Covid-19៖ កម្ពុជាឈានដល់វគ្គ… ប្រាក់បៀវត្សបរិច្ចាគ
បន្ទាប់ពីវគ្គប្រាក់ជំនួយឧបត្ថម្ភ ពីសំណាក់ក្រុមអ្នកមានទ្រព្យធន ឬឧកញ៉ា ពេលនេះប្រទេសកម្ពុជាបានឈាន មកដល់វគ្គ «ប្រាក់បៀវត្សបរិច្ចាគ» ពីសំណាក់ក្រុមមន្ត្រីគ្រាក់ៗម្ដង។ ព្រះរាជាណាចក្របានឆ្លងកាត់វគ្គ និងដំណាក់កាលច្រើនយ៉ាងនេះ បើទោះជានាយករដ្ឋមន្ត្រី លោក ហ៊ុន សែន ធ្លាប់ប្រកាសថា កម្ពុជាបានត្រៀមបម្រុងប្រាក់ យ៉ាងហោច៨០០លានដុល្លារ និងរហូតដល់២០០០លានដុល្លារ ដើម្បីទប់ទល់នឹងវិបត្តិជំងឺ «Covid-19» នេះក្ដី។
ការប្រកាសពីប្រាក់ត្រៀមបម្រុងនោះ ធ្វើឡើងកាលពីថ្ងៃទី១០ ខែមីនា កន្លងទៅ ក្នុងពិធីចែកសញ្ញាប័ត្រ ដល់ក្រុមនិស្សិតច្រើនពាន់នាក់ នៃគ្រឹស្ថានសិក្សាឯកជនមួយកន្លែង។ លោក ហ៊ុន សែន បានថ្លែងឡើង នៅពេលនោះថា៖
«រាជរដ្ឋាភិបាលបម្រុងទុកនៃថវិកា តាមសេណារីយ៉ូ ទី១ ឬទី២។ បើទី១ គឺត្រៀមបម្រុងប្រមាណជាជិត ៨០០ លានដុល្លារ។ អាហ្នឹងបើសិនជា ចេញអាសេណារីយ៉ូ វិបត្តិ គេថា វិបត្តិអូសបន្លាយ៦ខែ។ អារឿងកូរ៉ូណាអូសបន្លាយ៦ខែ គឺត្រៀមថវិកាប្រមាណ៨០០ លាន ដើម្បីស្រោចស្រង់សេដ្ឋកិច្ច។»
«ហើយបើវាទៅដល់១ឆ្នាំ យើងក៏បានប៉ាន់ស្មានថា បើ៦ខែ វាធ្លាក់សេដ្ឋកិច្ច ធ្លាក់កំណើនប៉ុនណា? ផលប៉ះពាល់វាធំប៉ុនណា? ហើយបាត់បង់ចំណូលប៉ុនណា? ប្រសិនបើវាកើតដល់មួយឆ្នាំ តើកំណើនសេដ្ឋកិច្ចរបស់យើង ធ្លាក់នៅប៉ុនណា? ហើយយើងត្រូវប៉ះប៉ូវ ទំហំទឹកប្រាក់ប៉ុនណា? អញ្ចឹងវាស្ថិតនៅក្នុងចន្លោះ ពី៨០០លាន ទៅ២០០០លានប៉ុណ្ណឹង ដែលយើងត្រៀមបម្រុង។»
ផ្ទុយទៅវិញ មកដល់ថ្ងៃនេះ កញ្ចប់ថវិការត្រៀមបម្រុងទាំងនោះ មិនត្រូវបានរដ្ឋាភិបាលលោក ហ៊ុន សែន យកចេញមកប្រើប្រាស់ តាមរយៈវិធានការអ្វី ឲ្យច្បាស់លាស់នៅឡើយ ខណៈការរៃអង្គាស រកប្រាក់ពីសប្បុរសជន បានកើតមានជាហូហែរ និងមានច្រើនវគ្គ។
វគ្គដំបូងគេ គឺជាប្រាក់ជំនួយឧបត្ថម្ភ ពីក្រុមអ្នកមានទ្រព្យធន ឬឧកញ៉ា។ ប្រាក់ជំនួយរបស់ក្រុម«សប្បុរសជន»ទាំងនេះ ត្រូវបានលោក ហ៊ុន សែន អះអាង នៅក្នុងសន្និសីទសារព័ត៌មាន នាវិមានរដ្ឋសភាថា មានទំហំប្រមាណជា ៩លានដុល្លារអាមេរិក មកទល់នឹងថ្ងៃទី៣១ ខែមីនា ឆ្នាំ២០២០។
បន្ទាប់មក និងរាប់ចាប់ពីល្ងាចម្សិលម៉ិញ មកដល់ថ្ងៃនេះ ព្រះរាជាណាចក្រអច្ឆរិយៈ បានឈានដល់វគ្គ ប្រាក់បៀវត្សបរិច្ចាគ ពីសំណាក់មន្ត្រីជាន់ខ្ពស់ ក្នុងជួររដ្ឋាភិបាល និងនៅតាមក្រសួងមន្ទីរនានា។
យុទ្ធនាការថ្មីមួយនេះ ត្រូវបានលោកនាយករដ្ឋមន្ត្រី ហ៊ុន សែន ចាប់ផ្ដើមធ្វើមុនគេ តាមរយៈលិខិតមួយរបស់លោក ផ្ញើរទៅរដ្ឋមន្ត្រីក្រសួងហិរញ្ញវត្ថុ ដោយប្រកាសបរិច្ចាគប្រាក់បៀវត្សរបស់លោក ចំនួន៧ខែ ទៅឲ្យគណៈកម្មការជាតិប្រយុទ្ធនឹងជំងឺ «Covid-19»។
ភ្លាមៗក្រោយមក មន្ត្រីក្រោមឱវាទរបស់លោក ហ៊ុន សែន ជាច្រើននាក់ ក៏បានប្រកាសបរិច្ចាគប្រាក់បៀវត្ស របស់ផងខ្លួន ជាបន្តបន្ទាប់ដែរ មុននឹងកាយវិការទាំងនេះ ត្រូវបានប្រព័ន្ធឃោសនា របស់លោក ហ៊ុន សែន យកមកចុះផ្សាយ យ៉ាងគគ្រឹកគគ្រេង។ មន្ត្រីទាំងនោះ រួមមាន បណ្ដារដ្ឋមន្ត្រី ទីប្រឹក្សា សមាជិកសភា-ព្រឹទ្ធសភា ឧត្ដមសេនីយ៍យោធា-នគរបាល អភិបាលខេត្តក្រុងនានា និងត្រូវរាប់បន្ថែម ដោយមន្ត្រីរាជការ នៅតាមក្រសួងមន្ទីរមួយចំនួនផង។
មកដល់ម៉ោងនេះ ក្រសួងសុខាភិបាលកម្ពុជា បានបញ្ចេញតួលេខផ្លូវការ ថាបានរកឃើញអ្នកឆ្លងជំងឺ «Covid-19» មានចំនួនកើនឡើង ដល់១១០នាក់ បន្ទាប់ពីរកឃើញអ្នកឆ្លងជំងឺថ្មី ចំនួន១នាក់បន្ថែមទៀត។ ក្រសួងបានប្រកាសបន្ថែមថា ចំនួនអ្នកជំងឺជាសះ បានកើនឡើង ដល់៣៤នាក់៕
