លទ្ធផលព្យាករណ៍ចុងក្រោយ បានចេញផ្សាយឲ្យដឹង នៅទីបំផុត៖ លោក ចូ បៃដិន (Joe Biden) បេក្ខជនមកពីគណបក្សប្រជាធិបតី បាន«ឈ្នះអង្គបោះឆ្នោត (អ្នកតំណាងម្ចាស់ឆ្នោត) រហូតដល់៣០៦សំឡេង» ទល់នឹងលោក ដូណាល់ ត្រាំ (Donald Trump) ប្រធានាធិបតីចប់អាណត្តិ ដែលទទួលបាន «ត្រឹមតែ២៣២សំឡេង»។
គឺរដ្ឋពីរចុងក្រោយ រដ្ឋ«Georgia» និងរដ្ឋ «North Carolina» ដែលបានផ្ដល់លទ្ធផល ព្យាករណ៍ របស់ផងខ្លួន កាលពីមុននេះបន្តិច និងរាយការណ៍ដោយប្រព័ន្ធផ្សព្វផ្សាយធំៗ នៅសហរដ្ឋអាមេរិក។ រដ្ឋ«Georgia» បានផ្ដល់ជ័យជំនះ សម្រាប់លោក បៃដិន ខណៈរដ្ឋ «North Carolina» បានផ្ដល់ជ័យជំនះ សម្រាប់លោក ត្រាំ។
កាលពីពីរថ្ងៃមុន រដ្ឋ«Alaska»ក៏បានបញ្ចប់ការរាប់សន្លឹកឆ្នោតដែរ ដោយផ្ដល់ជ័យជំនះ (លទ្ធផលព្យាករណ៍) សម្រាប់លោក ត្រាំ។
ជាលទ្ធផលព្យាករណ៍ សរុបពីរដ្ឋទាំង៥០ រួមនឹងរដ្ឋធានី វ៉ាស៊ីតោន (Washinton DC) ផងបង្ហាញថា លោក ចូ បៃដិន ឈ្នះអង្គបោះឆ្នោត ៣០៦សំឡេង ខណៈលោក ត្រាំ ទទួលបាន ២៣២សំឡេង។
ក្នុងឆ្នាំ២០១៦ លោក ត្រាំ ទទួលបានអង្គបោះឆ្នោត ៣០៤សំឡេង ឈ្នះបេក្ខនារីមកពីគណបក្សប្រជាធិបតេយ្យ អ្នកស្រី ហ៊ីឡារី គ្លីនតុន (Hillary Clinton) ដែលទទួលបានកាលនោះ ត្រឹមតែ២២៧សំឡេង។
ប្រព័ន្ធបោះឆ្នោតប្រធានាធិបតីអាមេរិក តម្រូវឲ្យបេក្ខជន ត្រូវទទួលសន្លឹកឆ្នោត យ៉ាងហោច ២៧០សម្លេង នៃអង្គបោះឆ្នោត (ពីក្នុងចំណោម ៥៣៨អង្គបោះឆ្នោត) ដើម្បីឈ្នះក្លាយជាប្រធានាធិបតី នៃប្រទេសមហាអំណាច។
តែមកដល់ពេលនេះ លោក ដូណាល់ ត្រាំ បានបដិសេធទទួលស្គាល់ បរាជ័យរបស់ខ្លួន និងបដិសេធ ជ័យជំនះរបស់លោក ចូ បៃដិន។ ប្រធានាធិបតីចប់អាណត្តិ បានលើកឡើង ពីការលួចបន្លំសន្លឹកឆ្នោត នៅក្នុងរដ្ឋមួយចំនួន ដែលលោក បៃដិន បានឈ្នះ ហើយបានប្ដឹងឡើងទៅតុលាការ ដើម្បីទាមទារឲ្យពិនិត្យឡើងវិញ អំពីភាពបានការនៃសន្លឹកឆ្នោត និងការរាប់សន្លឹកឆ្នោត នៅក្នុងរដ្ឋទាំងនោះ។
យ៉ាងណា លោក ដូណាល់ ត្រាំ មិនបានបង្ហាញពី«ភស្ដុតាងរឹង» នៅក្នុងការចោទប្រកាន់របស់លោកទេ ខណៈពាក្យបណ្ដឹងរបស់មួយភាគ ត្រូវបានតុលាការច្រានចោល៕
