ក្រៅពីរំជួលហឫទ័យ និងចូលរួមរំលែកទុក្ខ ជាមួយរាស្ត្រដែលកំពុងរងគ្រោះ ព្រោះគ្រោះទឹកជំនន់ ព្រះមហាក្សត្រកម្ពុជា ព្រះបាទ នរោត្តម សីហមុនី នៅមានព្រះរាជបន្ទូល«សរសើរ»លោក ហ៊ុន សែន នូវអ្វីមួយ ដែលទ្រង់មានបន្ទូលថា ជា«ភាពឈ្លាសវៃ»របស់នាយករដ្ឋមន្ត្រីកម្ពុជា ក្នុងការដោះស្រាយគ្រោះធម្មជាតិ ដ៏ធ្ងន់ធ្ងរមួយនេះ។
ព្រះរាជសាររបស់ព្រះមហាក្សត្រ នរោត្ដម សីហមុនី ចុះថ្ងៃទី១៦ ខែតុលា ឆ្នាំ២០២០នេះ បានឲ្យដឹងថា៖
«ខ្ញុំសូមចូលរួមរំលែកទុក្ខលំបាក ជាមួយបងប្អូនប្រជារាស្ត្រ នៅទូទាំងប្រទេស។ ខ្ញុំសូមកោតសរសើរ នូវភាពឈ្លាសវៃ និងសូមថ្លែងអំណរគុណ ដ៏ជ្រាលជ្រៅ ចំពោះសម្តេចអគ្គមហាសេនាបតីតេជោ នាយករដ្ឋមន្ត្រី នៃព្រះរាជាណាចក្រកម្ពុជា ដែលមានវិធានការ ជួយដោះស្រាយទាន់ពេលវេលា ជម្លៀសបងប្អូនប្រជាពលរដ្ឋ ចេញពីតំបន់រងគ្រោះ ទៅកាន់ទីតាំងសុវត្ថិភាពនានា។»
ក្នុងព្រះរាជសារដដែល ព្រះរាជាកម្ពុជាដែលមានព្រះជន្ម៦៧ឆ្នាំ បានមានព្រះបន្ទូលថា ព្រះអង្គក៏បានប្រទានព្រះរាជអំណោយ ជាបន្តបន្ទាប់ដែរ ជូនដល់រាស្ត្ររងគ្រោះមួយចំនួន តែព្រះរាជអំណោយនោះ ធ្វើឡើងតាមរយៈ លោក គង់ សំអុល រដ្ឋមន្ត្រីក្រសួងព្រះបរមរាជវាំង។
គណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងថា គិតត្រឹមរសៀលថ្ងៃអង្គារទី១០ ខែតុលា បានឲ្យដឹងថា គ្រោះទឹកជំនន់ដ៏ធំក្នុងឆ្នាំ២០២០នេះ ដែលមិនធ្លាប់កើតមាន បានសម្លាប់ពលរដ្ឋកម្ពុជា ចំនួន១១នាក់ និងបានបង្កផលប៉ះពាល់ ទៅលើពលរដ្ឋ ចំនួនយ៉ាងហោច ៣ម៉ឺនគ្រួសារ ក្នុងនោះមាន ២ពាន់គ្រួសារ ត្រូវជម្លៀសចេញពីគេហដ្ឋាន៕
