ក្រុមហង្សក្រហម បានរង់ចាំអស់«១៤ឆ្នាំ»ហើយ ពោលរាប់ចាប់ពីបានឈ្នះលើកមុន ក្នុងឆ្នាំ២០០៤! ក្រុមលីវើភូល (Liverpool FC – អង់គ្លេស) បានព្យាយាមយកជ័យជំនះ ពីឆ្នាំទៅម៉ិញដែរ តែក្នុងវគ្គផ្ដាច់ព្រ័ត្រពេលនោះ ក្រុមហង្សក្រហមបានចាញ់ក្រោមថ្វីជើង របស់ក្រុមរៀលម៉ាឌ្រីត (Real Madrid – អេស្ប៉ាញ) ដោយពិន្ទុ ១-៣។
តែនៅឆ្នាំនេះ ទល់នឹងក្រុម ថូថែនហាម (Tottenham FC – អង់គ្លេស) ក្រុមហង្សក្រហមដែលរៀបចំការប្រកួត បានយ៉ាងល្អតាំងពីនាទីដំបូង និងខិតខំការពាររហូតដល់នាទីចុងក្រោយ បានយកឈ្នះក្នុងពិន្ទុ ២-០ ក្នុងការប្រកួតផ្ដាច់ព្រ័ត្រ ក្របខណ្ឌ«Champions League»ដែលប្រព្រឹត្តិទៅក្នុងយប់ថ្ងៃសៅរ៍នេះ នៅកីឡដ្ឋាន «Metropolitano» នៃរាជធានីម៉ាឌ្រីត ប្រទេសអេស្ប៉ាញ។
គ្រាន់តែចាប់ផ្ដើមប្រកួត បានប៉ុន្មាននាទីដំបូង ក្រុមលីវើភូល បានវាយសន្ធាប់ភ្លាម និងរកបានគ្រាប់បាល់ពិន័យ ១១ម៉ែត្របាន នៅនាទីទី២ ទាត់បញ្ចូលទីដោយខ្សែប្រយុទ្ធជាតិអេហ្សីព កីឡាករ មហាមេដ សាឡាហ៍ (Mohamed Salah)។
បន្ទាប់មក នៅពាក់កណ្ដាលម៉ោងដំបូង គេត្រូវនិយាយពីការប្រកួត ដែលគ្មានព្រលឹង គ្មានការរៀបចំ ពីសំណាក់ក្រុមថូថែមហាម ដែលធ្វើឲ្យក្រុមមួយនេះ មិនបានបង្កគ្រោះអ្វីសោះ សម្រាប់ក្រុមហង្សក្រហម។
លុះចូលមកពាក់កណ្ដាលម៉ោងទី២ ទើបក្រុមស្ពៀរ (Spur) រៀបចំក្រឡាបាល់បានប្រសើរជាងមុន ហើយធ្វើការវាយសន្ធាប់ ជាច្រើនដង សំដៅដណ្ដើមគ្រាប់បាល់ ស្មើមកវិញ។ តែនៅចំពោះកីឡាករចាំទី ជាតិប្រេស៊ីលដ៏កំពូល កីឡាករ អាលីសុន បេគ័រ (Alisson Becker) គ្រាប់បាល់ទាំងនោះ មិនបានធ្វើឲ្យសំណាញ់ទីលីវើភូល រង្គើសូម្បីបន្តិចឡើយ។
រហូតដល់ជិតចុងបញ្ចប់នៃការប្រកួត គឺខ្សែប្រយុទ្ធជាតិប៊ែលហ្សិក កីឡាករ ឌីវ៉ក អូរីជី (Divock Origi) របស់ក្រុមហង្សក្រហម បានបិទបញ្ចប់ក្ដីសុបិន្តរបស់ក្រុមស្ពៀរ ជាស្ថាពរ ដោយដាក់បន្ថែមមួយគ្រាប់ទៀត នៅនាទីទី៨៧។
រាប់ទាំងឆ្នាំនេះ ក្រុមលីវើភូលឈ្នះបានពាន «ត្រជៀកធំ» ខ្នាតអ៊ឺរ៉ុបដូច្នេះ បាន៦លើកហើយ គឺនៅឆ្នាំ១៩៧៧ ១៩៧៨ ១៩៨១ ១៩៨៤ ២០០៥ និងឆ្នាំនេះ ២០១៩។ ចំនួនពានទាំង៦នេះ បានធ្វើឲ្យក្រុមនេះឈរ នៅលេខរៀងទី៣ បន្ទាប់ពីក្រុមរៀលម៉ាឌ្រីត ដែលឈ្នះបាន១៣លើក និងក្រុមអាសេមីឡង់ (AC Milan – អ៊ីតាលី) ដែលឈ្នះបាន៧លើក។
ចំណែកក្រុមស្ពៀរវិញ មិនដែលឈ្នះបានម្ដងណាទេ ហើយការឡើង មកដល់វគ្គផ្ដាច់ព្រ័ត្រ ក្នុងឆ្នាំនេះ ក៏ជាលើកដំបូង នៃប្រវត្តិសាស្ត្ររបស់ក្រុមដែរ៕
