កម្ពុជាដំណឹង

ហ៊ុន សែន ចង់ឃើញ​មុខ​«អ្នកដែលសប្បាយ»​ពេលអ៊ឺរ៉ុប​ធ្វើបាបលោក

លោក ហ៊ុន សែន នាយករដ្ឋមន្ត្រីកម្ពុជា។ (រូបថត AFP)

នាយករដ្ឋមន្ត្រីកម្ពុជា លោក ហ៊ុន សែន បានប្រតិកម្មនៅថ្ងៃនេះ ថារដ្ឋាភិបាលរបស់លោក នឹងមិនខ្វល់ពីការដកប្រព័ន្ធអនុគ្រោះ របស់សហភាពអ៊ឺរ៉ុប ហៅថា «គ្រប់មុខទំនិញទាំងអស់ លើកលែងតែសព្វាវុធ – EBA» នោះឡើយ ដោយលោកថ្លែងថា កម្ពុជានៅតែអនុវត្តពាក្យ «ឆ្កែចេះតែព្រុស មនុស្សចេះតែដើរ» ហើយចង់មើលមុខ អ្នកដែលសប្បាយ ពេលឃើញបរទេស​ធ្វើបាប​របបដឹកនាំ​របស់លោក។

បុរសខ្លាំងកម្ពុជា បានលើកឡើងយ៉ាងដូច្នេះ នៅក្នុងពិធីបិទសន្និបាតត្រួតពិនិត្យការងារឆ្នាំ២០១៨ របស់ក្រសួងមហាផ្ទៃ កាលពីម្សិលម៉ិញ បន្ទាប់ពីលោកមិនបានបង្ហាញខ្លួន ជាសាធារណៈ អស់រយៈពេល២០ថ្ងៃមកហើយ។

លោក ហ៊ុន សែន បានគូសបញ្ជាក់យ៉ាងច្រើន ពីហេតុការណ៍ចុងក្រោយ ទាក់ទងប្រព័ន្ធអនុគ្រោះ «EBA» ដែលសហភាពអ៊ឺរ៉ុប ទើបនឹងប្រកាសបើកនីតិវិធី ដើម្បីឈានទៅព្យួរប្រទេសកម្ពុជា ចេញពីកម្មវិធីនេះ ក្នុងរយៈពេលច្រើនខែខាងមុខ ប្រសិនណាជាប្រទេស​កម្ពុជា មិនស្ដារលទ្ធិប្រជាធិបតេយ្យ និងការគោរពសិទ្ធិមនុស្ស ឲ្យបានល្អប្រសើរ​វិញទេនោះ។

សម្រាប់នាយករដ្ឋមន្ត្រីកម្ពុជា ដែលនៅក្នុងតំណែងនេះ តាំងពី៣៤ឆ្នាំមកនោះ ការទាមទារ​របស់សហភាពអ៊ឺរ៉ុប គឺជាការរំលោភលើអធិបតេយ្យភាព និងឯករាជភាពកម្ពុជា ដែលលោកប្ដេជ្ញាមិនយកមកធ្វើជាថ្នូរបានឡើយ។ លោកបានអំពាវនាវ ទៅកាន់ប្រជាជន​កម្ពុជាថា៖

«ជនរួមជាតិ ជាពិសេសកម្មករកម្មការិនី បើនៅតែមានមុខរបរ មានការងារធ្វើ មានប្រាក់ចំណូល សុំកុំខ្វល់ពីនរណានិយាយពីអ្វី មន្ត្រីរាជការ កងកម្លាំងប្រដាប់អាវុធ និងនិវត្តន៍ជន បើនៅតែទទួលបានបៀវត្សរ៍ ពីរសប្ដាហ៍ម្ដង គឺត្រូវបន្តតាមពាក្យ «ឆ្កែចេះតែព្រុស មនុស្សចេះតែដើរ។ យើងក៏ចង់ឃើញមុខ អ្នកដែលសប្បាយ ដែលឃើញបរទេសធ្វើបាបយើង។»

ការចង់ឃើញមុខ«អ្នកដែលសប្បាយ» ទំនងជាលោក ហ៊ុន សែន ចង់សំដៅទៅលោក សម រង្ស៊ី ដែលជាគូបដិបក្ខផ្នែកនយោបាយ ដ៏ស្រួចស្រាវរបស់លោក។ តែលោកបានព្យាយាមពន្យល់វិញថា លោកមិនចង់ឆ្លងឆ្លើយ ជាមួយមេដឹកនាំប្រឆាំងរូបនេះទេ។ លោកថា៖

