាប់ សម្រាប់ថ្ងៃខួបកំណើតរបស់លោក (ដែលត្រូវនឹងថ្ងៃទី៤ ខែមេសា ឆ្នាំ២០១៩នេះ) ត្រូវបានប្រព័ន្ធឃោសនាក្នុងស្រុក យកមកផ្សព្វផ្សាយ មិនលោះពេលសោះឡើយ៕
