បុរសខ្មែរពីរនាក់ ដែលធ្វើដំណើរពីប្រទេសជប៉ុន ត្រូវបានធ្វើតេស្ដិ៍ រកឃើញវិជ្ជមានកូវីដ-១៩ (Covid-19)។ ការរកឃើញចុងក្រោយ ធ្វើឲ្យ តួលេខសរុប នៃអ្នកជំងឺនៅក្នុងព្រះរាជាណាចក្រ កើនឡើងដល់២៩៧ករណី។
សេចក្តីប្រកាសព័ត៌មាន របស់ក្រសួងសុខាភិបាល ដែលចេញផ្សាយ នៅព្រឹកថ្ងៃទី០៩ ខែវិច្ឆិកា ឆ្នាំ២០២០នេះ បានបញ្ជាក់ថា បុរសទាំង០២នាក់នោះ គឺម្នាក់អាយុ ២៥ឆ្នាំ ស្នាក់នៅ ភូមិរាំងដេក ឃុំគគីរធំ ស្រុកកៀនស្វាយ ខេត្តកណ្ដាល និងម្នាក់ទៀតអាយុ ៣៨ឆ្នាំ ស្នាក់នៅភូមិរាំងដេក ឃុំរកាក្រៅ ក្រុងដូនកែវ ខេត្តតាកែវ។
បុរសទាំងពីរ បានធ្វើដំណើរមកពីប្រទេសជប៉ុន ដោយបន្តជើងហោះហើរ នៅប្រទេសកូរ៉េខាងត្បូង មុននឹងមកដល់កម្ពុជា នៅថ្ងៃទី២៦ ខែតុលា ឆ្នាំ២០២០។
ការធ្វើតេស្តលើកទី២ នៅថ្ងៃទី១៣ នៃរយៈពេលសរុប (១៤ថ្ងៃ) ក្នុងការធ្វើចត្តាឡីស័ក បានផ្ដល់លទ្ធផលវិជ្ជមានវីរុសកូវីដ-១៩។ បច្ចុប្បន្ន អ្នកជំងឺទាំងពីរនាក់ ត្រូវបានដាក់ឱ្យសម្រាកព្យាបាល នៅមន្ទីរពេទ្យមិត្តភាពខ្មែរ-សូវៀត។
រួមជើងយន្ដហោះជាមួយគ្នា បុរសខ្មែរពីរនាក់ផ្សេង ក៏ត្រូវបានធ្វើតេស្ដិ៍ភ្លាមៗ ចេញលទ្ធផលវិជ្ជមានវីរុសកូវីដ-១៩ដែរ។ បុរសទាំងពីរនាក់មុននេះ បានចូលសម្រាកព្យាបាល នៅមន្ទីរពេទ្យមិត្តភាពខ្មែរ-សូវៀត ហើយមានបុរសម្នាក់បានជាសះស្បើយរួចហើយ។
ដោយឡែក អ្នករួមដំណើរចំនួន៣៥នាក់ទៀត ដែលមានលទ្ធផលអវិជ្ជមានវីរុសកូវីដ-១៩ ត្រូវបានដាក់ឱ្យធ្វើចត្តាឡីស័ក នៅតាមសណ្ឋាគារចំនួន ០២កន្លែង ក្នុងរាជធានីភ្នំពេញ (ចំនួន ២៨នាក់) និងនៅវិទ្យាល័យពោចិនតុង ចំនួន០៧នាក់។
ក្រសួងសុខាភិបាល បញ្ជាក់ទៀតថា អ្នកដំណើរដែលស្នាក់នៅវិទ្យាល័យពោចិនតុង ចំនួន ០៧នាក់ ដែលមានហានិភ័យ ក្នុងការចម្លងបន្ត ពីអ្នកជំងឺថ្មី ទាំងពីរនាក់ខាងលើ តម្រូវឱ្យនៅបន្តធ្វើចត្តាឡីស័ក ចំនួន១៤ ថ្ងៃបន្ថែមទៀត ដើម្បីតាមដានសុខភាពជាបន្ត។
មកដល់ថ្ងៃទី០៩ ខែវិច្ឆិកា ឆ្នាំ២០២០នេះ ប្រទេសកម្ពុជា បានអះអាងរកឃើញអ្នកមានវីរុសកូវីដ-១៩ មានចំនួនសរុប២៩៧នាក់ (ស្ត្រី ៦០នាក់ និងបុរស ២៣៧នាក់) ក្នុងនោះអ្នកជំងឺ ដែលទទួលការព្យាបាល បានជាសះស្បើយ មានចំនួនសរុប ២៨៨នាក់ នៅទូទាំងប្រទេស ខណៈអ្នកជំងឺកំពុងបន្តសម្រាកព្យាបាល នៅមន្ទីរពេទ្យមិត្តភាព ខ្មែរ-សូវៀត (ភ្នំពេញ) មានចំនួន ០៩នាក់ (ស្រី ០២នាក់ និងបុរស ០៧នាក់)៕
