កម្ពុជាដំណឹង

ក្រុងភ្នំពេញបញ្ចេញកំហឹងដាក់ ប្រ៊េដ អាដាម ដើម្បីការពារ សៅ សុខា

រដ្ឋាភិបាលក្រុងភ្នំពេញ បានបញ្ចេញប្រតិកម្មខ្លាំងៗ នៅរសៀលថ្ងៃសុក្រនេះ តបទៅលោក ប្រ៊េដ អាដាម (Brad Adams) នាយកប្រតិបត្តិប្រចាំតំបន់អាស៊ី របស់អង្គការឃ្លាំមើលសិទ្ធិមនុស្ស (Human Rights Watch) ដែលបានរិះគន់តារាបាល់ទាត់ជប៉ុន លោក កីស៊ូកិ ហុងដា (Keisuke Honda) ថាកំពុងធ្វើជាគ្រូបង្វឹក ឲ្យក្រុមជម្រើសជាតិកម្ពុជា ដែលជាការចាប់ដៃ ជាមួយលោក សៅ សុខា ដែលមេដឹកនាំផ្នែកសិទ្ធិមនុស្សរូបនេះ ចាត់ទុកថា ជាជន«មានបាតដៃប្រលាក់ឈាម»។

សេចក្ដីថ្លែងការណ៍មួយ ដែលចេញផ្សាយ ដោយអ្នកនាំពាក្យរដ្ឋាភិបាលកម្ពុជា បានហៅលោក ប្រ៊េដ អាដាម ថាជា «បុគ្គលមិនស៊ីវិល័យ» ដែល«តាំងខ្លួន ជាតម្រួតអន្តរជាតិ និងមាននិន្នាការនយោបាយចក្រពត្តិ» ហើយបានលើកឡើង «បែបជាការប្រឌិតវាយប្រហារ និងប្រមាថបំពាន» ប្រឆាំងលោក សៅ សុខា មេបញ្ជាការកងរាជអាវុធហត្ថ លើផ្ទៃប្រទេស និងជាប្រធានសហព័ន្ធកីឡាបាល់ទាត់កម្ពុជា។

អ្នកនាំពាក្យបានសរសេរបន្តថា៖

«ការលើកឡើង របស់អង្គការខាងលើនេះ គឺជាការធ្វើយុទ្ធនាការ បែបវិទ្ធង្សនា ប្រឆាំងនឹងចលនាយុវជនខ្មែរទាំងអស់ ក្នុងវិស័យកីឡាតែប៉ុណ្ណោះ»។

លិខិតមួយ របស់លោក ប្រ៊េដ អាដាម ក្នុងនាមអង្គការឃ្លាំមើលសិទ្ធិមនុស្ស ដែលត្រូវបានផ្ញើរទៅកាន់លោក កីស៊ូកិ ហុងដា កាលពីថ្ងៃទី៣ ខែធ្នូ ឆ្នាំ២០១៨ ហើយទើបនឹងត្រូវបានបង្ហាញជាសាធារណៈ កាលពីថ្ងៃទី១៨ ខែធ្នូ ឆ្នាំ២០១៨ កន្លងមកថ្មីៗ ដោយបានវាយតម្លៃ ការយល់ព្រមចាប់ដៃ ធ្វើការងារជាមួយលោក សៅ សុខា ដែលជាមនុស្សជំនិត របស់លោកនាយករដ្ឋមន្ត្រី ហ៊ុន សែន គឺជារឿងអាប់ឱនមួយ សម្រាប់រូបលោក ហុងដា ផង និងសម្រាប់ប្រទេសជប៉ុនផង។

