មេដឹកនាំបក្សប្រឆាំង លោក រ៉ន់ ហ្គេដូ (Juan Guaidó) កំពុងជាប់ ក្នុងសំនុំរឿងដ៏ប្រទាំងប្រទើសថ្មីមួយ បន្ទាប់ពីសារព័ត៌មាន វ៉ាស៊ីនតោនប៉ុស្ដិ៍ (Washington Post) បានរកឃើញថា មនុស្សជំនិតរបស់លោក ហ្គេដូ បានចុះហត្ថលេខា ក្នុងកម្រិតទឹកប្រាក់ ២១៣លានដុល្លារ ជាមួយប្រធានក្រុមហ៊ុនមួយ ឈ្មោះ «SilverCorp» ដើម្បីបើកការវាយប្រហារ តាមផ្លូវសមុទ្រ ទៅលើប្រទេស វេណេហ្សុយអេឡា។
កាលពីដើមសប្ដាហ៍ កន្លងមកនេះ ក្រុមមនុស្សស្និតនឹងលោក រ៉ន់ ហ្គេដូ បានចេញមុខបដិសេធ ថាពួកខ្លួនមិនបានទាក់ទង ឬជួបជាមួយលោក «Jordan Goudreau» ប្រធានក្រុមហ៊ុន «SilverCorp» នោះទេ។
តែបើតាមរបាយការណ៍អង្កេត របស់សារព័ត៌មាន វ៉ាស៊ីនតោនប៉ុស្ដិ៍ បានរកឃើញភស្ដុតាង ថាមិនត្រឹមតែសមាជិកក្រុមប្រឆាំង បានចុះហត្ថលេខា ជាមួយក្រុមហ៊ុនសន្តិសុខអាមេរិកខាងលើ កាលពីខែតុលា ឆ្នាំ២០១៩នោះទេ តែបើសូម្បីលោក រ៉ន់ ហ្គេដូ ខ្លួនលោក ដ៏ដឹងរឿងនេះដែរ។
លោក «Jordan Goudreau» ជាអតីតទាហានមួកបៃតង របស់សហរដ្ឋអាមេរិក។ លោកបានចាកចេញពីកងទ័ព និងបានទៅបង្កើត ក្រុមហ៊ុន «SilverCorp» កាលពីឆ្នាំ២០១៨ ដែលមានទីស្នាក់ការ ក្នុងរដ្ឋផ្លរីដា (ភាគអាគ្នេយ៍សហរដ្ឋអាមេរិក)។
សារព័ត៌មានបញ្ជាក់ទៀតថា គឺក្រុមហ៊ុន «SilverCorp» មួយនេះហើយ ដែលបានរៀបចំ ការប៉ុនប៉ងវាយប្រហារ តាមផ្លូវសមុទ្រ ទៅលើប្រទេសវេណេហ៊ុយអេឡា កាលពីថ្ងៃទី ៣ ខែឧសភាកន្លងទៅ។ តែការប៉ុនប៉ងនោះ បានទទួលបរាជ័យ និងទទួលរងការវាយទប់ស្កាត់វិញ រហូតបណ្ដាលឲ្យមាន មនុស្ស៨នាក់ស្លាប់ និងមនុស្ស៣១នាក់ទៀត ត្រូវបានចាប់ខ្លួន ក្នុងនោះ២នាក់ ជាជនជាតិអាមេរិក។
សម្រាប់លោក «Jorge Rodriguez» រដ្ឋមន្ត្រីឃោសនាការ និងជាមនុស្សជំនិត របស់លោក នីកូឡា ម៉ាឌូរ៉ូ (Nicolas Maduro) ប្រធានាធិបតីក្នុងតំណែង របស់ប្រទេសវេណេហ្ស៊ុយអេឡា បានសម្ដែងការភ្ញាក់ផ្អើល ថាវា គឺជាការខ្មាសអៀនមួយ។ លោកថ្លែងឡើងថា៖
«តើក្រុមមនុស្សទាំងនេះ អាចមានលទ្ធភាព យ៉ាងដូម្ដេច ក្នុងការចុះហត្ថលេខា នៅលើក្រដាសមួយ បញ្ជាឲ្យសម្លាប់ប្រធានាធិបតី នៃសាធារណរដ្ឋ – បញ្ជាឲ្យសម្លាប់ ឧត្ដមសេនីយយោធាជាន់ខ្ពស់ និងអ្នកទទួលខុសត្រូវ ផ្នែកនយោបាយច្រើននាក់ – បញ្ជាឲ្យកងទ័ពវេណេហ្ស៊ុយអេឡា ត្រូវទម្លាក់អាវុធចុះ នៅចំពោះទាហានបរទេស ដូចយ៉ាងលោក “Jordan Goudreau”? តើរឿងនេះ អាចកើតឡើងបាន យ៉ាងដូម្ដេច?»
«វ៉ាស៊ីនតោនប៉ុស្ដិ៍» បានអះអាងទៀតថា ដោយសង្ស័យពីសមត្ថភាព របស់លោក «Jordan Goudreau» ក្នុងការរៀបចំការវាយលុក និងការបញ្ជា កងកម្លាំងស៊ីឈ្នួល នោះ ក្រុមប្រឆាំងបានសម្រេចផ្អាកគម្រោងនោះវិញ តាំងពីខែវិច្ឆិកា ឆ្នាំ២០១៩។
ប៉ុន្តែគឺប្រធានក្រុមហ៊ុន «SilverCorp» ខ្លួនឯង ដែលនៅតែបន្តធ្វើគម្រោងនេះ ដើម្បីអាចទាមទារ នៅថ្ងៃនេះ នូវទឹកប្រាក់ប្រមាណជា ១,៥លានដុល្លារ ដែលក្រុមប្រឆាំងបានសន្យា ថានឹងប្រគល់ជូន ជាប្រាក់ធានាដំបូង៕
