កីឡាករ អើលីន ហាឡេន (Erling Haaland) រកបាន«មិត្តស្រីថ្មី» នៅក្នុងកីឡដ្ឋានរបស់ក្រុម វុលស្បួរ (Wolfsburg – អាល្លឺម៉ង់)? កីឡាករបានផ្ទុះប្រតិកម្មតប បន្ទាប់ពីការប្រកួតបានបញ្ចប់ និងបានទស្សនារូបភាពបង្ហោះ នៅលើបណ្ដាញសង្គម។
បន្ទាប់ពីអវត្តមានជាច្រើនសប្ដាហ៍ ដោយសាររងរបួសនោះមក កំពូលខ្សែប្រយុទ្ធរបស់ក្រុម ដ័រមូន (Borussia Dortmund – អាល្លឺម៉ង់) កីឡាករ អើលីន ហាឡេន បានវិលត្រឡប់មកវិញ ក្នុងការប្រកួតរវាងក្រុមខ្លួន ទល់នឹងក្រុម វុលស្បួរ ក្នុងការប្រកួតជុំទី១៣ ក្របខណ្ឌ«Bundesliga» នាយប់ទី២៧ ខែវិច្ឆិកានេះ។
ចូលទាត់នៅនាទីទី៧៣ កីឡាករវ័យ២១ឆ្នាំ ត្រូវការពេលតែ៨នាទីប៉ុណ្ណោះ ដើម្បីបញ្ចេញក្បាច់ទាត់ដ៏ពិសេស និងរកគ្រាប់បាល់ទី៣ ឲ្យក្រុមរបស់ខ្លួន (នៅនាទីទី៨១)។
ហេតុការណ៍ដែលកីឡាករ មិនបានរង់ចាំទុកមុននោះ គឺនៅពេលកីឡាករអបអរគ្រាប់បាល់របស់ខ្លួន ដោយលើកដៃចង្អុល ទៅកាន់អ្នកគាំទ្រក្រុម វុលស្បួរ ស្ត្រីវ័យចំណាស់ម្នាក់ ដែលទំនងជាក្ដៅក្រហាយ នឹងគ្រាប់បាល់របស់ខ្សែប្រយុទ្ធ បានបត់ដុំដៃបង្ហាញមកកីឡាករវិញ (រូបថតខាងលើ)។ រូបភាពត្រូវបានថតបាន និងយកមកផ្សព្វផ្សាយ យ៉ាងគគ្រឹកគគ្រេង ទាំងនៅតាមកញ្ចក់ទូរទស្សន៍នៅអ៊ឺរ៉ុប និងតាមបណ្ដាញសង្គម។
កីឡាករខ្សែប្រយុទ្ធ ដែលទំនងជាបានទស្សនារូបភាព បន្ទាប់ពីបញ្ចប់ការប្រកួត បានប្រតិកម្មតប ជាភាសាអង់គ្លេស នៅលើទំព័រទ្វីសធើររបស់ខ្លួនឡើងថា៖
«ដោយហេតុហ្នឹងហើយ ទើបយើងស្រឡាញ់កីឡាបាល់ទាត់៕»
