កាលពីថ្ងៃពុធសប្ដាហ៍មុន ប្រទេសចិនបានដាក់បង្ហាញ នូវរថភ្លើងប្រភេទថ្មីមួយ ដែលត្រូវបានអះអាងថា ជារថភ្លើងដែល«រត់បានលឿនជាងគេ» នៅក្នុងពិភពលោក។ ការដាក់តាំងបង្ហាញនេះ ធ្វើឡើងក្នុងក្រុង «Chengdu» នៃខេត្ត «Sichuan» ភាគកណ្ដាលប្រទេស។
ទូរទស្សន៍រដ្ឋ (ផ្លូវការ) របស់ប្រទេសចិន បានផ្សាយឲ្យដឹងថា រថភ្លើងដែលមានឈ្មោះ «Super Bullet Maglev Train» អាចរត់បានក្នុងល្បឿនដ៏លឿន រហូតដល់៦២០គីឡូម៉ែត្រ ក្នុងមួយម៉ោង ហើយនឹងត្រូវដាក់ឲ្យដំណើរការ រវាងពី៣ឆ្នាំ ទៅ១០ឆ្នាំខាងមុខ។
ប្រព័ន្ធផ្សព្វផ្សាយដដែល បានលើកឡើងថា រថភ្លើងប្រភេទថ្មីនេះ នឹងមិនរត់នៅលើផ្លូវដែក ដូចរថភ្លើងជំនាន់ចាស់ទេ តែរត់នៅលើប្រព័ន្ធម៉ាញ៉េទិកថ្មី ដែលភាសាអង់គ្លេសហៅថា «High temperature superconducting magnetic levitation train»។
គេគ្រាន់តែរង់ចាំមើល ថាតើរថភ្លើងប្រភេទថ្មីនេះ នឹងផ្ដល់គុណសម្បត្តិ ឬគុណវិបត្តិបែបណា នៅពេលវាត្រូវបានដាក់ឲ្យដំណើរការ៕
