កីឡា និងបច្ចេកវិទ្យាបាល់ទាត់

ម៉េស៊ី បានសម្រេចចាកចេញ ពីក្រុម​អ្នកមានបុណ្យ

ជាដំណឹងដែលធ្លាក់ចុះមក ដូចផ្ទុះភ្នំភ្លើង ក្នុងពិភពបាល់ទាត់។ កំពូលខ្សែប្រយុទ្ធ កីឡាករ លីយ៉ូនែល ម៉េស៊ី (Lionel Messi) បានសម្រេចចាកចេញ ពីក្រុម​អ្នកមានបុណ្យ (FC Barcelone – អេស្ប៉ាញ) បន្ទាប់ពីបាន​នៅជាមួយក្រុមនេះ តាំងពីឆ្នាំ២០០០មក។

ដំណឹងនៃការសម្រេចចិត្ត របស់កីឡាករម្ចាស់បាល់មាស ៦ជំនាន់ ត្រូវបានបង្ហើបឲ្យដឹង ជាដំបូងឡើង ដោយប្រព័ន្ធទូរទស្សន៍ «TyC Sport» របស់ប្រទេសអាហ្សង់ទីន ដែលជា​មាតុភូមិ​​របស់កំពូលកីឡាករ។ តែទីភ្នាក់ងារព័ត៌មានបារាំង «AFP» បានបញ្ជាក់ពី​ករណី​នេះ នៅបន្តិចក្រោយមក ដោយស្រង់ប្រភពផ្ទាល់ចេញ ពីក្រុម​អ្នកមានបុណ្យ តែម្ដង។

«AFP» បានឲ្យដឹងថា ក្រុមមេធាវីរបស់កីឡាករ ម៉េស៊ី បានបញ្ជូនលិខិតមួយច្បាប់ ទៅឲ្យ​ក្រុមបាសាឡូន ក្នុងថ្ងៃអង្គារនេះ ដើម្បីអនុញ្ញាតឲ្យមានការលប់ចោល នូវកិច្ចសន្យា​របស់​កំពូលខ្សែប្រយុទ្ធ ដូចមានចែង នៅក្នុងកិច្ចសន្យានេះស្រាប់។ ប៉ុន្តែ ក្រុម​អ្នកមានបុណ្យ បានប្រតិកម្មតប​នឹងការសុំចាកចេញនោះ ថាកីឡាករ ម៉េស៊ី នៅជាប់កិច្ចសន្យា រហូត​ដល់​ថ្ងៃទី៣០ ខែមិថុនា ឆ្នាំ២០២១ខាងមុខ។

សារព័ត៌មានកីឡា «MARCA» របស់ប្រទេសអេស្ប៉ាញ បានអះអាងបន្ថែមថា ការទាមទារ​ឲ្យលប់​កិច្ចសន្យា ដែលធ្វើឡើងដោយ​ក្រុមមេធាវី​របស់កីឡាករ ទំនងជា​ត្រូវ​ក្រុម​បាសាឡូន​បដិសេធ តែអាចជាជំហាន ឈានទៅចរចា ឲ្យមានការចាកចេញ ដោយបង់​ប្រាក់​រម្លស់​តិចជាងទំហំទឹកប្រាក់ ៧០០លានអ៊ឺរ៉ូ ដែលមានចែងក្នុងកិច្ចសន្យា ក្នុងករណីកីឡាករ ចង់ចាកចេញពីក្រុម។

ការចាកចេញ របស់កីឡាករ ម៉េស៊ី អាចជាវិបត្តិដ៏ធំមួយទៀត បន្ថែមឲ្យក្រុម​អ្នកមាន​បុណ្យ បន្ទាប់ពីក្រុមនេះ រងការវាយបំបាក់មុខ ដោយក្រុមបាយ៉ឺន (Bayern Munich – អាល្លឺម៉ង់) ក្នុងពិន្ទុ ២-៨ ក្នុង​ការប្រកួតវគ្គ១/៤ ក្របខណ្ឌ«Champions League» កាលពីប៉ុន្មានសប្ដាហ៍មុន។

បន្ទាប់ពីបរាជ័យដ៏ជូចត់នោះមក ក្រុមបាសាឡូន បានបណ្ដេញគ្រូបង្វឹកមុន​ចេញ​ពីតំណែង ហើយបានតែងតាំងលោក រ៉ូណល កូម៉ាន់ (Ronald Koeman) ឲ្យឡើងកាន់​តំណែង ជាគ្រូបង្វឹកថ្មី។ លោក កូម៉ាន់ ជនជាតិហូឡង់ ក៏ធ្លាប់ជាកីឡាករ របស់ក្រុមបាសាដែរ រវាងពីឆ្នាំ១​៩៨៩ មកទល់នឹងឆ្នាំ១៩៩៥។

