កម្ពុជាដំណឹង

អតីត​ចៅសង្កាត់ CNRP ត្អូញពីការរំខានតាមផ្លូវតុលាការ ទៅលើសិទ្ធិខ្លួន

«ខ្ញុំរស់នៅ វាពិបាកណាស់! ហើយខ្ញុំមិនដឹងថា តើពេលតទៅមុខទៀត ខ្ញុំនឹងប្រឈមអ្វីទៀតទេ។» នេះ ជាការអះអាងឡើង របស់កញ្ញា ស៊ិន ចាន់ពៅរ៉ូហ្សែត នៅខណៈដែល អតីត​ចៅសង្កាត់ អូចារ មកពីគណបក្សសង្គ្រោះជាតិរូបនេះ បានដើរចេញពីសាលាដំបូងខេត្តបាត់ដំបង។

កញ្ញា ចាន់ពៅរ៉ូហ្សែត រួមនឹងអតីតមន្ត្រី និងសកម្មជន មិនតិចជាង២៦នាក់ ត្រូវបានតុលាការថ្នាក់ខេត្ត ចេញដីកាកោះហៅ ឲ្យចូលទៅបង្ហាញខ្លួន និងបំភ្លឺ ដើម្បីត្រូវបានសាកសួរ ពីបទសង្ស័យ «ប្រឆាំងនឹងសាលដីកាតុលាការកំពូល ចុះថ្ងៃទី១៦ វិច្ឆិកា ឆ្នាំ២០១៧»។ ថ្ងៃនិងម៉ោង ដែលត្រូវចូលខ្លួននោះ ត្រូវបានកំណត់ខុសៗគ្នា ចាប់ពីព្រឹកថ្ងៃទី៨ រហូតដល់រសៀល ថ្ងៃទី២១ ខែឧសភា ឆ្នាំ២០១៩។

ក្នុងដំណើរចេញពីតុលាការ អតីតចៅសង្កាត់ ដែលទទួលការជ្រើសតាំង ពីម្ចាស់ឆ្នោតរូបនេះ បានអះអាងថា នៅក្នុងដំណើរសាកសួរនោះ មន្ត្រីតុលាការខេត្តបានសួរកញ្ញា ចំនួនពីរសំនួរសំខាន់ៗ។ កញ្ញាថា៖

«គេសាកសួរករណីពីរ។ ករណីទី១ ថាតើខ្ញុំប្រមូលការជួបជុំហ្នឹង ប្រកាសលោកប្រធាន សម រង្ស៊ី ជាប្រធានស្ដីទី គណបក្សសង្គ្រោះជាតិ។ ខ្ញុំបានបញ្ជាក់ថា ខ្ញុំមិនបានកោះហៅអតីតគណបក្សសង្គ្រោះជាតិ មកជួបជុំទេ។ ខ្ញុំជាម្ចាស់ហាង [លក់នំបញ្ចុក] អញ្ចឹងគ្រប់និន្នាការ គ្រប់គណបក្សទាំងអស់ គឺខ្ញុំស្វាគមន៍ទាំងអស់ សម្រាប់ភ្ញៀវទាំងអស់។»

«ទីពីរ គេសួរថា តើខ្ញុំមានបានប្រព្រឹត្តិបទល្មើស ប្រឆាំងសាលដីការំលាយគណបក្សសង្គ្រោះជាតិឬអត់។ ខ្ញុំថា អត់មានទេ។ ហើយថ្ងៃទី២ ខែធ្នូ ឆ្នាំ២០១៨ គេថាខ្ញុំធ្វើសន្និសីទ ថ្លែងការគាំទ្រ… ខ្ញុំថា ខ្ញុំអត់បានធ្វើទេ។»

