ហ៊ុន សែន ថា«វណ្ណៈកណ្ដាល»កើនឡើង តាមរយៈផ្ទះស្បូវថ្លៃជាងផ្ទះក្បឿង
នាយករដ្ឋមន្ត្រីបីទសវត្សន៍ជាង របស់កម្ពុជា បានអះអាងថា ក្រោមការដឹកនាំរបស់លោក រហូតមកដល់ថ្ងៃនេះ «វណ្ណៈកណ្ដាល»នៃអ្នកមានទ្រព្យធន នៅក្នុងប្រទេស បានកើនឡើងយ៉ាងច្រើន។
មិនមានអំណះអំណាង ជាតួលេខ ឬរបាយការណ៍ណាមួយជាក់លាក់ ដើម្បីជួយបញ្ជាក់ នូវការលើកឡើង ខាងលើបានទេ។ តែលោក ហ៊ុន សែន បានយកហេតុផល នៃការមើលឃើញ«នឹងភ្នែក»មួយចំនួនមកពន្យល់ ជាពិសេសការឆ្លុះបញ្ចាំង ដែលសំខាន់ជាងគេ គឺតាមរយៈតម្លៃផ្ទះប្រក់ស្បូវ ដែលលោកអះអាងថា មានកម្រិតថ្លៃជាង ផ្ទះប្រក់ក្បឿង។
ថ្លែងក្នុងពិធីចែកសញ្ញាបត្រ ជូននិស្សិតបញ្ចប់ការសិក្សា ជាច្រើនពាន់នាក់ នៅរាជធានីភ្នំពេញ ក្នុងព្រឹកថ្ងៃព្រហស្បត្តិ៍នេះ លោក ហ៊ុន សែន បានលើកឡើងថា៖
«ឥឡូវយើងសង្កេតឃើញ វណ្ណៈកណ្ដាលរបស់យើង រីកដុះដាលសម្បើមណាស់ នៅក្នុងរយៈពេលប៉ុន្មានឆ្នាំចុងក្រោយនេះ។ វណ្ណៈកណ្ដាល យើងអាចសង្កេតឃើញបាន តាមរយៈកំណើននៃរថយន្ដ តាមរយៈកំណើននៃផ្ទះសម្បែង របស់ប្រជាពលរដ្ឋ។»
លោកនាយករដ្ឋមន្ត្រី បានបន្តថា៖
«ដែលឥឡូវនេះ គឺថា ផ្ទះស្បូវផ្ទះប្រក់ស្លឹកអីហ្នឹង អាណ្នឹងវាថ្លៃជាង ក្បឿង។ ស្បូវវាពិបាករកជាងក្បឿង វាពិបាករកជាងហ្វីប្រូស៊ីម៉ង់ ហើយនិងសង្កសី។ វាពិបាករកជាង។ អញ្ចឹងទេ… (…) វណ្ណៈកណ្ដាលរបស់យើង វារីកចម្រើនខ្លាំងណាស់៕»
