នៅខណៈពេលក្រុម «Everton» និងក្រុម «Wolverhampton» កំពុងប្រកួតសម្រាប់ក្របខណ្ឌបូកពិន្ទុ «Premier League» ដណ្ដើមជើងឯកនៅអង់គ្លេស ឆ្មារមួយក្បាល បានដើរចូលក្នុងក្នុងទីលានប្រកួត នៃកីឡដ្ឋាន «Goodison Park» បណ្ដាលឲ្យការប្រកួតរវាងក្រុមទាំងពីរ ត្រូវបានកាច់ផ្ដាច់អស់រយៈពេល ប្រមាណជា២នាទី ក្នុងយប់ថ្ងៃអាទិត្យកន្លងមក។
ការរត់ចូលក្នុងទីលានប្រកួត បានកើតឡើងនៅនាទីទី ៦៦ ពោលគឺនៅប៉ុន្មាននាទី ក្រោយគ្រាប់បាល់ទីបី របស់ក្រុម «Wolverhampton»។ ឆ្មារមួយក្បាល ដែលមានសម្បុរពណ៌ខ្មៅនេះ បានប្រើពេលមួយសន្ទុះ ដើម្បីដើរកាត់ព្រលាន និងឲ្យបណ្ដាអ្នកគាំទ្រក្រុម «Everton» បានឃើញដំណើររបស់វា មុននឹងវាវិលត្រឡប់ ចូលទៅក្នុងអាគារវិញ។
ប៉ុន្តែយ៉ាងហោចណាស់ វត្តមានរបស់សត្វឆ្មារខ្មៅ បានផ្ដល់អារម្មណ៍ប្លែក ប្រសើរជាងបរាជ័យរបស់ក្រុម «Everton» ដែលបានប្រកួតចាញ់ក្រុម «Wolverhampton» ក្នុងពិន្ទុ ១-៣ នៅក្នុងផ្ទះរបស់ខ្លួន។ អ្នកគាំទ្រខ្លះ ថែមទាំងចំអកឲ្យក្រុមខ្លួនឯងទៀតថា ដំណើររបស់សត្វឆ្មារ ហាក់មានភាពស្វាហាប់ជាងបណ្ដាកីឡាករ ដែលកំពុងធ្វើការប្រកួតនោះទៀតផង៕
