[ផ្លូវការ] ក្រុមបាសា តែងតាំង រ៉ូណល កូម៉ាន់ ជាគ្រូបង្វឹក
ក្រុមបាសឺឡូន (FC Barcelone – អេស្ប៉ាញ) បានប្រកាសជាផ្លូវការ នៅព្រឹកថ្ងៃពុធនេះ តែងតាំងលោក រ៉ូណល កូម៉ាន់ (Ronald Koeman) ជាគ្រូបង្វឹករបស់ក្រុមបាល់ទាត់អាជីពជួរមុខរបស់ខ្លួន។
ការប្រកាសនេះ ធ្វើឡើងពីរថ្ងៃ បន្ទាប់ពីក្រុមអ្នកមានបុណ្យ របស់ប្រទេសអេស្ប៉ាញ បានបញ្ឈប់លោក «Quique Setién» ដែលជាគ្រូបង្វឹកមុន ចេញពីតំណែង កាលពីថ្ងៃចន្ទទី១៧ ខែសីហា ឆ្នាំ២០២០។
លោក រ៉ូណល កូម៉ាន់ ជនជាតិហូឡង់ អាយុ៥៧ឆ្នាំ ធ្លាប់ជាកីឡាកររបស់ក្រុម បាសឺឡូន រវាងពីឆ្នាំ១៩៨៩ មកទល់នឹងឆ្នាំ១៩៩៥។ មុននឹងក្លាយជាគ្រូបង្វឹក របស់ក្រុមអ្នកមានបុណ្យ លោក កូម៉ាន់ គឺជាគ្រូបង្វឹក របស់ក្រុមជម្រើសជាតិហូឡង់។
បើតាមសេចក្ដីប្រកាសព័ត៌មាន របស់ក្រុម បាសា បានឲ្យដឹងថា លោក កូម៉ាន់ បានចុះហត្ថលេខាធ្វើជាគ្រូបង្វឹក របស់ក្រុម សម្រាប់រយៈពេល២ឆ្នាំ (រហូតដល់ថ្ងៃទី៣០ ខែមិថុនា ឆ្នាំ២០២២)។
ក្រុមបាសា នឹងធ្វើសន្និសីទកាសែត បង្ហាញរូបលោក ក្នុងល្ងាចថ្ងៃពុធនេះ ចាប់ពីម៉ោង១៨:០០តទៅ (ម៉ោងក្នុងប្រទេសអេស្ប៉ាញ)។
ការផ្លាស់ប្ដូរគ្រូបង្វឹក មកដឹកនាំក្រុមបាល់ទាត់ របស់ក្រុម បាសឺឡូន ធ្វើឡើងក្នុងក្របខណ្ឌកែទម្រង់ ដ៏ទូលំទូលាយមួយ បន្ទាប់ពីក្រុមនេះ បានទទួលមេរៀនយ៉ាងចាស់ដៃ ពីសំណាក់ក្រុម បាយឺន (Bayern Munich – អាល្លឺម៉ង់)។ ក្នុងការប្រកួតវគ្គ ១/៤ ក្របខណ្ឌដណ្ដើមជើងឯកអ៊ឺរ៉ុប «Champions League» កាលពីថ្ងៃសុក្រសប្ដាហ៍មុន ក្រុមជើងឯកអាល្លឺំម៉ង់ បានលត់ក្រុមអ្នកមានបុណ្យ ដោយគ្រាប់បាល់ ៨គ្រាប់ ទល់នឹង២គ្រាប់។
ក្រៅពីតំណែងគ្រូបង្វឹក ក្រុមបាសានៅបានប្ដូរមេដឹកនាំម្នាក់ទៀត៖ លោក «Ramon Planes» ត្រូវបានតែងតាំង សម្រាប់តំណែងជា«លេខាបច្ចេកទេស» ជំនួសលោក «Éric Abidal» ដែលបានប្រកាសលាឈប់ កាលពីម្សិលម៉ិញ៕