លោក ប្រ៊េដ អាដាម បានសរសេរ​នៅក្នុងលិខិតនោះថា៖ 

«លោកឧត្តមសេនីយ៍ សៅ សុខា ដែលជាមេបញ្ជាការរង នៃកងយោធពលខេមរភូមិន្ទ និងមេបញ្ជាការ កងរាជអាវុធហត្ថកម្ពុជា គឺជាអ្នករំលោភសិទិ្ធមនុស្ស ដ៏ល្បីល្បាញ និងឧក្រិដ្ឋជនសង្គ្រាម។ កងកម្លាំងរបស់គាត់ បានទទួលខុសត្រូវ ចំពោះការសម្លាប់ក្រៅប្រព័ន្ធតុលាការ ការធ្វើទារុណកម្ម ការចាប់ខ្លួនដោយខុសច្បាប់ ការវាយប្រហារលើក្រុមអ្នកតវ៉ាអហិង្សា និងការរំលោភបំពានផ្សេងទៀត។»

អតីតខ្សែបម្រើ របស់ក្រុមជម្រើសជាតិជប៉ុន លោក កីស៊ូកិ ហុងដា បានចុះហត្ថលេខា កាលពីខែសីហាកន្លងមក ជាមួយសហព័ន្ធកីឡាបាល់ទាត់កម្ពុជា ដើម្បីទទួលធ្វើជាគ្រូបង្វឹក របស់ក្រុមជម្រើសជាតិកម្ពុជា សំរាប់រយ:ពេលពីរឆ្នាំ។ ក្នុងកិច្ចសន្យានោះ លោក ហុងដា មិនទទួលប្រាក់បៀវត្សទេ​ ប៉ុន្តែសហព័ន្ធកីឡាបាល់ទាត់កម្ពុជា ត្រូវទទួលបន្ទុក ក្នុងការចំណាយ ទៅលើការធ្វើដំណើរ និងការស្នាក់នៅរបស់លោក។

ស្រង់សំដី ក្នុងកិច្ចសម្ភាសមួយ ទៅឲ្យវិទ្យុអាស៊ីសេរី លោក ប្រ៊េដ អាដាម បន្តថ្លែងទៀតថា៖ 

«សកម្មភាព​របស់​គាត់ វា​ជះឥទ្ធិពល​អាក្រក់​ខ្លាំង ​ដល់​ប្រទេស​ជប៉ុន ដែល​គាត់​ប្រឡាក់ប្រឡូស​ ជាមួយ​មន្ត្រី​ខ្មែរ ដូចជា​លោក សៅ សុខា នេះ។ ខ្ញុំ​មិន​ភ្ញាក់ផ្អើល​ទេ ប្រសិនបើ​រដ្ឋាភិបាល​ជប៉ុន នឹង​បញ្ចេញ​ប្រតិកម្ម​ណាមួយ នៅ​ពេល​ខាងមុខនេះ។ ខ្ញុំ​ក៏​មិន​ភ្ញាក់ផ្អើល​ដែរ ដែល​ប្រទេស​ជប៉ុន អាច​នឹង​រង​ការ​អាម៉ាស់ ដោយសារ​ទង្វើ​ របស់​តារា​បាល់ទាត់​រូប​នេះ​នោះ។»

តែរដ្ឋាភិបាលលោក ហ៊ុន សែន បានថ្លែងការពារលោក សៅ សុខា ដោយលើកឡើងថា ឧត្ដមសេនីយ៍ផ្កាយមាស៤រូបនេះ ជា «ស្ថាបនិកស្ម័គ្រចិត្ត» របស់សហព័ន្ធកីឡាបាល់ទាត់កម្ពុជា ដែលបានចំណាយថវិកា និងពេលវេលាផ្ទាល់ខ្លួន «ជួយទំនុកបម្រុងយុវជន និងកីឡា ដើម្បីលើកតម្កើងពួកគេ ក្នុងការរក្សាបាន នូវទស្សនវិជ្ជមានរបស់យុវជន និងថាមពលរបស់ពួកគេ»។ 

សេចក្ដីថ្លែងការណ៍ដដែល បានហៅការលើកឡើង របស់លោក ប្រ៊េដ អាដាម ថាជាការបង្ហាញកាន់តែច្បាស់ ពី«ចរិតបែបប្រទូសរ៉ាយ ជាទង្វើដែលគួរឱ្យស្អប់ខ្ពើម និងដ៏អាម៉ាស» ដែលមិនអាចទទួលយកបាន ដោយ«ប្រជាជនកម្ពុជា»៕



