ដំណឹងបារាំង

Covid-19៖ បារាំងប្រកាស​ដាក់តំបន់​មួយចំនួន ក្នុង​ភាពអាសន្នវិញ

លោក អេម៉ានុយអែល ម៉ាក្រុង ប្រធានាធិបតីបារាំង នៅក្នុងវិមានប្រធានាធិបតី។ (រូបថតលើទ្វីសធើរ)
លោក អេម៉ានុយអែល ម៉ាក្រុង ប្រធានាធិបតីបារាំង នៅក្នុងវិមានប្រធានាធិបតី។ (រូបថតលើទ្វីសធើរ)

ចាប់ពីថ្ងៃសៅរ៍ខាងមុខនេះ រហូតដល់យ៉ាងតិច ៤សប្ដាហ៍ខាងមុខ តំបន់មួយចំនួន នៃប្រទេសបារាំង ត្រូវបានដាក់ ក្នុង​ភាពអាសន្នវិញ ដោយបិទការធ្វើដំណើរ រវាងពីម៉ោង​៩យប់ រហូតដល់ម៉ោង៦ភ្លឺ។

ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) បាន​ប្រកាស តាមកញ្ចក់​ទូរទស្សន៍ ក្នុងយប់ថ្ងៃពុធទី១៤ ខែតុលានេះ នូវវិធានការទាំងនោះ បន្ទាប់ពីចំនួនអ្នកឆ្លងមេរោគ «Covid-19» ក្នុងប្រទេស បានកើនឡើង​ដល់កម្រិត «គួរឲ្យព្រួយបារម្ភ»។

តំបន់ទាំងនោះ រួមមាន៖ រដ្ឋធានីប៉ារីស (Paris) និងតំបន់ជុំវិញ ក្រុងលីល៍ (Lille) និង​តំបន់ជុំវិញ ក្រុងគ្រើណូប (Grenoble) ក្រុងលីយ៉ុង (Lyon) ក្រុងម៉ាស៊ីយ៍ (Marseille) និងតំបន់ជុំវិញ ក្រុងម៉ុងពេលីយ៉េ (Montpellier) ក្រុងរូអង់ (Rouen) ក្រុងទូលូស្ស៍ (Toulouse)  និងក្រុងស៊ាំងតេជ្យែន (Saint-Etienne)។

លោក ម៉ាក្រុង អះអាងថា លោកគ្រោង​នឹងបន្តវិធានការនេះ រហូតដល់ថ្ងៃទី១ ខែធ្នូ​ខាងមុខ ប្រសិនណាជា​រដ្ឋសភាបារាំងបើកភ្លើងខៀវ អនុញ្ញាតឲ្យធ្វើ។

ជនណាដែលល្មើស​នឹងបម្រាម បិទចរាចរណ៍ខាងលើ នឹងរងការពិន័យ ក្នុងទឹកប្រាក់​១៣៥អ៊ឺរ៉ូ។ តែមានករណី​លើកលែង ចំពោះអ្នកណាដែលធ្វើការយប់ ឬអ្នកជំងឺត្រូវ​សង្គ្រោះ​បន្ទាន់… ដោយតម្រូវឲ្យមាន​ជាប់នឹងខ្លួន នូវលិខិតបញ្ជក់ ស្ដីពីការងារ ឬពីភាពចាំបាច់​របស់ខ្លួន។

ប្រធានាធិបតីបារាំង បានលើកឡើងបន្តថា ការដាក់បម្រាមជាថ្មី ជាការឆ្លើយតប នឹងកម្រិត«គួរឲ្យព្រួយបារម្ភ» តែមិនមែន​បង្ហាញពី «សភាពធ្ងន់ធ្ងរ» នៃការរីករាលដាល នៃជំងឺ«Covid-19»ទេ។ លោក ម៉ាក្រុង បញ្ជាក់ថា ការដាក់តំបន់មួយចំនួន ក្នុង​ភាពអាសន្នវិញ ជាវិធានការដើម្បីបង្ការ ការចេញ​ទៅ​វិស្សមកាល ទូស៊ាំង (Toussaint) ដែលនឹងចាប់ផ្ដើម ពីយប់ថ្ងៃសុក្រខាងមុខ និងមាន​រយៈពេល២សប្ដាហ៍។

លោកថា គ្មានការផ្អាក ឬកាត់បន្ថយ ការធ្វើដំណើរ​នៅក្នុងតំបន់ឡើយ (ឧទាហរណ៍​រវាង​រដ្ឋធានីប៉ារីស និងតំបន់ជុំវិញ) ហើយមធ្យោបាយដឹកជញ្ជូនសាធារណៈ នៅតែបន្ត​សកម្មភាព​ដដែល។

