វីល្លៀម គ័ង – ជម្លោះដីធ្លីដ៏រ៉ាំរ៉ៃ របស់អ្នកភូមិគាស់ក្រឡ ត្រូវបានលោក ហ៊ុន សែន សម្រេចឲ្យសើរើឡើងវិញ នៅសប្ដាហ៍នេះ ដោយចាត់លោក ជា សុផារ៉ា រដ្ឋមន្ត្រីក្រសួងដែនដី នគរូបនីយកម្ម និងសំណង់ ឲ្យចុះទៅដោះស្រាយ ដើម្បីរក«យុត្តិធម៌ជូនជនរងគ្រោះ»។
សំនុំរឿងខាងលើ ដែលបានកើតឡើង តាំងពីជាង១០ឆ្នាំ បានបន្តមានរហូតមកដល់សព្វថ្ងៃ បើទោះជាហេតុការណ៍ ត្រូវបានសារព័ត៌មានចុះផ្សាយ ជាបន្តបន្ទាប់ រួមនឹងការតវ៉ា ពីសំណាក់ប្រជាពលរដ្ឋ ទាំងនៅផ្ទាល់កន្លែង ឬមកដល់រាជធានភ្នំពេញក្ដី។
ផ្ទុយទៅវិញ លោក ហ៊ុន សែន ទើបនឹងចារជាចំណារ បញ្ជាឲ្យរសើរើសំនុំរឿងនេះ បន្ទាប់ពីមានការស្នើ ពីលោក សុខសុវណ្ណ វឌ្ឍនាសាប៊ុង ហៅ «William Guang (វីល្លៀម គ័ង)» ប្រធានគណបក្សខ្មែរក្រោក និងជាសមាជិកឧត្ដមក្រុមប្រឹក្សាពិគ្រោះយោបល់ ស្ថាប័នបង្កើតឡើង ដោយលោក ហ៊ុន សែន ខ្លួនលោក នៅដើមអាណត្តិនេះ។
ចំណាររបស់លោក ហ៊ុន សែន ត្រូវបានយោង នៅក្នុងលិខិត «ស.ជ.ណ» របស់ទីស្តីការគណៈរដ្ឋមន្ត្រី ចុះថ្ងៃទី៣១ ខែកក្តដា ឆ្នាំ២០១៩ លេខ១០៩០ ស.ជ.ណ ក្នុងការបញ្ជាឲ្យលោក ជា សុផារ៉ា ដែលមានតំណែងមួយទៀត ជាប្រធានអាជ្ញាធរជាតិដោះស្រាយទំនាស់ដីធ្លី ទទួលបន្ទុកដោះស្រាយករណី ទំនាស់ដីធ្លីខាងលើ។
លិខិត«ស.ជ.ណ» បានសរសេរថា៖
«ករណីទំនាស់ដីធ្លី ជាមួយនឹងការបំភ្លៃអង្គហេតុ ដើម្បីឃុំខ្លួន និងការធ្វើទារុណកម្ម លើបុគ្គល ស្ថិតនៅភូមិសាស្ដ្រ ឃុំព្រះផុស ស្រុកគាស់ក្រឡ ខេត្តបាត់ដំបង ដែលបានលើកឡើង ដោយប្រធានប្រតិភូគណបក្សខ្មែរក្រោក រាជរដ្ឋាភិបាលឯកភាពប្រគល់ជូនអាជ្ញាធរជាតិ ដើម្បីដោះស្រាយទំនាស់ដីធ្លីពិនិត្យដោះស្រាយ»។
«ទេវតា វីល្លៀម គ័ង ?»
តាំងពីដើមខែឧសភាមក លោក សុខសុវណ្ណ វឌ្ឍនាសាប៊ុង ដែលដាក់រហស្សនាមខ្លួន នៅលើហ្វេសប៊ុក «William Guang» បានបង្ហោះរូបភាពជាបន្តបន្ទាប់ បង្ហាញពីសកម្មភាពខ្លួន រួមនឹងរូបថតមួយចំនួនទៀត បង្ហាញពីភាពរងគ្រោះ របស់ពលរដ្ឋ នៅក្នុងតំបន់ជម្លោះ។
រូបថតខ្លះ បានបង្ហាញពីស្ត្រីមួយចំនួន ដែលហាក់កំពុងព្យាបាល នៅក្នុងមន្ទីរពេទ្យ តែត្រូវបានចងច្រវ៉ាក់ជើង ចាក់សោរភ្ជាប់ទៅនឹងគ្រែដែក។ ការបង្ហោះនោះ ទទួលបានចែករំលែក ដល់ទៅជាង៥ពាន់ដង នៅលើបណ្ដាញសង្គម។
អមនឹងរូបភាពទាំងនោះ លោកប្រធានគណបក្សខ្មែរក្រោក បានសរសេរឡើងថា៖
«ករណីនេះ ទីបំផុតសំណុំរឿង បានធ្លាក់ដល់ដៃខ្ញុំហេីយ ក្រោយជនរងគ្រោះស្រវ៉េស្រវ៉ា រត់រកអោយខ្ញុំជួយ ខណៈជនរងគ្រោះ ត្រូវបានគេរំលោភដី ព្យាបាទផ្លូវចិត្ត រត់រកយុត្តិធម៌គ្រប់ជាន់ថ្នាក់ តែគ្មានពន្លឺ ថ្នាក់លេីអាណិត ថ្នាក់ជាតិខំជួយ ថ្នាក់ក្រោមភូតភឃុបឃិត បិទបាំង ជួយអ្នកមានអំណាច មិនខ្វល់ទឹកភ្នែកអ្នកក្រ៕»
