បេក្ខជនដែលឈ្នះ ក្លាយជាប្រធានាធិបតីអាមេរិក ត្រូវទទួលសម្លេង យ៉ាងហោច ២៧០តំណាងម្ចាស់ឆ្នោត ពីក្នុងចំណោម៥៣៨តំណាងម្ចាស់ឆ្នោត បែងចែកតាមមណ្ឌលនាន នៃរដ្ឋទាំង៥០។
ប៉ុន្តែនៅសហរដ្ឋអាមេរិក បើទោះជាការស្ទង់មតិ បានផ្ដល់លទ្ធផល ទៅលោក ចូ បៃដេន (Joe Biden) ឈ្នះលើលោក ដូណាល់ ត្រាំ (Donald Trump) ក៏ដោយ តែលទ្ធផលពិតប្រាកដ នៃបេក្ខជនទទួលជ័យជំនះ មិនអាចដឹងបានឡើយ នៅមុនយប់ថ្ងៃអង្គារ (ឬអាចឈានដល់ថ្ងៃពុធ ថែមទៀត)។
ការបោះឆ្នោត ដោយផ្ញើរតាមសំបុត្រ ពីសំណាក់ម្ចាស់ឆ្នោត ក៏អាចធ្វើឲ្យលទ្ធផលឆ្នោត មានភាពយឺតយាវ ជាការបោះឆ្នោតមុនៗដែរ ដោយហេតុថា រដ្ឋមួយចំនួន នឹងធ្វើការបើកស្រោមសំបុត្រ ដើម្បីរាប់សន្លឹកឆ្នោត នៅក្រោយថ្ងៃបោះឆ្នោត។
បើនិយាយជាផ្លូវការវិញ ឈ្មោះអ្នកឈ្នះ នឹងត្រូវបញ្ចេញឲ្យដឹង តែនៅពេលរដ្ឋទាំង៥០ បានប្រកាសបញ្ចប់ការរាប់សន្លឹកឆ្នោត ដែលអាចមានរយៈពេល រហូតដល់មួយសប្ដាហ៍ក្រោយ ឬច្រើនជាងនេះ។
យ៉ាងណា ស្ថាប័នព័ត៌មានធំៗ នៅសហរដ្ឋអាមេរិក អាចនឹងប្រកាសឲ្យដឹង ពីលទ្ធផលឆ្នោត ក្នុងយប់ថ្ងៃបោះឆ្នោតដដែល ដោយយោងតាមការស្ទង់មតិ នៅតាមមណ្ឌល និងតាមរដ្ឋនីមួយៗ៕