ប្រមុខរដ្ឋបារាំង បានសន្យាអំពីជំនួយ ផ្នែកសេដ្ឋកិច្ចបន្ថែមទៀត និងអំពាវនាវ​ឲ្យពលរដ្ឋបារាំង ត្រូវចូលរួមទប់ស្កាត់ ការរាតត្បាតនៃជំងឺដ៏ចង្រៃ ជាពិសេស​ធ្វើយ៉ាងណា កុំឲ្យកម្រិត«គួរឲ្យព្រួយបារម្ភ»នេះ ប្រែក្លាយ​ជាកម្រិត​«ធ្ងន់ធ្ងរ»៕



លំអិតបន្ថែមទៀត

ដំណឹង

អតីតប្រធានាធិបតីបារាំង ទទួលមរណភាព​ដោយសារ​«Covid-19»

លោក វ៉ាឡេរី ជីស្កាដេស្ដាំង (Valéry Giscard d’Estaing) អតីតប្រធានាធិបតីបារាំង រវាងពី​ឆ្នាំ១៩៧៤ មកទល់នឹងឆ្នាំ១៩៨១ បានទទួលមរណភាព ក្នុងជន្មាយុ៩៤ឆ្នាំ កាលពី​យប់​ថ្ងៃពុធទី២ ខែធ្នូ ...
ដំណឹង

ទិដ្ឋភាព​មើល​ពីលើ​អាកាស នៃ​«ដំបូលឆេះ»​របស់ Notre-Dame

ក្នុងរយៈពេលតែប៉ុន្មានម៉ោង ក្នុងយប់ថ្ងៃចន្ទ ចូលមកថ្ងៃអង្គារ បេតិភ័ណ្ឌមួយរបស់មនុស្សជាតិ ដែលមានវ័យជាង៨៥០ឆ្នាំ ត្រូវបានព្រះអគ្គិឆក់ត្របាក់ ដោយបន្សល់ទុក តែ«ដំបូលឆេះ»ពណ៌ខ្មៅ គួរឲ្យសោកសង្រេង។ ដូចបានឃើញ ក្នុងរូបភាពដែលថតពីលើអាកាស ដោយចេញផ្សាយ ដោយគេហទំព័រ ...
ដំណឹង

រដ្ឋាភិបាលបារាំង​នឹងរឹតបន្តឹង​សន្តិសុខ នៅតាម​គ្រឹះស្ថានសិក្សា​នានា

រដ្ឋាភិបាលបារាំងបានសម្រេច កាលពីយប់ថ្ងៃអាទិត្យម្សិលមិញ ធ្វើការរឹតបន្តឹងសន្តិសុខ នៅតាម​គ្រឹះស្ថានសិក្សា​នានា ចាប់ពីពេលចប់​វិសមកាលតូច (Vacances de Toussaint) ក្នុងពីរសប្ដាហ៍ខាងមុខ។ ប្រភពច្បាស់ការណ៍ ស្និតនឹងក្រុមប្រឹក្សាការពារជាតិ បានទម្លាយដំណឹងនេះ តាមរយៈ​ទូរទស្សន៍ ...

Comments are closed.

យល់ស៊ីជម្រៅផ្នែក ដំណឹង

ដំណឹង

EU បរិហារសំដី ពូទីន ដែល​បង្ហាញពី​«ក្ដី​អស់សង្ឃឹម​របស់គាត់»

ដំណឹង

មហាក្សត្រីយានី អេលីហ្សាប៊ែត សោយ​ទិវង្គត ក្នុងជន្មាយុ​៩៦ព្រះវស្សា

ព្រះមហាក្សត្រីយានី របស់ចក្រភពអង់គ្លេស ព្រះនាង អេលីហ្សាប៊ែត ទី២ (Elizabeth 2) បានសោយទិវង្គត ក្នុងជន្មាយុ​៩៦ព្រះវស្សា នៅរសៀលថ្ងៃព្រហស្បត្តិ៍ ទី៨ ខែកញ្ញា ឆ្នាំ២០២២។ ...
កម្រមាន

អ៊ីតាលី៖ ជីករូងដី​គ្រោងចូលលួច​ធនាគារ ស្រាប់តែ… ដីធ្លាក់សង្កត់

នៅរដ្ឋធានីរ៉ូម នៃប្រទេសអ៊ីតាលី បុរសម្នាក់បានជាប់ខ្លួននៅក្រោមដី អស់រយៈពេលជាង៨ម៉ោង ដោយហេតុ«ដីធ្លាក់សង្កត់»។ នគរបាលបានសង្ស័យថា បុរសម្នាក់នេះរួមនឹងជនផ្សំគំនិត៣នាក់ទៀត ទំនងជាបានជីករូងក្រោមដី ចេញពីហាងមួយ ដើម្បីគ្រោងចូលលួចធនាគារនៅក្បែរនោះ។ ហេតុការណ៍បានកើតឡើង កាលពីព្រឹក​ថ្ងៃព្រហស្បត្តិ៍ ទី១១ ...