វាហាក់ដូចជារឿងអយុត្តិធម៌ សម្រាប់មនុស្សស្រីមួយចំនួន ដែលត្រូវបានគេចោទ ឬវាយដំជេរស្តីថា ទាក់ទងប្តីគេ ខណៈដែលភាគីខាងបុរស នៅតែទទួលបានការអធ្យាស្រ័យ ពីប្រពន្ធដើម។ ទោះបីក្នុងសីលប្រាំ ក្នុងទ្រឹស្តីព្រះពុទ្ធសាសនា ដែលហាមប្រាម ពីការប្រព្រឹត្តខុសក្នុងកាម ទោះបីវាជារឿង ដែលសង្គមមិនអាចទទួលយកបាន ក៏មនុស្សស្រីមួយចំនួន នៅតែជ្រើសរើស ការទាក់ទងលួចលាក់ ជាមួយប្តីគេ ដោយមិនខ្វល់ ពីអ្វីទាំងអស់។
ខាងក្រោមនេះ គឺជាហេតុផលមួយចំនួន ជុំវិញការជ្រើសរើសរបស់ស្រ្តីមួយចំនួន ក្នុងការទាក់ទងជាមួយប្តីគេ។
១. ទាក់ទងប្តីគេ ព្រោះទ្រព្យសម្បត្តិ
មនុស្សស្រីមួយចំនួន សម្រេចចិត្តទាក់ទងប្តីគេ ដោយសារតែនាងសម្លឹងឃើញថា នាងនឹងទទួលបាន ផលប្រយោជន៍ជាច្រើន ពីភាគីបុរស ដូចជាលុយ ឡាន ឬផ្ទះជាដើម ដោយមិនបាច់ហត់នឿយ ក្នុងការសន្សំប្រាក់ ឬធ្វើការងារឱ្យលំបាកខ្លួន។ ជាការពិតណាស់ សារធាតុរបស់ប្តីសាវា គឺពេលខ្លះ ដោយសារតែ យល់ថាខ្លួនឯងមានលុយច្រើន ចាយមិនអស់ ក៏ប្រើវាជានុយ ចងចិត្តមនុស្សស្រី ឱ្យព្រមធ្វើរឿងផិតក្បត់ លួចលាក់ ជាមួយខ្លួន។
២. ព្រោះទុកចិត្ត
ពេលខ្លះ នាងពិតជាមិនអាចឃាត់បេះដូង មិនឱ្យស្រលាញ់បុរសម្នាក់នោះបានទេ ទាំងដែលដឹងថា គេមានប្រពន្ធហើយ។ តែនាងក៏ពិបាក នឹងរស់នៅជាមួយបុរសម្នាក់ ដែលមានឈ្មោះថា ជាប្តីគេដែរ។ ប៉ុន្តែព្រោះតែស្រលាញ់ពេក នាងក៏ព្រមជឿសម្តីបោកប្រាស់របស់គេ ដែលប្រាប់នាងថា គេនឹងលែងលះ ជាមួយប្រពន្ធដើម ដើម្បីងាកមកយកនាង ឬបុរសខ្លះ ពូកែភូតកុហក មនុស្សស្រី ឱ្យជឿថា គេគ្មានសុភមង្គលក្នុងគ្រួសារ ឬគេមិនដែលស្រលាញ់ប្រពន្ធគេនោះទេ ដែលជាហេតុធ្វើឱ្យគេ សម្រេចចិត្តក្បត់ប្រពន្ធ ទៅស្រលាញ់មនុស្សស្រីម្នាក់ទៀត។ ស្តាប់មើលទៅ ខាងប្រុស ហាក់ដូចជាជនរងគ្រោះ ដែលគួរឱ្យអាណិត ដែលធ្វើឱ្យបេះដូងស្រីម្នាក់ទៀតស្លាប់ ដោយសារគេបាន។
៣. ព្រោះអាត្មានិយម
ពេលខ្លះ ដោយសារភាពទាល់ច្រករបស់នាង នាងក៏សម្រេចចិត្តដើរផ្លូវមួយនេះ ដើម្បីរំដោះខ្លួន ចេញពីភាពលំបាក ឬដើម្បីជួយគ្រួសារ ដោយមិនបានពិចារណាឱ្យបានវែងឆ្ងាយ។ នាងដឹងតែម្យ៉ាងថា បុរសនេះ មានលុយអាចជួយនាងឱ្យបានថ្កុំថ្កើង រហូតមិនបានគិតដល់ទឹកភ្នែក របស់ស្រ្តីម្នាក់ទៀត ដែលយំដោយសារស្វាមី ផិតក្បត់។
៤. ព្រោះបទពិសោធឈឺចាប់ ដោយសារមនុស្សប្រុស
នារីខ្លះ ជួបរឿងខូចចិត្តដដែលៗ ពីមនុស្សប្រុសចិត្តមិនស្មោះ ឬប្រលាក់ប្រឡូក ស្អុយឈ្មោះដោយសារតែមនុស្សប្រុស ហើយក៏តាំងចិត្តថា លែងខ្វល់ចង់បានស្នេហាពិត ឬស្មោះស្ម័គ្រពីបុរសណាហើយ។ នាងសុខចិត្តរស់ ក្នុងឈ្មោះជាស្រីលួចលាក់របស់គេ ព្រោះនាងគ្មានសង្ឃឹមថា នឹងមានបុរសណាម្នាក់ ព្រមទទួលយកអតីតកាល របស់នាងបាន។
មិនថា អ្នកមានហេតុផលយ៉ាងណានោះ តែការជ្រើសរើស«ទាក់ទងប្តីគេ» មិនមែនជារឿងល្អ សម្រាប់អ្នកនោះឡើយ។ អ្វីដែលបានមក លើទឹកភ្នែកស្រ្តីម្នាក់ទៀត វាគង់នឹងបំផ្លាញខ្លួនឯង នៅពេលក្រោយ៕
