ពានរង្វាន់សម្លេងឯក នៃមហោស្រពប្រឡងចម្រៀងអន្តរជាតិ «EuroVision» ឆ្នាំ២០១៩ និងលើកទី៦៤ ក្នុងរដ្ឋធានី តែលអាវីល (អ៊ីស្ត្រាអែល) ត្រូវបានប្រគល់ជូន ទៅលើដៃអ្នកចម្រៀងជាតិហូឡង់ លោក «Ducan Laurence»។
នេះ ជាជ័យជំនះលើកទី៥ សម្រាប់វិស័យសិល្បៈចម្រៀង នៃប្រទេសហូឡង់ បន្ទាប់ពីបានអាក់ខានលើកពាន នៃមហោស្រពអន្តរជាតិមួយនេះ អស់ជាច្រើនឆ្នាំកន្លងមក។ លោក«Ducan Laurence» អាយុ២៥ឆ្នាំ បានច្រៀងបទ «Arcade» ដោយចុចព្យាណូ ធ្វើជាភ្លេងកំដរដោយផ្ទាល់។
ការរៀបចំឈុតឆាករបស់អ្នកចម្រៀងហូឡង់ មានសភាពសាមញ្ញាជាងបេក្ខជនផ្សេងទៀត។ តែផ្ទុយទៅវិញ សម្រាប់អ្នកនិយមសិល្បៈចម្រៀង បានគិតថា លោក «Ducan Laurence» បានបញ្ចូលមនោសញ្ចេតនា នៅក្នុងចម្រៀង និងថែមទាំងបបួលឲ្យអ្នកស្ដាប់សម្លេងលោក ទាំងអំបាលម៉ាន ចូលទៅក្នុងសាច់រឿងនៃចម្រៀងនោះ ជាងនរណាៗទាំងអស់។
នៅក្នុងចំណាត់ថ្នាក់ចុងក្រោយ ប្រទេសហូឡង់បានប្រកៀកប្រកិត ជាមួយនឹងប្រទេសជាច្រើន នៅក្នុងទ្វីបអ៊ឺរ៉ុប ជាពិសេសជាមួយអ៊ីតាលី(លេខ២) និងរ៉ុស្ស៊ី(លេខ៣) ដោយសារពិន្ទុ ដែលបានមកពីការបោះឆ្នោត ដោយប្រិយមិត្តអ្នកទស្សនា ទាំង៤១ប្រទេស បានផ្លាស់ប្ដូរចំណាត់ថ្នាក់ ជាច្រើនដង។
ផ្ទុយទៅវិញ ប្រទេសស្ថាបនិកជាច្រើន នៃមហោស្រពអន្តរជាតិខាងលើ ដែលមានដើមកំណើត តាំងពីដើមទសវត្សន៍ឆ្នាំ៥០ មិនជាទទួលបាន ចំណាត់ល្អប៉ុន្មានទេ។ ដូចយ៉ាង បារាំងជាប់លេខ១៤ អាល្លឺម៉ង់ជាប់លេខ២៤ ខណៈចក្រភពអង់គ្លេស ជាប់លេខ២៦ ចុងក្រោយគេបង្អស់៕
———
ខាងក្រោមនេះ ជាចម្រៀងដដែល តែលោក «Ducan Laurence» បានច្រៀងសារជាថ្មី បន្ទាប់ពីលោកទទួលបានពាន នៅក្នុងដៃរួច៖
