បន្ទាប់ពីប្រកាសផ្ដល់ម៉ាស់«២លាន» សម្រាប់ពលរដ្ឋក្នុងរាជធានី កាលពីប៉ុន្មានថ្ងៃមុនរួច លោក ហ៊ុន សែន បានសម្រេចបញ្ចេញម៉ាស់«២លាន»បន្ថែមទៀត សម្រាប់ចែកជូនពលរដ្ឋ នៅក្នុងខែត្រសៀមរាប (១លានម៉ាស់) និងនៅក្នុងរាជធានីភ្នំពេញ (១លានម៉ាស់)។ នេះ បើតាមរបាយការណ៍ខ្លីមួយ ដែលផ្សាយដោយប្រព័ន្ធឃោសនា របស់របបក្រុងភ្នំពេញ។
២លាន … និង៥លានជាង
ចំនួនម៉ាស់ ទាំងពេលមុន និងពេលនេះ មានចំនួនសរុប៤លាន ដែលលោក ហ៊ុន សែន សម្រេចចែកឲ្យពលរដ្ឋកម្ពុជា។
ក្នុងខែវិច្ឆិកាកន្លងមក លោក ហ៊ុន សែន បានធ្វើអំណោយជាម៉ាស់ ចំនួន៤លានម៉ាស់ ទៅឲ្យប្រទេសឡាវ និងប្រទេសភូមា ខណៈជំងឺរាតត្បាតកូវីដ-១៩ (Covid-19) កំពុងបន្តឆ្លង ក្នុងរលកទី២ និងទី៣ នៅជុំវិញពិភពលោកនៅឡើយ។
ម៉ាស់ចំនួន១លាន៥ម៉ឺនទៀត ក៏នឹងត្រូវរដ្ឋាភិបាលលោក ហ៊ុន សែន ដឹកបញ្ជូន ទៅឲ្យប្រទេសទីម័រខាងកើត នៅក្នុងថ្ងៃពុធទី២ ខែធ្នូ ឆ្នាំ២០២០នេះដែរ។
ពលរដ្ឋមួយចំនួន រស់នៅក្នុងរាជធានីភ្នំពេញ ដែលទស្សនាវដ្ដីមនោរម្យ.អាំងហ្វូ បានជួបសម្ភាសជាមួយ បានអះអាងថា ពួកគេដែលមានជីវភាពខ្សត់ខ្សោយ មិនដែលទទួលបានម៉ាស់ សូម្បីតែមួយ ពីរដ្ឋាភិបាលលោក ហ៊ុន សែន នោះឡើយ។
១៧នាក់ឆ្លងក្នុងសហគមន៍
អាជ្ញាធរសុខាភិបាលកម្ពុជា បានអះអាងថា គិតមកដល់ថ្ងៃអង្គារទី១ ខែធ្នូ ឆ្នាំ២០២១នេះ មនុស្ស១៧នាក់ត្រូវបានធ្វើតេស្ដិ៍ បង្ហាញលទ្ធផលឃើញឆ្លងជំងឺកូវីដ១៩ បន្ទាប់ពីកម្ពុជាទទួលស្គាល់ ពីករណីឆ្លងក្នុងសហគមន៍លើកដំបូង កាលពីថ្ងៃសៅរ៍ចុងសប្ដាហ៍មុន។ ពលរដ្ឋជាច្រើនពាន់នាក់ ត្រូវបានដាក់ឲ្យធ្វើចត្តាឡីស័ក ខណៈអាជ្ញាធរកំពុងបន្តធ្វើតេស្ដិ៍ ដើម្បីស្វែងរកករណីឆ្លងជំងឺនេះ ជាច្រើនពាន់នាក់បន្តទៀត៕