លំអិតបន្ថែមទៀត

ដំណឹង

HRW៖ ក្រុងព្យុងយ៉ាង​ចាត់ទុក​អ្នកជាប់ឃុំ «មិនស្មើនឹង​សត្វធាតុ»

ការធ្វើទារុណកម្ម ការបំបាក់ស្មារតី និងការឆ្លើយសារភាព ក្រោមការបង្ខិតបង្ខំ គឺជាក្បួនតម្រាជាទូទៅ នៅក្នុងប្រព័ន្ធយុត្តិធម៌ នៃរបបកុម្មុយនីស្ដិ៍កូរ៉េ ដែលចាត់ទុកអ្នកជាប់ឃុំទាំងឡាយ «មិនស្មើនឹងសត្វធាតុ»នោះផងទេ។ នេះ បើតាមរបាយការណ៍ របស់អង្គការឃ្លាំមើលសិទ្ធិមនុស្សអន្តរជាតិ ដែលចេញផ្សាយ ...
កម្ពុជា

ប្រមុខការទូត​អង់គ្លេស លើកពី​​បញ្ហា​សិទ្ធិមនុស្ស ជាមួយ​សមភាគី​កម្ពុជា

រដ្ឋមន្រ្តីការបរទេស និងអភិវឌ្ឍន៍នៃចក្រភពអង់គ្លេស លោក ដូមីនិក រ៉ាអាប់ (Dominic Raab) ពិតជាបាន​«លើកពី​​បញ្ហា​សិទ្ធិមនុស្ស» ជាមួយលោក ប្រាក់ សុខុន សមភាគីកម្ពុជា នៅក្នុងជំនួបទ្វេភាគី ...
កម្ពុជា

អង្គការ​ជាតិ​-​​អន្តរជាតិ ចំនួន​​៣៣ ស្នើ​​ឲ្យ​យក​ពលរដ្ឋ​ខ្មែរ​ ពីប្រទេស​ម៉ាឡេស៊ី​

អង្គការ​សិទ្ធិមនុស្ស ជាតិនិង​អន្តរជាតិ​ ចំនួន​​៣៣ បាន​ចេញ​សេចក្តី​ថ្លែង​ការណ៍​រួម​មួយ ក្នុងចុងខែឧសភានេះ ដោយ​អំពាវនាវ​ទៅ​រដ្ឋាភិបាល​​កម្ពុជា ឲ្យអន្តរាគមន៍​ជា​បន្ទាន់ ក្នុងការ​នាំ​​យក​ពលរដ្ឋ​ខ្មែរ ​ដែល​កំពុង​ជាប់​គាំង ​នៅ​ប្រទេស​ម៉ាឡេស៊ី​ ចូល​មក​មាតុភូមិ​វិញ​ដោយ​​សុវត្ថិភាព​។ ការ​អំពាវនាវ​ដែលទើបតែចេញផ្សាយ នៅថ្ងៃទី២៩ ...

Comments are closed.

យល់ស៊ីជម្រៅផ្នែក កម្ពុជា

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

កម្ពុជា

កម្ពុជា ជាប់ឈ្មោះ​​ក្នុងបញ្ជី​​នៃក្រុមប្រទេស​«វាយបង្ក្រាប​សិទ្ធិពលរដ្ឋ»

ប្រទេសកម្ពុជា​ទើបត្រូវបានចាត់ចូល ក្នុងបញ្ជីនៃក្រុមប្រទេស«វាយបង្ក្រាប​សិទ្ធិពលរដ្ឋ» របស់អង្គការ«សម្ព័ន្ធភាពពិភពលោក នៃបណ្ដាអង្គការសង្គមស៊ីវិល និងសកម្មជន» ហៅកាត់ថា«CIVICUS» ដែលមានសមាជិកប្រមាណជាង ៩០០០អង្គការសង្គមស៊ីវិល មកពី១៧៥ប្រទេស នៅជុំវិញផែនដី។ ការចុះបញ្ជីនេះ បានធ្វើឡើងបន្ទាប់ពីការសម្រេចថ្មីបំផុត របស់រដ្ឋាភិបាលលោក ...