«ខ្ញុំក៏កំពុងចង់មើលមុខ អ្នកដែលរង់ចាំអាខ្មោច ដែលវាស្លាប់ទៅហើយ វានឹងរស់ឡើងវិញ ដើម្បីទទួលបានប្រាក់ខែ តើទឹកមុខវារបៀបណា? នៅពេលដែលវាចង់សម្លាប់យើង តែយើងមិនស្លាប់។ នេះ មិនមែនជាកាផ្ចាញ់ផ្ចាលមួយទេ ក៏ប៉ុន្តែវាជារឿងជាក់ស្ដែងមួយ ដែលអ្នកត្រូវយល់ យើងទាំងអស់គ្នាត្រូវយល់ ខ្ញុំគ្មានការចាំបាច់ ឆ្លើយតបជាមួយនរណាទាំងអស់ ប៉ុន្តែខ្ញុំមានភារកិច្ច ពន្យល់ពលរដ្ឋ១៦លាននាក់។»

លោក ហ៊ុន សែន អះអាងថា កម្ពុជាមិនស្លាប់ ហើយក៏មិនក្លាយជាអ្នកមាន ដោយសារប្រព័ន្ធអនុគ្រោះ របស់សហភាពអ៊ឺរ៉ុបនោះឡើយ។ លោកបញ្ជាក់ថា លោកសុខចិត្តប្រឹងធ្វើអ្នកមាន ជាជាងនៅជាអ្នកក្រ ឲ្យសហភាពអ៊ឺរ៉ុបម៉ាក់ងាយ។ លោកនិយាយថា៖

«កម្ពុជាមិនស្លាប់ដោយសារតែអត់ភាពអនុគ្រោះ EBA តែក៏មិនអាចធ្វើអ្នកមាន ដោយសារភាពអនុគ្រោះ EBA ដែរ។ គេគ្រាន់តែអនុគ្រោះឲ្យបន្តិចៗហ្នឹង អញ្ចឹងធ្វើអ្នកមានបានឬទេ? បើក្លាយជាអ្នកមានហើយ គេឈប់ឲ្យហើយអាហ្នឹងនោះ។ អញ្ចឹងត្រូវប្រឹងធ្វើអ្នកមានតែម្ដងទៅ វាមិនល្អជាង?»៕



You may also like

កម្ពុជា

ហ៊ុន សែន ត្រឡប់​ពីទស្សនកិច្ច​នៅចិន​ដោយ​អះអាង​ថា បាន​«ទទួលជោគជ័យ»

នាយករដ្ឋមន្ត្រីកម្ពុជា លោក ហ៊ុន សែន បានវិលត្រឡប់ មកដល់រាជធានីភ្នំពេញវិញហើយ នៅព្រឹកថ្ងៃពុធ ទី២៣ ខែមករា ឆ្នាំ២០១៩នេះ បន្ទាប់ពីលោកបានធ្វើទស្សនកិច្ច រយៈពេល៣ថ្ងៃ នៅក្នុងសាធារណរដ្ឋប្រជាមានិត ...
កម្ពុជា

Covid-19៖ ហ៊ុន សែន ឲ្យព្យួរ​«សិទ្ធិឯកជនពលរដ្ឋ» និង​បង្ហាញមុខ​អ្នកជំងឺ

នាយករដ្ឋមន្ត្រីកម្ពុជា លោក ហ៊ុន សែន បានចេញបញ្ជា ឲ្យព្យួរ«សិទ្ធិឯកជនពលរដ្ឋ» និងបង្ហាញ​អត្តសញ្ញាណ​អ្នកជំងឺ​ជាសាធារណៈ ដើម្បីអ្វីមួយ ដែលបុរសខ្លាំងរូបនេះ អះអាងថា ជាការទប់ស្កាត់ការរីករាលដាល នៃការបន្តឆ្លងជំងឺកូវីដ-១៩ (Covid-19) ...
កម្ពុជា

GDP ៖ គឺ​ថ្ងៃ៧មករា និង​បំណុលចិន ដែល​ប៉ះពាល់​ដល់​អធិបតេយ្យជាតិ

សម្រាប់គណបក្សប្រជាធិបតេយ្យមូលដ្ឋាន «GDP» ការទាមទាររបស់សហភាពអ៊ឺរ៉ុប តាមរយៈកិច្ចព្រមព្រៀងអ៊ឺរ៉ុប-កម្ពុជា នៃប្រព័ន្ធអនុគ្រោះពន្ធ «EBA» ក្នុងការលើកស្ទួយលទ្ធិប្រជាធិបតេយ្យ និងសិទ្ធិមនុស្សនៅកម្ពុជា មិនប៉ះពាលដល់អធិបតេយ្យភាពកម្ពុជា ជាដុំកំភួនទេ។ ផ្ទុយទៅវិញ គឺការដឹងគុណ និងសងគុណប្រទេសវៀតណាម ...

Comments are closed.

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...