ក្រុមសេះបង្កង់ នៃប្រទេសអ៊ីតាលី ដែលមានខ្សែប្រយុទ្ធដ៏ល្បី កីឡាករ គ្រីស្ទាណូ រ៉ូណាល់ដូ (Cristiano Ronaldo) ត្រូវបានជម្រុះចេញជាស្ថាពរ ពីការប្រកួតក្របខណ្ឌ«Champions League» បើទោះជាបានប្រកួតឈ្នះ លើក្រុមនាគខៀវ ព័រតូ (FC Porto ព័រទុយហ្គាល់) ក្នុងការប្រកួតជុំទី២ វគ្គ១/៨ផ្ដាច់ព្រ័ត្រ យប់ថ្ងៃអង្គារនេះក្ដី។
បើប្រកួតឈ្នះ ហេតុអ្វីក៏ត្រូវហាលអាវ?
ព្រោះលទ្ធផលដែលរកបាន ក្នុងការប្រកួតជុំទី២ ដោយគ្រាប់បាល់ ៣-២ ត្រូវយកទៅបូកជាមួយលទ្ធផលនៃការប្រកួតជុំទី១ ដោយគ្រាប់បាល់ ១-២ ដែលធ្វើឲ្យចំនួនគ្រាប់បាល់សរុប ៤-៤ ពោលគឺស្មើទាំងសងខាង។ តែដូចក្នុងលក្ខន្តិករបស់សហភាពបាល់ទាត់អ៊ឺរ៉ុប (UEFA) ដែលមានចែងស្រាប់ ក្រុម ព័រតូ បានឆ្លងវគ្គទៅកាន់វគ្គ១/៤ (ឬវគ្គ៨ក្រុម) ព្រោះក្រុមនេះរកបានគ្រាប់បាល់ នៅក្រៅផ្ទះបានច្រើនជាងក្រុម ជូវេនទូស។
មិនខុសពីក្រុម ដ័រមូន ដែលបានឆ្លងវគ្គដែរ ក្នុងការប្រកួតមួយទៀត ក្រុមនាគខៀវ ព័រតូ ត្រូវរង់ចាំរហូតដល់ការប្រកួតជុំទី២ (រវាងក្រុមទាំង១២ផ្សេងទៀត) បញ្ចប់រួចរាល់ នៅសប្ដាហ៍ខាងមុខ ទើបក្រុមនេះអាចដឹងពីគូប្រកួតរបស់ខ្លួន តាមរយៈការចាប់ឆ្នោត ដែលជាការរៀបចំ របស់សហភាពបាល់ទាត់អ៊ឺរ៉ុប៕
