«កំប្លោកសមុទ្រ» កំពុងវាយលុកឆ្នេរសមុទ្រភាគឦសានអូស្ត្រាលី
មនុស្សច្រើនជាង ៣៥០០នាក់ បានរងគ្រោះ ព្រោះសត្វត្រី កំប្លោកសមុទ្រ (ហៅជាអង់គ្លេស “Portuguese man o’ war”) ដែលកំពុងវាយលុយ តំបន់ឆ្នេរសមុទ្រ ភាគឦសាននៃកោះអូស្ត្រាលី។ ក្រោមហេតុផលនេះ អាជ្ញាធរអូស្ត្រាលី បានសម្រេចបិទឆ្នេរមួយចំនួន និងហាមបណ្ដាជន កុំឲ្យចុះងូតទឹក។
អាជ្ញាធរជំនាញ ហៅជាភាសាអង់គ្លេស «Surf life Saving Queensland ឬ SLSQ» បានប្រកាសនៅថ្ងៃចន្ទ ទី៧ ខែមករា ឆ្នាំ២០១៩នេះថា សត្វត្រីកំប្លោកពិសសមុទ្រ (នៅក្នុងប្រភេទខ្ញែសមុទ្រ) បានបង្កបញ្ហា ដល់មនុស្សជាច្រើននាក់រួចហើយ នៅក្នុងចុងសប្ដាហ៍កន្លងទៅនេះ។
ចំនួនជនរងគ្រោះពិតប្រាកដ ដែលរងការរលាក និងការឈឺចាប់ ដោយសត្វត្រីកំប្លោកសមុទ្រទិច មានចំនួន ៣ ៥៩៥នាក់។
ឆ្នេរសមុទ្រចំនួន៤ ត្រូវបានបិទជាបណ្ដោះអាសន្ន នៅថ្ងៃចន្ទនេះ។ ប្រព័ន្ធផ្សព្វផ្សាយតំបន់ បានលើកឡើង ពីការវាយលុកដ៏សម្បើមមួយ ពីសំណាក់សត្វត្រីដ៏ចង្រៃ មួយប្រភេទនេះ ដែលមានខ្លួនថ្លាដូចចាហួយ និងមានពណ៌ខៀវផ្លេកៗ។
អាជ្ញាធរ «SLSQ» បានសរសេរអក្សរធំៗដូច្នេះថា៖
«ពលត្រីកំប្លោកសមុទ្រ កំពុងចល័តគ្នា មកកាន់ឆ្នេរ “Rainbow”។ “Lifesavers” សូមប្រកាសបិទឆ្នេរ។ អញ្ចឹង សូមមេត្តាកុំចុះទឹក!»
ការទិចពីសំណាក់សត្វត្រីកំប្លោកសមុទ្រនេះ បានបង្កភាពចុកចាប់ យ៉ាងពិបាកទ្រាំ។ មានករណីខ្លះ ការទិចរបស់សត្វត្រី ដែលមានមាឌ ធំជាមេជើងបន្តិចនេះ អាចធ្វើឲ្យរងគ្រោះ ដល់ជីវិតថែមទៀតផង៕
