កីឡា និងបច្ចេកវិទ្យាបាល់ទាត់

ហង្សក្រហម​ឈ្នះ​ពាន​«ត្រចៀកធំ»​ឆ្នាំ២០១៩ បន្ទាប់ពី​រង់ចាំ​«១៤ឆ្នាំ»

ក្រុមហង្សក្រហម បានរង់ចាំអស់«១៤ឆ្នាំ»ហើយ ពោលរាប់ចាប់ពីបានឈ្នះលើកមុន ក្នុងឆ្នាំ២០០៤! ក្រុមលីវើភូល (Liverpool FC – អង់គ្លេស) បានព្យាយាមយកជ័យជំនះ ពីឆ្នាំទៅម៉ិញដែរ តែក្នុងវគ្គផ្ដាច់ព្រ័ត្រពេលនោះ ក្រុមហង្សក្រហមបានចាញ់ក្រោមថ្វីជើង របស់ក្រុមរៀលម៉ាឌ្រីត (Real Madrid – អេស្ប៉ាញ) ដោយពិន្ទុ ១-៣។

តែនៅឆ្នាំនេះ ទល់នឹងក្រុម ថូថែនហាម (Tottenham FC – អង់គ្លេស) ក្រុមហង្សក្រហមដែលរៀបចំការប្រកួត បានយ៉ាងល្អតាំងពីនាទីដំបូង និងខិតខំការពាររហូតដល់នាទីចុងក្រោយ បានយកឈ្នះក្នុងពិន្ទុ ២-០ ក្នុងការប្រកួតផ្ដាច់ព្រ័ត្រ ក្របខណ្ឌ​«Champions League»​ដែលប្រព្រឹត្តិទៅក្នុងយប់ថ្ងៃសៅរ៍នេះ នៅកីឡដ្ឋាន «Metropolitano» នៃរាជធានីម៉ាឌ្រីត ប្រទេសអេស្ប៉ាញ។ 

គ្រាន់តែចាប់ផ្ដើមប្រកួត បានប៉ុន្មាននាទីដំបូង ក្រុមលីវើភូល បានវាយសន្ធាប់ភ្លាម និងរកបានគ្រាប់បាល់ពិន័យ ១១ម៉ែត្របាន នៅនាទីទី២ ទាត់បញ្ចូលទីដោយខ្សែប្រយុទ្ធជាតិអេហ្សីព កីឡាករ មហាមេដ សាឡាហ៍ (Mohamed Salah)។

បន្ទាប់មក នៅពាក់កណ្ដាលម៉ោងដំបូង គេត្រូវនិយាយពីការប្រកួត ដែលគ្មានព្រលឹង គ្មានការរៀបចំ ពីសំណាក់ក្រុមថូថែមហាម ដែលធ្វើឲ្យក្រុមមួយនេះ មិនបានបង្កគ្រោះអ្វីសោះ សម្រាប់ក្រុមហង្សក្រហម។

លុះចូលមកពាក់កណ្ដាលម៉ោងទី២ ទើបក្រុមស្ពៀរ (Spur) រៀបចំក្រឡាបាល់បានប្រសើរជាងមុន ហើយធ្វើការវាយសន្ធាប់ ជាច្រើនដង សំដៅដណ្ដើមគ្រាប់បាល់ ស្មើមកវិញ។ តែនៅចំពោះកីឡាករចាំទី ជាតិប្រេស៊ីលដ៏កំពូល កីឡាករ អាលីសុន បេគ័រ (Alisson Becker) គ្រាប់បាល់ទាំងនោះ មិនបានធ្វើឲ្យសំណាញ់ទីលីវើភូល រង្គើសូម្បីបន្តិចឡើយ។

រហូតដល់ជិតចុងបញ្ចប់នៃការប្រកួត គឺខ្សែប្រយុទ្ធជាតិប៊ែលហ្សិក កីឡាករ ឌីវ៉ក អូរីជី (Divock Origi) របស់ក្រុមហង្សក្រហម បានបិទបញ្ចប់ក្ដីសុបិន្តរបស់ក្រុមស្ពៀរ ជាស្ថាពរ ដោយដាក់បន្ថែមមួយគ្រាប់ទៀត នៅនាទីទី៨៧។

រាប់ទាំងឆ្នាំនេះ ក្រុមលីវើភូលឈ្នះបានពាន «ត្រជៀកធំ» ខ្នាតអ៊ឺរ៉ុបដូច្នេះ បាន៦លើកហើយ គឺនៅឆ្នាំ១៩៧៧ ១៩៧៨ ១៩៨១ ១៩៨៤ ២០០៥ និងឆ្នាំនេះ ២០១៩។ ចំនួនពានទាំង៦នេះ បានធ្វើឲ្យក្រុមនេះឈរ នៅលេខរៀងទី៣ បន្ទាប់ពីក្រុមរៀលម៉ាឌ្រីត ដែលឈ្នះបាន១៣លើក និងក្រុមអាសេមីឡង់ (AC Milan – អ៊ីតាលី) ដែលឈ្នះបាន៧លើក។

