ការធ្លាយសារជាតិគីមី«Nitrogen» ចេញពីរោងចក្រផលិតចំណីមួយ ឈ្មោះ«Prime Pak Foods» ដែលស្ថិតក្នុងក្រុង «Gainesville» ភាគឦសាននៃក្រុងអាត្លង់តា (រដ្ឋហ្សរចា ខាងកើតសហរដ្ឋអាមេរិក) បានបណ្ដាលឲ្យមនុស្ស«ស្លាប់យ៉ាងតិច៦នាក់» និងមនុស្សជាង១០នាក់ទៀត ត្រូវបានជម្លៀស ទៅកាន់មន្ទីរពេទ្យ។ នេះ បើតាមការអះអាង របស់នគរបាលតំបន់ ក្នុងថ្ងៃព្រហស្បត្តិ៍ ទី២៨ ខែមករានេះ។
នាយនគរបាលក្រុង «Gainesville» បានថ្លែងក្នុងសន្និសីទសារព័ត៌មាន កាលពីមុននេះ ឲ្យដឹងថា តុល្យភាពតំបូងបញ្ជាក់ពីមរណភាព នៃមនុស្ស៥នាក់ នៅនឹងកន្លែង និងម្នាក់ទៀតបានស្លាប់ នៅពេលបញ្ជូន ទៅដល់មន្ទីរពេទ្យ។ ហេតុការណ៍បានកើតឡើង នៅវេលាម៉ោងប្រមាណជា ១០ព្រឹក ម៉ោងក្នុងស្រុក។
មន្ត្រីនគរបាល បានអះអាងទៀតថា ការធ្លាយសារជាតិគីមី មិនបានបង្កឲ្យមានការផ្ទុះអ្វីទេ ដែលផ្ទុយស្រឡះ ពីព័ត៌មានទាំងឡាយ ដែលចេញផ្សាយក្នុងជំហានដំបូង ថាមានការផ្ទុះដ៏ខ្លាំងមួយ។ អាជ្ញាធរមិនទាន់រកឃើញ ពីមូលហេតុ ដែលបណ្ដាលឲ្យមានការបែកធ្លាយសារជាតិនេះនៅឡើយ មកទល់នឹងម៉ោងនេះ។
នៅក្រោយការបែកធ្លាយនោះ បណ្ដាសិស្សានុសិស្ស ដែលកំពុងរៀន នៅក្នុងសាលារៀនក្បែរៗនោះ ត្រូវបានបង្ខាំងឲ្យនៅក្នុងថ្នាក់រៀនរបស់ពួកគេ។ អាជ្ញាធរបានឲ្យដឹងបន្ថែមថា ពីក្នុងចំណោមជនរងគ្រោះ ដែលកំពុងសម្រាកក្នុងមន្ទីរពេទ្យ មានបីនាក់ កំពុងស្ថិតក្នុងស្ថានភាពធ្ងន់ធ្ងរ៕