កញ្ញា ស៊ិន ចាន់ពៅរ៉ូហ្សែត បានសំដែងការត្អូញត្អែរ ចំពោះការកោះហៅទាំងនេះ ដោយចាត់ទុកថា ជាការរំខានមួយ សម្រាប់សិទ្ធិរស់នៅ ក្នុងនាមជាពលរដ្ឋដូចគេដូចឯង។ កញ្ញាថ្លែងថា៖

«គេឲ្យខ្ញុំសំណូមពរ ខ្ញុំថា ខ្ញុំសំណូមពរឲ្យទម្លាក់ ការចោទប្រកាន់ទាំងអស់។ ពីព្រោះរំខានមែនទែន។ ទីមួយ យើងមិនខុសទេ។ អ្នកខ្លះគាត់ថា ចូលមកឆ្លើយមក វាអត់មានអីខុសទេ។ ប៉ុន្តែវាមានអារម្មណ៍បាត់ទៅហើយ។ ខ្ញុំត្រូវរកស៊ី (…) ចុះបើអារម្មណ៍ខ្ញុំ នៅតែជាមួយការកោះហៅ ម្ដងហើយម្ដងទៀត តើខ្ញុំមានអារម្មណ៍ណាទៅរកស៊ី?»

អតីត​ចៅសង្កាត់ មកពីគណបក្សប្រឆាំងរូបនេះ បានបញ្ជាក់ទៀតថា៖

«គេរំខានការលក់ដូរ របស់យើងម្ដងហើយ លើកនេះម្ដងទៀត លក់នំបញ្ចុកប្រឆាំងសាលដីកា តើឲ្យយើងរស់នៅយ៉ាងម៉េច? ហើយខ្ញុំមិនដឹងថា តើមានភ្ញៀវណាមកទទួលទានទៀតទេ។ ខ្ញុំជឿជាក់ថា គេស្រឡាញ់គេគាំទ្រ គេលើកទឹកចិត្ត។ ក៏ប៉ុន្តែគេក៏មានអារម្មណ៍របស់គេដែរ។ អង្គុយញ៉ាំនំបញ្ចុកខ្ញុំ ភ្នែកនៅតែកញ្ចឹងកទេ។»

មិនអាចទាក់ទងតុលាការខេត្តបាត់ដំបង ដើម្បីធ្វើការស្រាយបំភ្លឺ ចំពោះការលើកឡើងខាងលើនេះទេ។

សម្រាប់អង្គការឃ្លាំមើលសិទ្ធិមនុស្ស (Human Rights Watch) បានចាត់ទុកការកោះហៅទាំងនេះ ពីសំណាក់តុលាការខេត្តបាត់ដំបង ជាទង្វើដែលធ្វើឡើង តាមទំនើងចិត្ត។ នេះ បើតាមសេចក្ដីថ្លែងការណ៍ ចេញផ្សាយពីអង្គការអន្តរជាតិមួយនេះ កាលពីថ្ងៃទី៧ ខែឧសភា។

លោក ប្រ៊ែដ អាដាម នាយក​ប្រចាំ​តំបន់​អាស៊ី ​នៃ​អង្គការខាងលើ ត្រូវបានស្រង់សំដីមកបញ្ជាក់ ក្នុងសេចក្ដីថ្លែងការណ៍នោះថា របបក្រុងភ្នំពេញ ​នៅតែបន្ត និងកំពុង​ប្រើប្រាស់​តុលាការ ដើម្បី​តាម​ធ្វើបាប​មន្ត្រី​បក្ស​ប្រឆាំង និង​គំរាម​ចាប់​ពួកគេ​ដាក់គុក​។ លោកថា ​របប​លោក ហ៊ុន សែន ត្រូវបិទ​បញ្ចប់​យុទ្ធនាការនេះ ហើយ​ត្រូវ​ទម្លាក់​ចោល​ឱ្យ​អស់ ​នូវ​សំណុំរឿង​ដែល​មិន​សម​ទំនង​ទាំងឡាយ​នេះ៕