ចំណែកក្រុមស្ពៀរវិញ មិនដែលឈ្នះបានម្ដងណាទេ ហើយការឡើង មកដល់វគ្គផ្ដាច់ព្រ័ត្រ ក្នុងឆ្នាំនេះ ក៏ជាលើកដំបូង នៃប្រវត្តិសាស្ត្ររបស់ក្រុមដែរ៕



You may also like

កីឡា និងបច្ចេកវិទ្យា

សារព័ត៌មាន​អ៊ីតាលី លត់​ក្រុម​សេះបង្កង់ ក្រោយ​ប្រកួត​ចាញ់ លីយ៉ុង

CHAMPIONS LEAGUE 2020៖ មួយថ្ងៃក្រោយប្រកួតចាញ់ ក្រុម លីយ៉ុង (Olympique Lyonais – បារាំង) ដោយពិន្ទុ ១-០ សារព័ត៌មានក្នុងប្រទេសអ៊ីតាលី ...
កីឡា និងបច្ចេកវិទ្យា

Champions League៖ ក្រុម​ខ្លាំងៗ​បះ​គ្នា ក្នុង​វគ្គ១ភាគ៨

ក្របខណ្ឌដណ្ដើមពានអ៊ឺរ៉ុប (Champions League) ៖ ការចាប់ឆ្នោត សម្រាប់រកដៃគូប្រកួត គ្នុងវគ្គ១ភាគ៨ផ្ដាច់ព្រ័ត្រ (ឬវគ្គ១៦ក្រុម) ក្នុងថ្ងៃចន្ទទី១៧ ខែធ្នូ ឆ្នាំ២០១៨នេះ នាក្រុង «Nyon» ...
កីឡា និងបច្ចេកវិទ្យា

មេនស៊ីធី លត់ សាលកេ០៤ យ៉ាង​ជូរចត់ និងដើរឆ្លងវគ្គយ៉ាងងាយ

ក្រុមមេនឆេស្ទ័រស៊ីធី (Manchester City – អង់គ្លេស) ខ្លាំងជាក្រុម សាលកេ០៤ (Schalke 04 – អាល្លឺម៉ង់) ឆ្ងាយណាស់។ ក្រុមបាល់ទាត់ ...

Comments are closed.

កីឡា និងបច្ចេកវិទ្យា

ថើបមាត់ ៖ ក្រុមកីឡាការិនី​ផ្អាកលេង​​បើប្រធានសហព័ន្ធ​មិនលាឈប់

កីឡា និងបច្ចេកវិទ្យា

FIFA ប្រកាសបើក​«នីតិវិធីវិន័យ»​ប្រឆាំងប្រធានសហព័ន្ធ​អេស្ប៉ាញ

សហព័ន្ធបាល់ទាត់អន្តរជាតិ «FIFA» បានប្រកាសបើក«នីតិវិធីវិន័យ»​ទៅលើលោក Luis Rubiales ប្រធានសហព័ន្ធបាល់ទាត់អេស្ប៉ាញ ជុំវិញការចាប់ឱប-ថើបមាត់​កីឡាការិនី Jennifer Hermoso ខ្សែប្រយុទ្ធរបស់ក្រុមជម្រើសជាតិអេស្ប៉ាញ ផ្នែកស្ត្រី បន្ទាប់ពីក្រុមកីឡាការិនីទាំងនេះ បានប្រកួតឈ្នះក្រុមអង់គ្លេស ...
កីឡា និងបច្ចេកវិទ្យា

បាល់ទាត់​ពិភពលោក​ផ្នែកស្ត្រី ៖ អេស្ប៉ាញ​ឈ្នះអង់គ្លេស​និងលើកពានដំបូង

ប្រទេសអេស្ប៉ាញ បានលើកពាន«បាល់ទាត់​ពិភពលោក​ផ្នែកស្ត្រី» ជាលើកដំបូង នៅក្នុងប្រវត្តិបាល់ទាត់របស់ខ្លួន បន្ទាប់បានបំបាក់ក្រុមបាល់ទាត់ជម្រើសជាតិផ្នែកស្ត្រី របស់ប្រទេសអង់គ្លេស ដោយពិន្ទុ១-០ ក្នុងការប្រកួតផ្ដាច់ព្រ័ត្រ នៅល្ងាច​ថ្ងៃអាទិត្យទី២០ ខែសីហា ឆ្នាំ២០២៣នេះ នាកីឡដ្ឋាន«Australia stadium» ...