បន្ទាប់ពីមិនឃើញមានសកម្មភាព អស់ជាច្រើនសប្ដាហ៍ ទំព័រហ្វេសប៊ុក នៃចលនា«មាតាធម្មជាតិ»បានបង្ហោះសាររបស់ខ្លួន បានជាថ្មីឡើងវិញ។ ស្ថាបនិកចលនានេះ លោក អាឡិច ហ្គន់សាឡេស ដេវិតសុន (Alejandro G.Davidson) អះអាងថា ក្រុមលោកបានទាមទារទំព័រនេះ មកកាន់កាប់ឡើងវិញ ជាធម្មតា កាលពីថ្ងៃព្រហស្បត្តិ៍ម្សិលមិញ។
នៅប៉ុន្មានម៉ោងមុននេះ ទំព័រហ្វេសប៊ុករបស់ចលនាការពារធនធានធម្មជាតិកម្ពុជា ដ៏ល្បីល្បាញ បានបង្ហោះសារឡើងថា៖
«សូមស្វាគមន៍សារជាថ្មី មកកាន់ហ្វេសបុកផេកចលនាមាតាធម្មជាតិ។ យើងមានអារម្មណ៍សោមនស្សរីករាយ ដែលក្រុមហ៊ុនហ្វេសបុក សម្រេចសង្គ្រោះផេកនេះ ក្រោយពីការប៉ុនប៉ងប្លន់ពីសំណាក់អាជ្ញាធរ នៃរបបសន្តិភាព (លោក ហ៊ុន សែន)។»
កាលពីដើមខែកញ្ញា ទំព័រហ្វេសប៊ុកខាងលើ ដែលមានអាស័យដ្ឋាន « facebook.com/mothernaturecambodia » បានបាត់រូបពីបណ្ដាញសង្គម បន្ទាប់ពីសកម្មជនរបស់ចលនានេះ ចំនួន៣នាក់ ត្រូវបានអាជ្ញាធររបបក្រុងភ្នំពេញចាប់ខ្លួន។ សកម្មជនទាំងបីរូបរួមមាន លោក ថុន រដ្ឋា, កញ្ញា ឡុង គន្ធា និងកញ្ញា ភួន កែវរស្មី ដែលត្រូវបានចាប់ខ្លួន ក្រោមហេតុផលថា រៀបចំដំឡើងស្ទូឌីយោផ្សាយវីដេអូ និងព័ត៌មាន ដោយគ្មានច្បាប់អនុញ្ញាត និងការបង្ហោះព័ត៌មាន ពីយុទ្ធនាការ ដើរទៅភូមិគ្រឹះនាយករដ្ឋមន្ត្រី ដើម្បីសុំឱ្យដោះស្រាយករណីលុបបឹងតាមោក នៅជាយរាជធានី។
លោក អាឡិច បានចោទអាជ្ញាធរក្រុងភ្នំពេញ ថាបានចូលទៅកាន់កាប់ ដោយបំពាន (ឬប្លន់) ទំព័រហ្វេសប៊ុកមួយនេះ ដោយទំនងជាបានបង្ខំលោក ថុន រដ្ឋា ឲ្យប្រាប់លេខសម្ងាត់ ក្នុងនាមជា«អភិបាលទំព័រ» ដើម្បីក្រុមអាជ្ញាធរទាំងនោះ អាចចូលទៅក្នុងទំព័រខាងលើ និងផ្លាស់ប្ដូរទិន្នន័យនានា។
យ៉ាងណា ស្ថាបនិកជាតិអេស្ប៉ាញ ដែលនិយាយ និងសរសេរភាសាខ្មែរច្បាស់ដូចថ្ងៃ បានពន្យល់កាលពីម្សិលមិញ លើគណនេយ្យហ្វេសប៊ុក របស់លោកថា៖
«ចោរកម្មលួចហ្វេសប៊ុកផេក របស់ចលនាមាតាធម្មជាតិ ពីសំណាក់របបសន្តិភាព បានបរាជ័យទាំងស្រុង។ បន្ទាប់ពីមានការអន្តរាគមន៍ ពីយើងខ្ញុំ និងអង្គការដៃគូរក្នុង និងក្រៅស្រុកដ៏ទៃទៀតជាច្រើន ក្រុមហ៊ុនហ្វេសប៊ុក បានប្រគល់ផេកមាតាធម្មជាតិ មកឱ្យម្ចាស់ដើមវិញ ដែលនឹងដំណើរការចាប់ពីពេលនេះតទៅ។»
គ្មានប្រតិកម្មផ្លូវការ ពីមន្ត្រីទទួលខុសត្រូវ នៃរដ្ឋាភិបាលក្រុងភ្នំពេញ ចំពោះហេតុការណ៍ខាងលើនេះទេ។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បានថ្លែងប្រាប់សារព័ត៌មានក្នុងស្រុកថា លោកមិនបានដឹងច្បាស់ អំពីករណីមានការលួច ចូលទំព័រខាងលើទេ ប៉ុន្តែលោកថា ជាទូទៅ មន្ត្រីជំនាញនឹងរឹបអូសភ័ស្តុតាងទាំងអស់ ដែលពាក់ព័ន្ធបទល្មើស រួមទាំងផ្នែកបច្ចេកវិទ្យា ហើយតុលាការធ្វើការស៊ើបអង្កេត លើករណីនេះ។
ក្នុងសារបង្ហោះជាថ្មី នៅថ្ងៃសុក្រនេះ ទំព័រហ្វេសប៊ុក «មាតាធម្មជាតិ» ឬ «Mother Nature Cambodia» បានបន្តសរសេរថា៖
«ទន្ទឹមនឹង(ទទួលបានទំព័រមកវិញ)នេះ ពួកយើងជាសកម្មជន ចលនាមាតាធម្មជាតិ មានភាពសោកស្តាយជាពន់ពេក ដែលអាជ្ញាធរនៃរបបនេះ បានចាប់ខ្លួនសកម្មជនចលនាមាតាធម្មជាតិ ដ៏ស្អាតស្អំចំនួនបីរូប #លោកថុនរដ្ឋា #កញ្ញាភួនកែវរស្មី និង #កញ្ញាឡុងគន្ធា តាមអំពើរចិត្ត ដោយខុសទៅនឹងច្បាប់។ យើងហួសចិត្ត ដែលរបបមួយនេះ បានចាត់ទុកថា ការសុំជួបលោក ហ៊ុន សែន ដើម្បីបង្ហាញអំពីកង្វល់ ចំពោះការលុបបឹងតាមោក គឺជាអំពើរញុះញង់ទៅវិញ។»
«យើងពុំសុខចិត្តឡើយ ចំពោះអំពើរអយុត្តិធម៌នេះ ហើយនឹងទាមទារ ឱ្យដោះលែងសកម្មជនមាតាធម្មជាតិ ទាំង៣រូបជាបន្ទាន់។ យើងសង្ឃឹមថា របបនេះនឹងរក្សាបាននូវសតិសម្បជញ្ញៈជាខ្មែរ គោរពសិទ្ធិសេរីភាពរបស់ពលរដ្ឋ ដូចមានចែងក្នុងរដ្ឋធម្មនុញ្ញ នៃព្រះរាជាណាចក្រកម្ពុជា៕»