លំអិតបន្ថែមទៀត

កម្ពុជា

សុខ ឥសាន ថាក្រុមប្រឆាំង«ជិតងាប់»​ព្រោះ សម រង្ស៊ី មិនហ៊ាន​ចូលស្រុក

សម្រាប់លោក សុខ ឥសាន អ្នកនាំពាក្យគណបក្សប្រជាជនកម្ពុជា (CPP) បានលើកឡើងនៅថ្ងៃទី៣ ខែមីនា ឆ្នាំ២០១៩នេះថា ក្រុមប្រឆាំងកំពុងបែកបាក់ និងជ្រួលច្របល់ ដោយសារមេបក្សពួកគេ គឺលោក សម ...
និមិត្តសញ្ញារបស់ស្ថានទូតអាមេរិក និងលោក កឹម សុខា មេដឹកនាំគណបក្សសង្គ្រោះជាតិ។ (រូបថតកាត់ត)
កម្ពុជា

ក្នុង​ទិវា​សិទ្ធិ​មនុស្ស អាមេរិក​ស្នើ​ឲ្យ​ដោះលែង​អ្នក​ទោស​នយោបាយ

ស្ថានទូតសហរដ្ឋអាមេរិក ប្រចាំនៅកម្ពុជា បានឆ្លៀតឱកាស នៃទិវាសិទ្ធិមនុស្សអន្តរជាតិ ថ្ងៃទី១០ ខែធ្នូ ឆ្នាំ២០១៨នេះ ដើម្បីអំពាវនាវជាថ្មី ទៅកាន់របបក្រុងភ្នំពេញ ឲ្យទម្លាក់ចោលបទចោទប្រកាន់ ទៅលើបណ្ដា​អ្នកទោស​នយោបាយ​ទាំងអស់។ ជាមួយនឹងរូបថតលោក កឹម ...
កម្ពុជា

សមាជ​អ្នក​ប្រជាធិបតេយ្យ​នៅ​កូរ៉េ ចេញ​សេចក្ដី​សម្រេ​ច​«៧ចំណុច»

សមាជ​អ្នកប្រជាធិបតេយ្យ ក្នុង​ក្រុងក្វាងយូ ប្រទេសកូរ៉េខាងត្បូង ក្នុង​រយៈពេល​បីថ្ងៃ រាប់ពី​ថ្ងៃទី១៩ ដល់ថ្ងៃទី២១ ខែមេសា ឆ្នាំ២០១៩នេះ បាន​ចេញសេចក្ដី​សម្រេច​ដ៏វែងអន្លាយ​មួយ មាន«៧ចំណុច»។ មន្ត្រីអង្គការសង្គមស៊ីវិឡ និងគណបក្សប្រឆាំងជាច្រើន រួមមានទាំងលោក ...

Comments are closed.

យល់ស៊ីជម្រៅផ្នែក កម្ពុជា

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

កម្ពុជា

កម្ពុជា ជាប់ឈ្មោះ​​ក្នុងបញ្ជី​​នៃក្រុមប្រទេស​«វាយបង្ក្រាប​សិទ្ធិពលរដ្ឋ»

ប្រទេសកម្ពុជា​ទើបត្រូវបានចាត់ចូល ក្នុងបញ្ជីនៃក្រុមប្រទេស«វាយបង្ក្រាប​សិទ្ធិពលរដ្ឋ» របស់អង្គការ«សម្ព័ន្ធភាពពិភពលោក នៃបណ្ដាអង្គការសង្គមស៊ីវិល និងសកម្មជន» ហៅកាត់ថា«CIVICUS» ដែលមានសមាជិកប្រមាណជាង ៩០០០អង្គការសង្គមស៊ីវិល មកពី១៧៥ប្រទេស នៅជុំវិញផែនដី។ ការចុះបញ្ជីនេះ បានធ្វើឡើងបន្ទាប់ពីការសម្រេចថ្មីបំផុត របស់រដ្ឋាភិបាលលោក ...