ក្នុងថ្ងៃតែមួយ បន្ទាប់ពីគ្រូបង្វឹកមុន ត្រូវបានបណ្ដេញចេញ ក្រុមជូវេនទូស (Juventus Turin) បានតែងតាំងគ្រូបង្វឹកថ្មី នៅប៉ុន្មានក្រោយមក។ គ្រូបង្វឹកថ្មីមានឈ្មោះ អង់ឌ្រេអា ផៀឡូ (Andrea Pirlo) ដែលជាអតីតកីឡាករដ៏ស្មោះស្ម័គ្រ និងទើបត្រូវបាន ឡើងមកដឹកនាំក្រុមកីឡាករអាយុក្រោម ២៣ឆ្នាំ (U23) របស់ក្រុមសេះបង្កង់ កាលពីចុងខែកក្កដាថ្មីៗ។
នៅក្នុងសេចក្ដីប្រកាសព័ត៌មាន របស់ក្រុម ជូវេនទូស បានឲ្យដឹងថា លោក ផៀឡូ នឹងត្រូវស្ថិតក្នុងតំណែង ជាគ្រូបង្វឹករហូតដល់ខែមិថុនា ឆ្នាំ២០២២។ សព្វថ្ងៃលោកមានអាយុ៤១ឆ្នាំ និងបានបញ្ចប់អាជីពជាកីឡាករ នៅឆ្នាំ២០១៧ បន្ទាប់ពីលោកបានលេងឲ្យក្រុម «New York City» ដែលជាក្រុមបាល់ទាត់ចុងក្រោយបង្អស់។
លោកបានទាត់ឲ្យក្រុម ជូវេនទូស ជាកីឡាករខ្សែបម្រើ រវាងពីឆ្នាំ២០១១ ដល់ឆ្នាំ២០១៥ តែក្រុមបាល់ទាត់ ដែលលោកបាននៅទាត់ឲ្យ បានយូរជាងគេគឺក្រុម មីឡង់ (AC Milan) រវាងពីឆ្នាំ២០០១ ដល់ឆ្នាំ២០១១។
បើនិយាយពីជ័យជំនះវិញ លោកធ្លាប់ឈ្នះជាជើងឯកអ៊ីតាលី ចំនួន៦លើក (២លើក ជាមួយក្រុម មីឡង់ និង៤លើក ជាមួយក្រុមជូវេនទូស) និងឈ្នះពានអ៊ឺរ៉ុប «Champions League» បានពីរលើក (ក្នុងឆ្នាំ២០០៣ និងឆ្នាំ២០០៧ ជាមួយក្រុមមីឡង់)។
នៅឆ្នាំ២០០៦ លោក ផៀឡូ បានលើកពាន«បាល់ទាត់ពិភពលោក»ម្ដងដែរ ជាមួយក្រុមជម្រើសជាតិអ៊ីតាលី ដែលកាលនោះ បានទាត់ឈ្នះក្រុមបាល់ទាត់ប្រទេសបារាំង ដោយគ្រាប់បាល់កាត់សេចក្ដី ៥-៣៕