បើតាមសារព័ត៌មាន ក្នុងប្រទេសអេស្ប៉ាញ បានឲ្យដឹងទៀតថា ការសុំចាកចេញ​របស់​កីឡាករ ម៉េស៊ី ទំនងជាកំពូលកីឡាកររូបនេះ គ្មានសង្ឃឹម​ចំពោះគម្រោង​របស់លោក កូម៉ាន់ ដែល​គ្រោងដកខ្សែប្រយុទ្ធ កីឡាករ ល្វីស ស្វារ៉េស (Luis Suarez) ចេញពីប្លង់​បាល់ទាត់​របស់លោក៕



You may also like

កីឡា និងបច្ចេកវិទ្យា

[ផ្លូវការ] ក្រុមអ្នកមានបុណ្យ បញ្ឈប់គ្រូបង្វឹក «Setién»

ប៉ុន្មានថ្ងៃក្រោយការបាក់មុខ នៅក្នុងក្របខណ្ឌ «Champions League» ក្រុមបាសឺឡូន (FC Barcelone – អេស្ប៉ាញ) បានបញ្ឈប់គ្រូបង្វឹក «Quique Setién» នៅល្ងាច​ថ្ងៃចន្ទ​ទី១៧ ...
កីឡា និងបច្ចេកវិទ្យា

កីឡាករ​ឆ្នើមបំផុត ​ក្នុង​«Euro 2020» ចុះកិច្ចសន្យាលេងឲ្យ​​ក្រុមប៉ារីស

អ្នកចាំទីជាតិអ៊ីតាលី កីឡាករ«Gianluigi Donnarumma» ដែលត្រូវបានជ្រើសតាំង ជា«កីឡាករ​ឆ្នើមបំផុត» ក្នុង​ព្រឹត្តិការណ៍ដណ្ដើមពាន​«Euro 2020» ក្នុងប៉ុន្មានសប្ដាហ៍កន្លងមក បានចុះកិច្ចសន្យា​មានរយៈពេល៥ឆ្នាំ ដើម្បី​លេងឲ្យក្រុមបាល់ទាត់​យក្សបារាំង នៅថ្ងៃពុធទី១៤ ខែកក្កដា ឆ្នាំ២០២១នេះ។ ...
កីឡា និងបច្ចេកវិទ្យា

ក្រុម​លីវើភូល ​បំបាក់​អ្នកមានបុណ្យ ៤-០ ហើយ​ឡើងទៅ​ផ្ដាច់ព្រ័ត្រ

ក្រុម​លីវើភូល (Leverpool FC – អង់គ្លេស) បានប្រកួតចាញ់ក្រុមបាសឺឡូន (Barcelone FC – អេស្ប៉ាញ) ក្នុងពិន្ទុ ០-៣ កាលពីសប្ដាហ៍មុន ...

Comments are closed.

កីឡា និងបច្ចេកវិទ្យា

ថើបមាត់ ៖ ក្រុមកីឡាការិនី​ផ្អាកលេង​​បើប្រធានសហព័ន្ធ​មិនលាឈប់

កីឡា និងបច្ចេកវិទ្យា

FIFA ប្រកាសបើក​«នីតិវិធីវិន័យ»​ប្រឆាំងប្រធានសហព័ន្ធ​អេស្ប៉ាញ

សហព័ន្ធបាល់ទាត់អន្តរជាតិ «FIFA» បានប្រកាសបើក«នីតិវិធីវិន័យ»​ទៅលើលោក Luis Rubiales ប្រធានសហព័ន្ធបាល់ទាត់អេស្ប៉ាញ ជុំវិញការចាប់ឱប-ថើបមាត់​កីឡាការិនី Jennifer Hermoso ខ្សែប្រយុទ្ធរបស់ក្រុមជម្រើសជាតិអេស្ប៉ាញ ផ្នែកស្ត្រី បន្ទាប់ពីក្រុមកីឡាការិនីទាំងនេះ បានប្រកួតឈ្នះក្រុមអង់គ្លេស ...
កីឡា និងបច្ចេកវិទ្យា

បាល់ទាត់​ពិភពលោក​ផ្នែកស្ត្រី ៖ អេស្ប៉ាញ​ឈ្នះអង់គ្លេស​និងលើកពានដំបូង

ប្រទេសអេស្ប៉ាញ បានលើកពាន«បាល់ទាត់​ពិភពលោក​ផ្នែកស្ត្រី» ជាលើកដំបូង នៅក្នុងប្រវត្តិបាល់ទាត់របស់ខ្លួន បន្ទាប់បានបំបាក់ក្រុមបាល់ទាត់ជម្រើសជាតិផ្នែកស្ត្រី របស់ប្រទេសអង់គ្លេស ដោយពិន្ទុ១-០ ក្នុងការប្រកួតផ្ដាច់ព្រ័ត្រ នៅល្ងាច​ថ្ងៃអាទិត្យទី២០ ខែសីហា ឆ្នាំ២០២៣នេះ នាកីឡដ្ឋាន«Australia stadium» ...