ដំណឹងអាស៊ី-ប៉ាស៊ីភិក

បាញ់ប្រហារ​នៅ​ថៃ៖ ២៩នាក់​ស្លាប់ ខណៈ​ខ្មាន់​កាំភ្លើង​ត្រូវបង្ក្រាប

ការបាញ់ប្រហារ ក្នុងក្រុង កូរាត នៃខេត្ត «Nakhon Ratchasima» ប្រទេសថៃ ដែលបង្កឡើងដោយទាហានម្នាក់ កាលពីថ្ងៃសៅរ៍ បានបណ្ដាលឲ្យមនុស្ស ២៩នាក់​ស្លាប់ របួសជាង៥០នាក់។ បន្ទាប់ពីរត់គេចខ្លួន រហូតដល់ព្រឹកថ្ងៃអាទិត្យ ខ្មាន់កាំភ្លើង ដែលអាជ្ញាធរកំណត់អត្តសញ្ញាណ មានឈ្មោះ «Jakrapanth Thomma» ត្រូវបានកងកម្លាំងពិសេសបាញ់សម្លាប់។

ក្នុងយប់ថ្ងៃអាទិត្យ មនុស្សជាច្រើនរយនាក់ បានប្រមូលផ្ដុំគ្នា នៅក្បែរផ្សារទំនើបខាងលើ និងបានដុតទៀន ដើម្បីឧទ្ទិសដល់ជនរងគ្រោះ នៅក្នុងហេតុការណ៍ ដ៏អាណោចអាធម។

២៩នាក់​ស្លាប់ …

អភិបាលខេត្ត «Nakhon Ratchasima» ដែលស្ថិតនៅភាគឦសាន នៃរាជធានីបាងកក បានថ្លែងថា មានមនុស្ស២៩នាក់ បានស្លាប់ មានទាំងជនស៊ីវិល និងគ្រួសារទាហាន ក្នុងនោះជនរងគ្រោះក្មេងជាងគេ មានអាយុ១៣ឆ្នាំ។ កងកម្លាំងម្នាក់ បានស្លាប់នៅក្នុងការបាញ់តបត ជាមួយខ្មាន់កាំភ្លើង។

លោក ប្រយុទ្ធ ចន្ទអស្ចារ្យ (Prayuth Chan-ocha) នាយករដ្ឋមន្ត្រីថៃ ដែលមានវត្តមាន នៅឯមន្ទីរពេទ្យខេត្ត បានលើកឡើងថា ហេតុការណ៍នេះកើតចេញ ពីបញ្ហា«ផ្ទាល់ខ្លួន» នៃការលក់ផ្ទះសម្បែងមួយកន្លែង។ លោកបានថ្លែង ទៅកាន់ក្រុមអ្នកសារព័ត៌មានថា៖

«ការបាញ់ប្រហាររបៀបនេះ កើតមានជាលើកដំបូងបំផុត ក្នុងប្រទេសថៃ ហើយខ្ញុំចង់ឲ្យ វាកើតមាន​ ជាលើកចុងក្រោយបំផុត។»

ខ្មាន់កាំភ្លើង ដែលមានឈ្មោះ «Jakrapanth Thomma» បានធ្វើសកម្មភាព ដោយប្រើប្រាស់រថយន្ដយោធា កាំភ្លើងយន្ដ «M60» និងគ្រាប់កាំភ្លើង ដែលជននេះបានយកចេញ ពីមូលដ្ឋានយោធា ប្រចាំក្នុងខេត្ត។ សម្រាប់លោក ចន្ទអស្ចារ្យ បានលើកឡើងថា នេះមិនកើតចេញ ពីភាពខ្ជីខ្ជារក្នុងការទុកដាក់ សម្ភារៈសិកនោះទេ។

សារព័ត៌មានក្នុងស្រុក បានរាយការណ៍ថា ទាហាន «Jakrapanth Thomma» បានធ្វើសកម្មភាពដំបូង នៅក្នុងផ្ទះមួយកណ្ដាលក្រុង ដោយបាញ់សម្លាប់មនុស្សពីរនាក់ មុននឹងធ្វើដំណើរ ទៅកាន់មូលដ្ឋានយោធា។ បន្ទាប់មក ជននេះបានបើករថយន្ដ ចេញពីទីនោះ ឆ្ពោះទៅផ្សារទំនើប ហើយបានផ្ទុះអាវុធជាច្រើនគ្រាប់ ទៅលើហ្វូងមនុស្ស។

