បុរសៗខ្លាចប្រពន្ធជាច្រើន បានមកជួបជុំគ្នាដើម្បីបង្កើតជា សមាគមជួយទ្រទ្រង់អ្នកខ្លាចប្រពន្ធ។ នៅដំណាក់កាល ចុងក្រោយ បុរសទាំងនោះត្រូវការតែងតាំងមនុស្សម្នាក់ ដើម្បីធ្វើជាប្រធានដឹកនាំសមាគមនោះ។ ប្រធានសមាគម ត្រូវតែជាមនុស្សនឹងធឹង មិនចេះខ្លាចប្រពន្ធផ្ដេសផ្ដាស។ តែក្នុងចំណោមមនុស្សប្រុស ដែលមកចូលរួមទាំងនេះ គ្មាននរណាម្នាក់ក្លាហានចេញមុខ មកទទួលតួនាទីនេះទេ។
ស្ថិតនៅក្នុងសភាពស្ងៀមស្ងាត់មួយសន្ទុះ ស្រាប់តែមាន សំរែកមួយស្រែកឆោឡោឡើងថា ៖
– វើយកនយើង ប្រពន្ធៗនាំគ្នាមកហើយវើយ !!!
ពួកបុរសៗទាំងអស់លឺដូច្នេះ នាំគ្នារត់ប្រាស់អាយុតែរៀងៗខ្លួន។ នៅសល់តែបុរសម្នាក់ ដែលនៅឈរស្ងៀមធ្វើបែបហី អត់រត់ទៅណានឹងគេសោះ។ ទាំងអស់គ្នាឃើញដូច្នោះ ក៏ទះដៃអបអរសាទរ សសើរពីវីរភាពរបស់បុរស ហើយថាគាត់នេះហើយស័ក្ដិសម នឹងក្លាយជាប្រធានសមាគម។
– អស្ចារ្យៗ នេះបានចំជាអ្នកក្លាហាន របស់យើងទាំងអស់គ្នាមែន។ គាត់នៅស្ងៀម នឹងធឹង ហើយមិនចេះភ័យ នឹងប្រពន្ធផ្ដេសផ្ដាសទេ អស្ចារ្យៗ … ជាប្រធានរបស់ពួកយើង គាត់ពិតជាស័ក្ដិសមឥតខ្ចោះ …។
ទាំងអស់គ្នាត្រឡប់មកវិញ ដើម្បីមកចាប់ដៃបុរស ដែលនឹងត្រូវក្លាយជាប្រធាន របស់ខ្លួននោះ។ ស្រាប់តែភ្ញាក់ព្រើត ដោយដឹងថាបុរសនេះ ភ័យរហូតគាំងបេះដូងស្លាប់បាត់ទៅហើយ៕