ខ្មាន់កាំភ្លើងបានផ្សាយផ្ទាល់ នូវរូបភាពវីដេអូ នៃសកម្មភាពបាញ់ប្រហារនេះ នៅលើគណនីហ្វេសប៊ុករបស់ខ្លួន។ ជននេះ បានបង្ហោះសារដូច្នេះថា «តើខ្ញុំត្រូវចូលសារភាព ឬទេ?» និងសារមួយទៀតថា «គ្មាននរណាម្នាក់ គេចផុតពីសេចក្ដីស្លាប់ នោះទេ»។

តែគណនីនោះ ត្រូវបានបិទដោយហ្វេសប៊ុក បណ្ដាញសង្គមយក្ស ដែលបាន ចេញសេចក្ដីប្រកាសព័ត៌មានមួយ សម្ដែងមរណទុក្ខ ចំពោះជនរងគ្រោះទាំងឡាយ នៅពេលបន្ទាប់មក៕



You may also like

ដំណឹង

ខ្យល់ព្យុះ «Pabuk» មិនមាន​ឥទ្ធិពល​ខ្លាំង ដូច​ការរំពឹង​ទុក

យ៉ាងណា ខ្យល់ព្យុះ «Pabuk» បានបន្សល់ទុក នូវការបំផ្លិចបំផ្លាញជាច្រើន ក្នុងនោះរាប់ទាំងទឹកជំនន់ ការដាច់ចរន្តអគ្គិសនី និងការខូចខាត​អាគារសាធារណៈ ផ្ទះសម្បែងពលរដ្ឋ… ស្ថិតក្នុងភាគខាងត្បូង នៃប្រទេសថៃ។ មនុស្សជិត ៣០ ...
ដំណឹង

តារាចម្រៀង​ថៃម្នាក់​ឡើង​សំដែង​​ពាក់អាវ​សញ្ញា​«ហ៊ីត្លែ»​ ​ផ្ទុះរឿង​អាស្រូវ

រឿងអាស្រូវ​បានផ្ទុះឡើង បន្ទាប់ពីស្ថានទូតអ៊ីស្ត្រាអែល ប្រចាំក្នុងប្រទេសថៃ កាលពីថ្ងៃសៅរ៍ បានសម្ដែង«ភាពតក់ស្លុត» និង«ការខ្វល់ខ្វាយ»របស់ខ្លួន នៅពេលបានឃើញតារាចម្រៀងម្នាក់ ដ៏មានប្រជាប្រិយ​របស់ប្រទេសថៃ បានឡើងហាត់សម​នៅលើឆាក ដោយពាក់អាវយឺតមួយ ដែលមានសញ្ញាទង់ជាតិ របស់ក្រុមណាស៊ី«ហ៊ីត្លែ»។ អ្នកចម្រៀង ...
កម្ពុជា

កម្ពុជា​ស៊ើបអង្កេត«ករណី​ចាប់ពង្រត់»​សកម្មជន​ថៃ តាមការស្នើ​ពី​ស្ថានទូត​ថៃ

បន្ទាប់ពីមិនអើពើ តាំងពីច្រើនថ្ងៃមក នៅថ្ងៃនេះអាជ្ញាធរកម្ពុជា បានប្រកាស​បើក​ការស៊ើបអង្កេតទៅលើ ករណី​ចាប់ពង្រត់ លោក វ៉ាន់ឆាឡឺម សាតស័ក្តិសិទ្ធ (Wanchalearm Satsaksit) សកម្មជននយោបាយថៃម្នាក់ ពីខាងមុខអាគារស្នាក់នៅ​របស់លោក កណ្ដាលរាជធានីភ្នំពេញ ...

Comments are closed.

ដំណឹង

សង្គ្រាមនៅអ៊ុយក្រែន ៖ អាមេរិកផ្ដល់ភ្លើងខៀវបញ្ជូនយន្តហោះ«F-16»

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

អ្នកជំនាញមួយក្រុមរបស់អង្គការសហប្រជាជាតិ បានអំពាវនាវទៅ​របបដឹកនាំរបស់លោក ហ៊ុន សែន ឲ្យដោះលែងអ្នកស្រី សេង ធារី មេធាវីខ្មែរអាមេរិកាំង ដែលគេស្គាល់ក្នុងពេលកន្លងមក ថាជា«ស្ត្រីសេរីភាព» តាមរយៈសម្លៀកបំពាក់តែងខ្លួនសម្ដែងមតិរបស់អ្នកស្រី នៅខាងមុខសាលាដំបូងរាជធានីភ្នំពេញ។ ក្រុមអ្នកជំនាញប្រឆាំងការឃុំឃាំងតាមទំនើងចិត្ត ...
កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...